मैदान गाजवण्यासाठी चिमुकले उतरले मैदानात!

मैदान गाजवण्यासाठी चिमुकले उतरले मैदानात!

येरणे केंद्र समूहातील क्रीडा स्पर्धांना उत्स्फूर्त प्रतिसाद; १२ शाळांतील विद्यार्थ्यांचा उत्साहपूर्ण सहभाग

तळदेव प्रतिनिधी : विद्यार्थ्यांच्या सर्वांगीण विकासाला चालना देण्याबरोबरच त्यांच्यातील क्रीडा कौशल्याला व्यासपीठ मिळावे, खेळाची आवड निर्माण व्हावी आणि भविष्यातील क्रीडा क्षेत्रातील गुणवत्ता हेरून योग्य प्रशिक्षण मिळावे, या उद्देशाने सातारा जिल्हा परिषदेमार्फत दरवर्षी आयोजित करण्यात येणाऱ्या स्वर्गीय यशवंतराव चव्हाण बालक्रीडा स्पर्धांचा केंद्रस्तरीय टप्पा येरणे केंद्र समूहात उत्साहात पार पडला.

जिल्हा परिषद प्राथमिक शाळा सौदरी येथे आयोजित करण्यात आलेल्या या स्पर्धेत येरणे केंद्रातील तब्बल १२ प्राथमिक शाळांमधील विद्यार्थ्यांनी उत्स्फूर्त सहभाग घेतला. सकाळपासूनच शाळेच्या परिसरात विद्यार्थ्यांची लगबग, मैदानावरचा उत्साह आणि आपल्या संघाला प्रोत्साहन देण्यासाठी आलेल्या पालक व ग्रामस्थांची उपस्थिती यामुळे परिसराला जणू क्रीडा महोत्सवाचे स्वरूप प्राप्त झाले होते.

स्पर्धेचे उद्घाटन केंद्रप्रमुख अमोल कुंभार यांच्या हस्ते करण्यात आले. यावेळी प्राथमिक शिक्षक बँकेचे संचालक संजय संकपाळ, केंद्रातील ज्येष्ठ शिक्षक बाळकृष्ण कदम, राजेंद्र जाधव आणि शाम चोरगे यांच्यासह शिक्षक, विद्यार्थी व ग्रामस्थ उपस्थित होते.

विविध क्रीडा प्रकारांत चिमुकल्यांची रंगतदार कामगिरी

लहान गट व मोठा गट अशा दोन वयोगटांमध्ये मुलांच्या व मुलींच्या स्वतंत्र स्पर्धा घेण्यात आल्या. धावणे, लंगडी, गोळाफेक, थाळीफेक, लांब उडी, कबड्डी, रस्सीखेच आणि बुद्धिबळ अशा विविध क्रीडा प्रकारांमध्ये विद्यार्थ्यांनी आपले कौशल्य पणाला लावले.

धावण्याच्या स्पर्धेत वेगासाठी रंगलेली चुरस, कबड्डीच्या मैदानावर दिसलेली चपळाई, रस्सीखेचमध्ये संघभावनेची झालेली परीक्षा, तर लांब उडी व गोळाफेकीत विद्यार्थ्यांनी दाखवलेली ताकद यामुळे स्पर्धांना चांगलीच रंगत आली. बुद्धिबळाच्या पटावर मात्र विद्यार्थ्यांनी शांतपणे डावपेच आखत आपली बौद्धिक क्षमता सिद्ध केली.

खेळात विजय मिळविण्यासाठी विद्यार्थ्यांनी केलेले प्रयत्न, पराभवानंतरही न खचता पुन्हा जोमाने सहभागी होण्याची त्यांची वृत्ती आणि सहकाऱ्यांना दिलेले प्रोत्साहन यामुळे स्पर्धेतील खिलाडूवृत्ती प्रकर्षाने जाणवली.

नेटके नियोजन; शिक्षकांची महत्त्वाची भूमिका

स्पर्धेचे तालुका क्रीडा समन्वयक योगेश जाधव आणि केंद्र क्रीडा समन्वयक गणेश पोटे यांनी नेटके नियोजन केले. स्पर्धा सुरळीत पार पाडण्यासाठी विविध जबाबदाऱ्या शिक्षकांनी काटेकोरपणे पार पाडल्या.

गणेश पडवळ, मंगेश मोकाशी, संध्या ताकवले आणि निलम साळुंखे यांनी पंच म्हणून जबाबदारी सांभाळली. तर सचिन मिसाळ, शंकरराव खाडे, नवनाथ पाटील आणि माधव शिंदे यांनी गुणलेखनाची जबाबदारी पार पाडली.

पालक व ग्रामस्थांचीही मोठी उपस्थिती

विद्यार्थ्यांच्या खेळाचा आनंद घेण्यासाठी पालकांसह सौदरीतील ग्रामस्थांनी मोठी गर्दी केली होती. आपल्या मुला-मुलींच्या कामगिरीला प्रोत्साहन देण्यासाठी पालक मैदानावर उपस्थित राहिल्याने विद्यार्थ्यांचा उत्साह आणखी वाढला.

मैदानावर धावणारे विद्यार्थी, आपल्या संघासाठी घोषणा देणारे सहकारी आणि प्रत्येक सामन्यानंतर उमटणारा जल्लोष यामुळे संपूर्ण वातावरण क्रीडामय झाले होते. विद्यार्थ्यांच्या चेहऱ्यावर दिसणारा आनंद आणि उत्साह पाहून उपस्थित पालक, शिक्षक व ग्रामस्थांनी समाधान व्यक्त केले.

विजयी विद्यार्थ्यांचे अभिनंदन

विविध क्रीडा प्रकारांत उल्लेखनीय कामगिरी करून विजयी ठरलेल्या विद्यार्थ्यांचे उपस्थित मान्यवर व शिक्षकांनी अभिनंदन केले. केंद्रस्तरावर यश मिळविणाऱ्या विद्यार्थ्यांना पुढील स्तरावरील स्पर्धांसाठी शुभेच्छा देण्यात आल्या.

खेळातून शिस्त, आत्मविश्वास, संघभावना आणि जिद्द निर्माण होते. येरणे केंद्रातील या क्रीडा स्पर्धांनी विद्यार्थ्यांना केवळ विजय-पराजयाचा अनुभव न देता खेळाडूवृत्तीचा संस्कारही दिला, अशी भावना यावेळी उपस्थितांनी व्यक्त केली.