महाबळेश्वर–पाचगणी बंदचा सरकारवर परिणाम; मंत्रालयात उच्चस्तरीय बैठक, सुरूर–पोलादपूर रस्ता ३० एप्रिलपूर्वी पूर्ण करण्याचे आश्वासनl

महाबळेश्वर–पाचगणी बंदचा सरकारवर परिणाम; मंत्रालयात उच्चस्तरीय बैठक, सुरूर–पोलादपूर रस्ता ३० एप्रिलपूर्वी पूर्ण करण्याचे आश्वासन

✍️मिलिंद काळे

महाबळेश्वर प्रतिनिधी:

 महाबळेश्वर–पाचगणी येथे नागरिकांनी पुकारलेल्या बंदच्या पार्श्वभूमीवर सुरूर–पोलादपूर राष्ट्रीय महामार्गावरील रखडलेली कामे आणि रस्त्याची अत्यंत खराब झालेली अवस्था याबाबत आज मंत्रालयात उच्चस्तरीय बैठक पार पडली. सार्वजनिक बांधकाम मंत्री Shivendraraje Bhosale आणि मदत व पुनर्वसन मंत्री Makarand Patil यांच्या प्रमुख उपस्थितीत झालेल्या या बैठकीत रस्त्याच्या कामांचा सविस्तर आढावा घेण्यात आला.

सुरूर–पोलादपूर हा मार्ग राज्यातील अत्यंत महत्त्वाच्या पर्यटन मार्गांपैकी एक असून या मार्गावरून दररोज हजारो पर्यटक तसेच स्थानिक नागरिक प्रवास करतात. मात्र गेल्या काही महिन्यांपासून रस्त्याची अवस्था अत्यंत बिकट झाल्याने वाहनचालकांना मोठा त्रास सहन करावा
लागत आहे. अनेक ठिकाणी मोठमोठे खड्डे पडले असून काही ठिकाणी कामे अर्धवट अवस्थेत असल्याने वाहतुकीस अडथळे निर्माण होत आहेत. या समस्यांमुळे महाबळेश्वर–पाचगणी परिसरातील नागरिकांमध्ये तीव्र नाराजी निर्माण झाली असून त्यातूनच बंदची हाक देण्यात आली होती.

बैठकीदरम्यान महाबळेश्वर नगरपालिकेचे विद्यमान नगराध्यक्ष सुनील शिंदे यांनी महाबळेश्वर–पाचगणी मार्गाची गंभीर स्थिती ठामपणे मांडली. पर्यटन हंगामाच्या पार्श्वभूमीवर हा मार्ग तातडीने दुरुस्त करणे अत्यावश्यक असल्याचे त्यांनी सांगितले. रस्त्यावर पडलेले मोठे खड्डे, काही ठिकाणी संथ गतीने सुरू असलेली कामे आणि अर्धवट राहिलेली बांधकामे यामुळे वाहनचालकांना मोठ्या अडचणींना सामोरे जावे लागत असल्याचे त्यांनी बैठकीत निदर्शनास आणून दिले. अनेकदा या कारणामुळे वाहतूक कोंडीही निर्माण होत असल्याचेही त्यांनी स्पष्ट केले.

महाबळेश्वर आणि पाचगणी ही राज्यातील प्रमुख पर्यटनस्थळे असल्यामुळे वर्षभर येथे मोठ्या प्रमाणावर पर्यटकांची वर्दळ असते. या दोन्ही शहरांना जोडणारा हा मार्ग पर्यटन व्यवसायासाठी तसेच स्थानिक व्यापारासाठी अत्यंत महत्त्वाचा मानला जातो. रस्त्याची अवस्था अशीच राहिल्यास पर्यटकांमध्ये नाराजी वाढून पर्यटन व्यवसायावर विपरीत परिणाम होऊ शकतो, अशी चिंता बैठकीत व्यक्त करण्यात आली.

या पार्श्वभूमीवर संबंधित ठेकेदारांना कामात तातडीने गती आणण्याचे निर्देश देण्यात आले. बैठकीत ठेकेदारांनी मंत्रीमहोदयांसमोर सुरूर ते वाई हा रस्ता ३० एप्रिल २०२६ पूर्वी पूर्ण करण्याचे ठोस आश्वासन दिले. तसेच महाबळेश्वर–पाचगणी मार्गावरील खराब झालेले भाग तातडीने दुरुस्त करून पॅचवर्कच्या माध्यमातून रस्ता वाहतुकीसाठी सुरक्षित व सुरळीत करण्यात येईल, असेही स्पष्ट करण्यात आले.

बैठकीदरम्यान मंत्रीमहोदयांनी संबंधित विभागाच्या अधिकाऱ्यांना कामाची प्रगती नियमितपणे तपासण्याच्या सूचना दिल्या. रस्त्यांच्या कामात कोणताही हलगर्जीपणा किंवा विलंब सहन केला जाणार नाही, असे स्पष्ट करत नागरिकांना चांगले आणि सुरक्षित रस्ते उपलब्ध करून देणे ही शासनाची प्राथमिकता असल्याचे त्यांनी सांगितले.

या बैठकीस महाबळेश्वर नगरपालिकेचे नगराध्यक्ष सुनील शिंदे, पाचगणी नगर परिषदेचे नगराध्यक्ष दिलीप बगाडे, दोन्ही नगरपरिषदांचे नगरसेवक, मुख्याधिकारी, संबंधित विभागाचे वरिष्ठ अधिकारी तसेच रस्त्याचे ठेकेदार उपस्थित होते. सर्वांनी मिळून या प्रश्नावर सविस्तर चर्चा करून कामे तातडीने पूर्ण करण्याबाबत सकारात्मक भूमिका घेतली.

यावेळी नगराध्यक्ष सुनील शिंदे म्हणाले की, “महाबळेश्वर–पाचगणी हा राज्यातील अत्यंत महत्त्वाचा पर्यटन मार्ग आहे. या रस्त्याची दुरवस्था नागरिकांसह पर्यटकांसाठी मोठी समस्या ठरत होती. मंत्रालयात झालेल्या बैठकीत हा प्रश्न ठामपणे मांडण्यात आला असून संबंधित विभाग आणि ठेकेदारांनी कामांना गती देण्याचे आश्वासन दिले आहे. लवकरच रस्त्याची दुरुस्ती पूर्ण होऊन नागरिकांना आणि पर्यटकांना दिलासा मिळेल.”

या बैठकीनंतर सुरूर–वाई तसेच महाबळेश्वर–पाचगणी मार्गावरील रखडलेली कामे आता वेगाने पूर्ण होण्याची अपेक्षा व्यक्त करण्यात येत आहे. रस्त्यांची दुरुस्ती वेळेत पूर्ण झाल्यास स्थानिक नागरिकांसह पर्यटकांना मोठा दिलासा मिळणार असून महाबळेश्वर–पाचगणी परिसरातील पर्यटन व्यवसायालाही मोठी चालना मिळेल, अशी आशा व्यक्त केली जात आहे.