संकटात धावणाऱ्या ‘जीवनदूतां’चा सन्मान! प्रतापगड रेस्क्यू टीमचा रायगड पोलिसांच्या रस्ता सुरक्षा अभियानात गौरव; सेवाभाव आणि धाडसाची दखल

संकटात धावणाऱ्या ‘जीवनदूतां’चा सन्मान!

प्रतापगड रेस्क्यू टीमचा रायगड पोलिसांच्या रस्ता सुरक्षा अभियानात गौरव; सेवाभाव आणि धाडसाची दखल

प्रतापगड प्रतिनिधी :

अपघातग्रस्तांना तातडीने मदत करणे, संकटात सापडलेल्या नागरिकांचे प्राण वाचवणे आणि आपत्कालीन परिस्थितीत कोणत्याही क्षणी मदतीसाठी धावून जाणाऱ्या प्रतापगड रेस्क्यू टीमच्या सेवाभावी कार्याची दखल घेत त्यांचा ‘जीवनदूत’ म्हणून सन्मान करण्यात आला. रायगड पोलिसांच्या वतीने आयोजित करण्यात आलेल्या रस्ता सुरक्षा अभियानांतर्गत झालेल्या जीवनदूत सन्मान सोहळ्यात हा गौरव करण्यात आला.

अपघाताच्या घटना घडल्यानंतर घटनास्थळी पोहोचून जखमींना मदत करणे, त्यांना सुरक्षितपणे बाहेर काढणे, आवश्यकतेनुसार वैद्यकीय उपचारासाठी रुग्णालयात दाखल करण्यासाठी सहकार्य करणे, तसेच विविध आपत्कालीन परिस्थितींमध्ये नागरिकांच्या मदतीला धावून जाणे, अशी प्रतापगड रेस्क्यू टीमची भूमिका राहिली आहे. अनेक संकटाच्या प्रसंगी स्वतःच्या सुरक्षिततेची पर्वा न करता टीमने केलेल्या मदतीमुळे नागरिकांना मोठा दिलासा मिळाला आहे.

या उल्लेखनीय कार्याची पावती म्हणून रायगड पोलिसांच्या रस्ता सुरक्षा अभियानात प्रतापगड रेस्क्यू टीमचा ‘जीवनदूत’ सन्मान करण्यात आला. या गौरवामुळे प्रतापगड परिसरातील सामाजिक व सेवाभावी क्षेत्रातून टीमचे कौतुक होत आहे.

या सन्मान सोहळ्यास रायगड जिल्ह्याचे पालकमंत्री भरतशेठ गोगावले, रायगड जिल्हाधिकारी किसन जावळे, रायगड जिल्हा परिषदेच्या सीईओ नेहा भोसले, अलिबागच्या उपनगराध्यक्ष मानसी म्हात्रे तसेच रायगड जिल्हा पोलीस अधीक्षक आंचल दलाल यांची प्रमुख उपस्थिती होती.

रस्ता सुरक्षा ही केवळ प्रशासनाची जबाबदारी नसून नागरिक, स्वयंसेवी संस्था आणि सामाजिक कार्यकर्त्यांच्या सहभागातूनच ती अधिक प्रभावी होऊ शकते. अपघातानंतरचा सुरुवातीचा काळ जखमी व्यक्तीसाठी अत्यंत महत्त्वाचा असतो. अशा वेळी तत्परतेने घटनास्थळी पोहोचून मदतीचा हात देणाऱ्या रेस्क्यू पथकांचे योगदान निश्चितच मोलाचे ठरते.

‘जीवनदूत’ हा सन्मान प्रतापगड रेस्क्यू टीमपुरता मर्यादित नसून, संकटाच्या वेळी स्वतःचा जीव धोक्यात घालून इतरांचे प्राण वाचविणाऱ्या प्रत्येक रेस्क्यू योद्ध्याच्या कार्याचा गौरव आहे, अशी भावना यावेळी व्यक्त करण्यात आली.

प्रतापगड रेस्क्यू टीमच्या या सन्मानामुळे परिसरातील नागरिकांमध्येही अभिमानाची भावना निर्माण झाली असून, सेवा, सुरक्षा आणि समर्पणाचा आदर्श पुढे नेणाऱ्या या टीमच्या कार्याला मिळालेली ही शाबासकी त्यांच्या सामाजिक बांधिलकीला आणखी बळ देणारी ठरणार आहे.