रस्ता नाही, तरी प्रशासन पोहोचले बांधावर!; घोणसपूरच्या दुर्गम डोंगरदऱ्यांत ६ किमी पायपीट करत भात-नाचणीचे पंचनामे

रस्ता नाही, तरी प्रशासन पोहोचले बांधावर!; घोणसपूरच्या दुर्गम डोंगरदऱ्यांत ६ किमी पायपीट करत भात-नाचणीचे पंचनामे

कृषी व महसूल विभागाच्या पथकाची खडतर वाटचाल; नुकसानीच्या पाहणीनंतर शेतकऱ्यांना आता नुकसानभरपाईची प्रतीक्षा

महाबळेश्वर प्रतिनिधी :

दुर्गम भागातील शेतकऱ्यांच्या अडचणींची जाणीव ठेवत प्रशासनाने प्रत्यक्ष शेताच्या बांधावर पोहोचून नुकसानीची पाहणी केली. महाबळेश्वर तालुक्यातील अत्यंत दुर्गम व डोंगराळ घोणसपूर गावात भात व नाचणी पिकांचे नुकसान झाल्याने कृषी व महसूल विभागाच्या पथकाने तब्बल ५ ते ६ किलोमीटर डोंगरदऱ्यांतून पायपीट करत शेतकऱ्यांच्या बांधावर पोहोचून पंचनामे पूर्ण केले.

चालू हंगामात पावसाच्या अनियमिततेमुळे तसेच दुष्काळसदृश परिस्थितीमुळे तालुक्यातील भात आणि नाचणी पिकांना मोठा फटका बसला आहे. घोणसपूर हे भौगोलिकदृष्ट्या अत्यंत दुर्गम गाव असून, गावात पोहोचण्यासाठी योग्य वाहतूक व्यवस्था किंवा पक्का रस्ता उपलब्ध नसल्याने प्रशासनासमोर नुकसानीची पाहणी करण्याचे आव्हान होते. मात्र, हे आव्हान स्वीकारत संबंधित अधिकारी प्रत्यक्ष शेतकऱ्यांच्या शेतापर्यंत पोहोचले.

डोंगरदऱ्यांतून पायपीट करत अधिकारी थेट शेतात

नैसर्गिक आपत्ती आणि दुष्काळजन्य परिस्थितीमुळे नुकसान झालेल्या पिकांची वस्तुनिष्ठ नोंद व्हावी, यासाठी कृषी व महसूल विभागाच्या पथकाने प्रत्यक्ष शेतात जाऊन पाहणी केली. कृषी अधिकारी श्री. हांगे अनंत, ग्रामपंचायत अधिकारी मंगेश मोरमरे आणि ग्राम महसूल अधिकारी भोसले मॅडम यांनी शेतकऱ्यांच्या बांधावर जाऊन उभ्या पिकांची पाहणी केली.

पिकांची स्थिती, झालेल्या नुकसानीचे स्वरूप आणि बाधित क्षेत्र याची पाहणी करून पंचनामे नोंदविण्यात आले. दुर्गम भागातील शेतकऱ्यांपर्यंत पोहोचण्यासाठी अधिकाऱ्यांनी केलेल्या या खडतर पायपिटीचे ग्रामस्थांनी स्वागत केले.

ग्रामस्थांची उपस्थिती; पंचनाम्याची प्रक्रिया पूर्ण

पंचनाम्याच्या वेळी घोणसपूर गावचे उपसरपंच तुषार जंगम, पोलीस पाटील सुरज जंगम यांच्यासह बाधित शेतकरी मोठ्या संख्येने उपस्थित होते. प्रशासनाच्या पथकाने प्रत्यक्ष शेतात जाऊन नुकसानीची पाहणी केल्याने शेतकऱ्यांनी समाधान व्यक्त केले.

दुर्गम भौगोलिक परिस्थितीमुळे प्रशासनापर्यंत आपली व्यथा पोहोचविणे आणि नुकसानीची प्रत्यक्ष पाहणी करून घेणे हे येथील शेतकऱ्यांसाठी आव्हानात्मक ठरते. अशा परिस्थितीत अधिकारी बांधावर पोहोचल्याने शेतकऱ्यांना दिलासा मिळाला आहे.

भात-नाचणीवरच कुटुंबांचा उदरनिर्वाह

घोणसपूर परिसरातील अनेक शेतकऱ्यांचे आर्थिक गणित भात आणि नाचणी या पिकांवर अवलंबून आहे. यंदा पिकांचे मोठे नुकसान झाल्याने शेतकऱ्यांसमोर आर्थिक संकट निर्माण झाले आहे. शेतीचे उत्पन्न घटल्याने पुढील हंगामाची तयारी, कुटुंबाचा खर्च आणि दैनंदिन गरजा भागविण्याचे आव्हान शेतकऱ्यांसमोर आहे.

प्रशासनाने पंचनाम्यांची प्रक्रिया पूर्ण केल्याने आता शासनाकडून नुकसानभरपाई कधी मिळणार, याकडे बाधित शेतकऱ्यांचे लक्ष लागले आहे.

‘पंचनामे झाले, आता मदतही लवकर मिळावी’

प्रशासनाने दुर्गम भागात येऊन नुकसानीचे पंचनामे पूर्ण केल्याबद्दल शेतकऱ्यांनी समाधान व्यक्त केले. मात्र, पंचनाम्यानंतर नुकसानभरपाईची प्रक्रिया वेगाने पूर्ण करून आर्थिक मदत लवकर उपलब्ध करून द्यावी, अशी मागणी उपसरपंच तुषार जंगम आणि स्थानिक शेतकऱ्यांनी केली आहे.

दुर्गम घोणसपूरमध्ये प्रशासनाच्या पथकाने ६ किलोमीटरची डोंगरदऱ्यांतील खडतर वाट पार करत केलेली पाहणी पूर्ण झाली असली, तरी शेतकऱ्यांच्या नजरा आता शासनाच्या नुकसानभरपाईकडे लागल्या आहेत.