जिल्हा परिषदेचे आदर्श शिक्षक पुरस्कार जाहीर; सातारा जिल्ह्यातील २९ शिक्षकांची गौरवासाठी निवड

जिल्हा परिषदेचे आदर्श शिक्षक पुरस्कार जाहीर; सातारा जिल्ह्यातील २९ शिक्षकांची गौरवासाठी निवड

सातारा प्रतिनिधी : 

सातारा जिल्हा परिषदेच्या शिक्षण विभागाच्या वतीने सन २०२६-२७ साठी देण्यात येणाऱ्या जिल्हा आदर्श शिक्षक पुरस्कारांची घोषणा करण्यात आली आहे. जिल्हा परिषद अध्यक्षा डॉ. प्रिया शिंदे यांच्या अध्यक्षतेखाली झालेल्या बैठकीत प्राप्त प्रस्तावांचे मूल्यमापन करून विविध निकषांच्या आधारे पात्र ठरलेल्या २९ शिक्षकांची आदर्श शिक्षक पुरस्कारासाठी निवड करण्यात आली.

ग्रामीण भागातील विद्यार्थ्यांना गुणवत्तापूर्ण शिक्षण देतानाच शैक्षणिक उपक्रम, विद्यार्थ्यांचा सर्वांगीण विकास, नाविन्यपूर्ण अध्यापन पद्धती आणि शाळेच्या विकासासाठी केलेल्या उल्लेखनीय कार्याची दखल या निवडीच्या माध्यमातून घेण्यात आली आहे. त्यामुळे या पुरस्कारासाठी निवड झालेल्या शिक्षकांच्या कार्याचे शैक्षणिक क्षेत्रातून कौतुक होत आहे.

सन २०२६-२७ च्या जिल्हा आदर्श शिक्षक पुरस्कारासाठी निवड झालेल्या शिक्षकांमध्ये लोणंद मुली शाळेच्या मृणाल जाधव, सुरवडीच्या माधुरी सोनवलकर, दहिवडी नंबर १ शाळेचे सागर जाधव, केशर माने, कुमठे नंबर १ शाळेच्या वृषाली घोरपडे, सुभाषनगर शाळेचे विजयकुमार भुजबळ, गणेशस्थळ शाळेच्या माधुरी निकम, सुभाषनगर शाळेच्या वैशाली बागाव, सासूर्वे शाळेचे सागर चव्हाण, पवारवाडी शाळेच्या रुपाली सुतार, लावंघरच्या जयमाला चव्हाण, मांडवे शाळेच्या अनुपमा दाभाडे, काळोशी शाळेच्या रचना पवार, अतित शाळेच्या सारिका डांगे, भाटमरळी शाळेच्या प्रशाली विसापुरे, मोळेश्वर शाळेचे अंकुश केळगणे, डेरेवाडी शाळेच्या सुनीता कामटे, गुढे शाळेच्या वैशाली पवार, कुठरे शाळेच्या शुभांगी गुजर, झाकडे शाळेचे तानाजी पवार, कोळेवाडी शाळेचे संदीप कोरडे, ढेबेवाडी शाळेच्या प्रांजली नलवडे, मुनावळे शाळेचे प्रदीप रवळेकर, उंब्रज मुली शाळेच्या माधुरी जाधव, धारेवाडी शाळा नंबर २ चे राम चाळकापुरे, खोडशी शाळेच्या लता कुंभार, ओझर्डे शाळेच्या सविता क्षीरसागर आणि केंजळ शाळेचे दीपक कासवेद यांचा समावेश आहे.

शिक्षक हा विद्यार्थ्यांच्या जडणघडणीतील महत्त्वाचा घटक असून, बदलत्या शैक्षणिक गरजांनुसार अध्यापनामध्ये विविध प्रयोग करणाऱ्या तसेच विद्यार्थ्यांच्या गुणवत्तावाढीसाठी सातत्याने प्रयत्न करणाऱ्या शिक्षकांचा सन्मान करण्यासाठी आदर्श शिक्षक पुरस्कार दिला जातो. या पुरस्कारामुळे शिक्षकांना आपल्या कार्यात आणखी प्रेरणा मिळण्याबरोबरच जिल्ह्यातील इतर शिक्षकांनाही नाविन्यपूर्ण शैक्षणिक उपक्रम राबविण्यास प्रोत्साहन मिळणार आहे.

आदर्श शिक्षक पुरस्कारासाठी निवड झालेल्या सर्व शिक्षकांचे जिल्हा परिषद अध्यक्षा डॉ. प्रिया शिंदे, उपाध्यक्ष राजू भोसले यांच्यासह जिल्हा परिषदेचे सर्व पदाधिकारी आणि शिक्षण विभागातील अधिकाऱ्यांनी अभिनंदन केले आहे. निवड झालेल्या शिक्षकांच्या कार्याचा गौरव करण्यासाठी पुढील टप्प्यात पुरस्कार वितरण सोहळा आयोजित करण्यात येणार असल्याची माहिती देण्यात आली.

दरम्यान, जिल्ह्यातील विविध भागांत कार्यरत असलेल्या २९ शिक्षकांची या पुरस्कारासाठी झालेली निवड ही त्यांच्या शैक्षणिक योगदानाला मिळालेली पावती मानली जात असून, या शिक्षकांच्या कामामुळे सातारा जिल्ह्याच्या शैक्षणिक क्षेत्राला निश्चितच नवी प्रेरणा मिळणार आहे.