सेलूच्या आधुनिक विकासाला नवी दिशा; सार्वजनिक बांधकाम उपविभागाच्या नूतन इमारतीचे लोकार्पण अंडरग्राउंड ड्रेनेज, गॅस पाइपलाईनसह आधुनिक सुविधांवर भर; सेलूला मराठवाड्यातील सुंदर शहर बनविण्याचा पालकमंत्री मेघना साकोरे-बोर्डीकर यांचा निर्धार

सेलूच्या आधुनिक विकासाला नवी दिशा; सार्वजनिक बांधकाम उपविभागाच्या नूतन इमारतीचे लोकार्पण

अंडरग्राउंड ड्रेनेज, गॅस पाइपलाईनसह आधुनिक सुविधांवर भर; सेलूला मराठवाड्यातील सुंदर शहर बनविण्याचा पालकमंत्री मेघना साकोरे-बोर्डीकर यांचा निर्धार

✍️उत्तम लोखंडे ,

परभणी/सेलू प्रतिनिधी

 सेलू शहराच्या सर्वांगीण, आधुनिक आणि नियोजनबद्ध विकासासाठी शासनाच्या माध्यमातून सर्वतोपरी प्रयत्न केले जातील. शहर स्वच्छ, सुंदर आणि नागरिकांसाठी अधिक सुविधायुक्त बनविण्यासोबतच आधुनिक पायाभूत सुविधा निर्माण करण्यावर विशेष भर दिला जाईल, अशी ग्वाही परभणी जिल्ह्याच्या पालकमंत्री मेघना साकोरे-बोर्डीकर यांनी दिली.

सेलू येथील सार्वजनिक बांधकाम उपविभागाच्या नूतन इमारतीसह शासकीय निवासस्थानाच्या इमारतीचा लोकार्पण सोहळा पालकमंत्री मेघना साकोरे-बोर्डीकर यांच्या हस्ते उत्साहात पार पडला. यावेळी आयोजित कार्यक्रमात त्या बोलत होत्या.

या कार्यक्रमास नगराध्यक्ष मिलिंद सावंत, उपविभागीय अधिकारी शैलेश लाहोटी, तहसीलदार डॉ. शिवाजी मगर, सार्वजनिक बांधकाम विभागाचे कार्यकारी अभियंता धनंजय जाधव यांच्यासह विविध पदाधिकारी, अधिकारी, कर्मचारी आणि नागरिक मोठ्या संख्येने उपस्थित होते.

शहराच्या पायाभूत सुविधांना प्राधान्य

पालकमंत्री मेघना साकोरे-बोर्डीकर म्हणाल्या की, सेलू शहराचा विकास हा केवळ रस्ते आणि इमारतींपुरता मर्यादित न राहता नागरिकांच्या दैनंदिन जीवनाशी संबंधित मूलभूत सुविधांमध्येही सुधारणा होणे आवश्यक आहे. त्यासाठी शहरातील पायाभूत सुविधा मजबूत करण्यावर शासनाचा भर राहणार आहे.

येत्या काळात सेलू शहरात अंडरग्राउंड ड्रेनेज, गॅस पाइपलाईन यांसारखी महत्त्वाची विकासकामे करण्याचा मानस आहे. त्याचबरोबर विविध शासकीय कार्यालयांच्या इमारती आधुनिक, प्रशस्त आणि नागरिकांना आवश्यक सुविधा उपलब्ध करून देणाऱ्या करण्यासाठी प्रयत्न केले जातील, असे त्यांनी सांगितले.

शासकीय कार्यालयांना आधुनिक स्वरूप देणार

शासकीय कार्यालयांमध्ये नागरिकांना अधिक चांगल्या सुविधा मिळाव्यात, यासाठी कार्यालयांचे आधुनिकीकरण करण्याबरोबरच प्रत्येक कार्यालयाला आयएसओ मानांकन मिळावे, या दृष्टीने काम करण्याचे नियोजन असल्याचे पालकमंत्री बोर्डीकर यांनी स्पष्ट केले.

शासकीय यंत्रणा अधिक सक्षम आणि नागरिकाभिमुख करण्यासाठी कार्यालयीन व्यवस्थेत आवश्यक सुधारणा करण्यात येतील. आधुनिक इमारती, आवश्यक सोयी-सुविधा आणि कार्यक्षम प्रशासकीय व्यवस्था यामुळे नागरिकांना शासकीय सेवांचा अधिक सुलभपणे लाभ मिळण्यास मदत होईल, असा विश्वास त्यांनी व्यक्त केला.

देश आणि महाराष्ट्राच्या विकासाला नवी गती

प्रधानमंत्री नरेंद्र मोदी यांच्या नेतृत्वाखाली देश वेगाने विकासाच्या दिशेने वाटचाल करत असून विविध क्षेत्रांत जागतिक दर्जाच्या सुविधा निर्माण केल्या जात आहेत. मुख्यमंत्री देवेंद्र फडणवीस यांच्या नेतृत्वाखाली महाराष्ट्रातही विकासकामांना नवी गती मिळाली आहे.

दळणवळण, आरोग्य, शिक्षण तसेच सार्वजनिक सुविधांची कामे दर्जेदार आणि टिकाऊ पद्धतीने झाली पाहिजेत, हा शासनाचा प्रयत्न आहे. याच धर्तीवर सेलू शहराचाही सर्वांगीण आणि आधुनिक विकास करण्यासाठी आगामी काळात विविध विकासकामांना गती देण्यात येईल, असे पालकमंत्री मेघना साकोरे-बोर्डीकर यांनी सांगितले.

स्वच्छ, सुंदर सेलूसाठी नागरिकांचे सहकार्य आवश्यक

सेलू शहराला मराठवाड्यातील एक सुंदर आणि आदर्श शहर बनविण्यासाठी प्रशासनासोबतच नागरिकांचा सहभाग महत्त्वाचा आहे. केवळ विकासकामे करून शहर सुंदर होत नाही, तर त्या सुविधा आणि परिसराची योग्य देखभाल करणेही आवश्यक असते.

त्यामुळे नागरिकांनी स्वच्छतेला प्राधान्य देऊन शहर कायम स्वच्छ आणि सुंदर ठेवण्यासाठी प्रशासनाला सहकार्य करावे, असे आवाहन पालकमंत्री बोर्डीकर यांनी केले. शासन, प्रशासन आणि नागरिकांनी एकत्रितपणे प्रयत्न केल्यास सेलू शहराच्या विकासाला अधिक व्यापक आणि सकारात्मक दिशा मिळेल, असा विश्वास त्यांनी व्यक्त केला.

सार्वजनिक बांधकाम उपविभागाच्या नूतन इमारतीमुळे विभागाच्या प्रशासकीय कामकाजाला आधुनिक सुविधा मिळणार असून शासकीय निवासस्थानामुळे अधिकारी-कर्मचाऱ्यांच्या निवासाचीही सोय होणार आहे. या दोन्ही इमारतींच्या लोकार्पणामुळे सेलूच्या प्रशासकीय पायाभूत सुविधांमध्ये महत्त्वाची भर पडली आहे.