वालूर ग्रामपंचायतीत ग्रामविकास अधिकाऱ्यांच्या गैरहजेरीचा फटका; ग्रामस्थांमध्ये संताप

वालूर ग्रामपंचायतीत ग्रामविकास अधिकाऱ्यांच्या गैरहजेरीचा फटका; ग्रामस्थांमध्ये संताप

नियमित उपस्थितीअभावी नागरिकांची कामे रखडली; नाल्यांची सफाई, पथदिवे आणि विविध प्रमाणपत्रांच्या समस्यांकडे दुर्लक्ष

✍️उत्तम लोखंडे 

परभणी/सेलू :

सेलू तालुक्यातील सर्वाधिक लोकसंख्या असलेल्या वालूर ग्रामपंचायतीत ग्रामविकास अधिकाऱ्यांच्या कथित अनियमित उपस्थितीमुळे ग्रामस्थांना विविध अडचणींचा सामना करावा लागत असल्याची तक्रार पुढे आली आहे. ग्रामविकास अधिकारी आठ-आठ दिवस ग्रामपंचायत कार्यालयात उपस्थित राहत नसल्याचा आरोप ग्रामस्थांकडून करण्यात येत असून, त्यामुळे नागरिकांची विविध शासकीय कामे रखडत असल्याने ग्रामस्थांमध्ये नाराजीचे वातावरण निर्माण झाले आहे.

वालूर ग्रामपंचायतीमध्ये एकूण १७ ग्रामपंचायत सदस्य आहेत. मोठी लोकसंख्या आणि ग्रामपंचायतीशी संबंधित कामांचा मोठा व्याप असतानाही ग्रामविकास अधिकारी नियमितपणे कार्यालयात उपस्थित नसल्याने नागरिकांना आपल्या कामांसाठी वारंवार ग्रामपंचायत कार्यालयात हेलपाटे मारावे लागत असल्याचे ग्रामस्थांचे म्हणणे आहे.

ग्रामपंचायतीमार्फत मिळणाऱ्या विविध शासकीय योजनांची माहिती व कागदपत्रे, रहिवासी नमुना क्रमांक ८, जन्म दाखला, मृत्यू प्रमाणपत्र तसेच इतर प्रशासकीय कामांसाठी नागरिकांना ग्रामपंचायत कार्यालयात जावे लागते. मात्र संबंधित अधिकारी वेळेवर उपलब्ध नसल्यामुळे अनेक नागरिकांची कामे वेळेत पूर्ण होत नसल्याची तक्रार आहे.

दरम्यान, गावातील मूलभूत सुविधांकडेही दुर्लक्ष होत असल्याचा आरोप ग्रामस्थांनी केला आहे. गावातील नाल्यांची नियमित सफाई होत नसल्यामुळे ठिकठिकाणी नाल्यांचे घाण पाणी रस्त्यावर साचत आहे. यामुळे नागरिकांना दुर्गंधी आणि अस्वच्छतेचा सामना करावा लागत असून, सार्वजनिक आरोग्याचा प्रश्नही निर्माण होण्याची शक्यता आहे.

तसेच गावातील अनेक खांबांवरील पथदिवे बंद असल्याने रात्रीच्या वेळी नागरिकांना ये-जा करताना अडचणींचा सामना करावा लागत आहे. अंधारामुळे विशेषतः महिला, ज्येष्ठ नागरिक आणि विद्यार्थ्यांना त्रास होत असल्याचे ग्रामस्थांचे म्हणणे आहे.

ग्रामपंचायतीच्या माध्यमातून नागरिकांना वेळेवर सेवा उपलब्ध होणे अपेक्षित असताना कार्यालयातील अनियमित उपस्थितीमुळे नागरिकांमध्ये नाराजी वाढत आहे. ग्रामविकास अधिकाऱ्यांनी नियमितपणे कार्यालयात उपस्थित राहून नागरिकांची शासकीय कामे वेळेत पूर्ण करावीत, तसेच गावातील मूलभूत समस्यांकडे तातडीने लक्ष द्यावे, अशी मागणी ग्रामस्थांकडून होत आहे.

या संपूर्ण प्रकाराची संबंधित वरिष्ठ अधिकाऱ्यांनी गांभीर्याने दखल घेऊन ग्रामपंचायत कार्यालयातील उपस्थिती, नागरिकांची प्रलंबित कामे तसेच गावातील मूलभूत सुविधांची वस्तुस्थिती याची चौकशी करावी. चौकशीत अनियमितता आढळल्यास संबंधितांवर योग्य ती कारवाई करावी, अशी मागणी वालूर येथील ग्रामस्थांनी केली आहे.