कासच्या कुशीत साकारली निसर्गाची अद्भुत कलाकृती; ‘मंडप घळ’ नैसर्गिक पूल ठरतोय पर्यटकांचे आकर्षण!

 

कासच्या कुशीत साकारली निसर्गाची अद्भुत कलाकृती; ‘मंडप घळ’ नैसर्गिक पूल ठरतोय पर्यटकांचे आकर्षण!

परदेशातील निसर्गरम्य ठिकाणांची आठवण करून देणाऱ्या ‘मंडप घळी’चे फोटो-व्हिडिओ सोशल मीडियावर व्हायरल; पर्यटन हंगाम सुरू होण्यापूर्वीच पर्यटकांची उत्सुकता वाढली

कास  प्रतिनिधी : 

निसर्गसौंदर्याने जगभरात ओळखल्या जाणाऱ्या कास पठाराच्या परिसरात निसर्गाची आणखी एक अनोखी कलाकृती पर्यटकांचे लक्ष वेधून घेत आहे. कास पठाराच्या परिसरातील संरक्षित वनक्षेत्रात असलेली ‘मंडप घळ’ ही नैसर्गिक खडकांची रचना सध्या पर्यटकांसाठी आकर्षणाचा विषय ठरत आहे. दगडांमध्ये नैसर्गिकरीत्या तयार झालेल्या या कमानीसदृश रचनेला स्थानिक पातळीवर नैसर्गिक पूल किंवा ‘हिडन नॅचरल रॉक ब्रिज’ म्हणूनही ओळखले जाते.

पावसाळ्यात या परिसराचे रूप अधिकच खुलून येते. पाऊस, वारा आणि नैसर्गिक झीज यामुळे खडकांमध्ये तयार झालेल्या या अद्भुत रचनेवर हिरवेगार शेवाळ आणि रानफर्नची चादर पसरते. सभोवतालची दाट हिरवाई, धुक्याची दुलई, ओलसर खडक आणि खोल दरी यामुळे संपूर्ण परिसराला एक वेगळेच निसर्गरम्य रूप प्राप्त होते. त्यामुळे ‘मंडप घळ’ पाहताना परदेशातील काही निसर्गरम्य ठिकाणांची आठवण होते.

सोशल मीडियावर फोटो, व्हिडिओ व्हायरल

मंडप घळीचे आकर्षक फोटो आणि व्हिडिओ सध्या सोशल मीडियावर मोठ्या प्रमाणात व्हायरल होत आहेत. त्यामुळे कास पठाराला भेट देणाऱ्या पर्यटकांमध्ये या नैसर्गिक पुलाबाबत उत्सुकता वाढली असून, या दुर्गम परिसराला भेट देण्यासाठी पर्यटकांचा ओढा वाढण्याची शक्यता आहे. मात्र, निसर्गाच्या या अनोख्या ठिकाणाचे आकर्षण वाढत असतानाच सुरक्षिततेचा प्रश्नही निर्माण झाला आहे.

पर्यटन हंगाम सुरू; मात्र मंडप घळीसाठी अधिकृत परवानगी नाही

कासचा पर्यटन हंगाम १ सप्टेंबरपासून सुरू होणार असल्याने परिसरात पर्यटकांची वर्दळ वाढण्यास सुरुवात झाली आहे. मात्र मंडप घळ परिसरात पर्यटनासाठी सध्या अधिकृत परवानगी देण्यात आलेली नसल्याचे सांगण्यात येत आहे. असे असतानाही काही पर्यटक सुरक्षेच्या नियमांकडे दुर्लक्ष करून थेट नैसर्गिक पुलावर जाऊन फोटो आणि व्हिडिओ काढण्याचा प्रयत्न करत आहेत.

पावसाळ्यात खडकांवर शेवाळ साचल्याने ते अत्यंत निसरडे होतात. तसेच परिसरात खोल दऱ्या आणि अवघड चढ-उतार असल्याने थोडीशीही चूक जीवघेणी ठरू शकते. सोशल मीडियासाठी फोटो किंवा व्हिडिओ काढण्याच्या नादात पर्यटकांनी स्वतःचा जीव धोक्यात घालू नये, अशी अपेक्षा व्यक्त होत आहे.

सुरक्षेसाठी प्रशासनाची नजर

मंडप घळीकडे वाढणारी पर्यटकांची उत्सुकता आणि संभाव्य गर्दी लक्षात घेऊन प्रशासनाकडून सुरक्षेची खबरदारी घेतली जात आहे. परिसरात सुरक्षारक्षक तैनात करण्यात आले असून, पर्यटकांना धोकादायक ठिकाणी जाण्यापासून रोखण्याचे काम केले जात आहे.

वनविभागाकडूनही पर्यटकांना सुरक्षिततेच्या नियमांचे पालन करण्याचे आवाहन करण्यात आले आहे. अधिकृत परवानगी नसलेल्या भागात प्रवेश करू नये, नैसर्गिक पुलावर चढण्याचा किंवा धोकादायक ठिकाणी उभे राहून सेल्फी काढण्याचा प्रयत्न करू नये, असे आवाहन करण्यात येत आहे.

निसर्गाचा ठेवा जपण्याची गरज

कास पठार आणि त्याच्या परिसरातील जैवविविधता अत्यंत संवेदनशील आहे. त्यामुळे मंडप घळीसारख्या नैसर्गिक ठिकाणांकडे पर्यटकांचे लक्ष वेधले जाणे ही पर्यटनाच्या दृष्टीने सकारात्मक बाब असली तरी वाढत्या गर्दीमुळे निसर्गाला धोका निर्माण होऊ नये, याची काळजी घेणेही तितकेच महत्त्वाचे आहे.

पर्यटकांनी प्लास्टिक, कचरा किंवा इतर वस्तू परिसरात टाकू नयेत. खडक, वनस्पती आणि नैसर्गिक रचनेला कोणतीही हानी पोहोचवू नये. स्थानिक प्रशासन आणि वनविभागाच्या सूचनांचे पालन करूनच या परिसराला भेट द्यावी, अशी अपेक्षा व्यक्त होत आहे.

कास पठाराच्या फुलांच्या सौंदर्यासोबतच आता ‘मंडप घळ’ या निसर्गनिर्मित अद्भुत रचनेनेही पर्यटकांचे लक्ष वेधून घेतले आहे. मात्र सोशल मीडियावरील प्रसिद्धीपेक्षा निसर्ग आणि पर्यटकांची सुरक्षितता महत्त्वाची असल्याने अधिकृत परवानगी आणि सुरक्षेच्या नियमांचे पालन करूनच या ठिकाणाचा आनंद घेणे गरजेचे आहे.