महाबळेश्वरात प्रथमच ‘लोकशाहीर अण्णाभाऊ साठे समाज गौरव पुरस्कार’; विविध क्षेत्रांतील कर्तृत्ववानांचा होणार सन्मान

महाबळेश्वरात प्रथमच ‘लोकशाहीर अण्णाभाऊ साठे समाज गौरव पुरस्कार’; विविध क्षेत्रांतील कर्तृत्ववानांचा होणार सन्मान

डेमोक्रॅटिक पार्टी ऑफ इंडिया कामगार आघाडीचा अभिनव उपक्रम; क्रीडा, आरोग्य, समाजसेवा, पर्यावरण, उद्योग, पत्रकारिता आणि सार्वजनिक जीवनातील मान्यवरांचा गौरव

महाबळेश्वर प्रतिनिधी : 

डेमोक्रॅटिक पार्टी ऑफ इंडिया कामगार आघाडीच्या वतीने महाबळेश्वर येथे प्रथमच तालुकास्तरीय ‘लोकशाहीर अण्णाभाऊ साठे समाज गौरव पुरस्कार’ सोहळ्याचे आयोजन करण्यात येणार आहे. येत्या सात ते आठ दिवसांत हा पुरस्कार सोहळा महाबळेश्वर शहरात घेण्यात येणार असून, समाजातील विविध क्षेत्रांत उल्लेखनीय कार्य करणाऱ्या कर्तृत्ववान व्यक्तींचा सन्मान करण्यात येणार आहे.

क्रीडा, आरोग्य, समाजसेवा, पर्यावरण संवर्धन, आपत्कालीन सेवा, उद्योग-व्यवसाय, पत्रकारिता तसेच सार्वजनिक जीवनात उल्लेखनीय योगदान देणाऱ्या व्यक्तींना ‘लोकशाहीर अण्णाभाऊ साठे समाज गौरव पुरस्कार’ प्रदान करण्यात येणार आहे. तसेच समाजाच्या विकासासाठी दीर्घकाळ योगदान देणाऱ्या ज्येष्ठ नगरसेवकांचाही विशेष सन्मान करण्यात येणार असल्याची माहिती डेमोक्रॅटिक पार्टी ऑफ इंडिया कामगार आघाडीचे जिल्हाध्यक्ष ऋषिकेश वायदंडे यांनी दिली.

लोकशाहीर अण्णाभाऊ साठे यांनी आपल्या साहित्य, शाहिरी आणि सामाजिक कार्यातून कष्टकरी, श्रमिक व वंचित समाजाच्या प्रश्नांना प्रभावीपणे वाचा फोडली. त्यांच्या लेखणीतून आणि कार्यातून सामाजिक समता, संघर्ष, स्वाभिमान आणि माणुसकीचा संदेश समाजापर्यंत पोहोचला. त्यांच्या कार्याची आणि विचारांची नव्या पिढीला ओळख व्हावी, तसेच अण्णाभाऊ साठे यांचे आचार-विचार समाजातील प्रत्येक घटकापर्यंत पोहोचावेत, या उद्देशाने हा उपक्रम प्रथमच महाबळेश्वर तालुक्यात राबविण्यात येत असल्याचे वायदंडे यांनी सांगितले.

समाजासाठी विविध क्षेत्रांत निस्वार्थपणे काम करणाऱ्या व्यक्तींच्या कार्याची दखल घेऊन त्यांना प्रोत्साहन देणे, त्यांच्या योगदानाचा गौरव करणे आणि त्यांच्या कार्यातून इतरांना प्रेरणा मिळावी, हा या पुरस्कार सोहळ्याचा प्रमुख उद्देश आहे. विशेषतः सामाजिक, क्रीडा, आरोग्य, पर्यावरण आणि पत्रकारिता क्षेत्रात उल्लेखनीय काम करणाऱ्या व्यक्तींना व्यासपीठ मिळावे, यासाठी या उपक्रमाचे आयोजन करण्यात येत आहे.

या पुरस्कार सोहळ्यास डेमोक्रॅटिक पार्टी ऑफ इंडियाचे राज्यस्तरीय पदाधिकारी, ज्येष्ठ नेते तसेच विविध क्षेत्रांतून येणारे मान्यवर उपस्थित राहणार आहेत. मान्यवरांच्या हस्ते पुरस्कारार्थींचा सन्मान करण्यात येणार असून, कार्यक्रमाला तालुक्यातील नागरिक, सामाजिक कार्यकर्ते, विविध संघटनांचे पदाधिकारी आणि कार्यकर्ते मोठ्या संख्येने उपस्थित राहण्याची अपेक्षा आहे.

महाबळेश्वर तालुक्यात पहिल्यांदाच अशा स्वरूपाचा पुरस्कार सोहळा आयोजित करण्यात येत असल्याने या उपक्रमाबाबत उत्सुकता निर्माण झाली आहे. समाजासाठी योगदान देणाऱ्या व्यक्तींचा सन्मान करतानाच लोकशाहीर अण्णाभाऊ साठे यांचे विचार समाजमनात रुजविण्याचा प्रयत्न या माध्यमातून केला जाणार आहे.

कार्यक्रमाची निश्चित तारीख, स्थळ आणि पुरस्कारार्थींची अंतिम यादी लवकरच जाहीर करण्यात येणार आहे. येत्या सात ते आठ दिवसांत महाबळेश्वर शहरात हा कार्यक्रम घेण्याचे नियोजन असल्याचे जिल्हाध्यक्ष ऋषिकेश वायदंडे यांनी सांगितले.