ओल्या जिन्यावरून पाय घसरला अन् हॉटेल कर्मचाऱ्याचा दुर्दैवी मृत्यू; मेटगुताड येथील घटनागादी आणण्यासाठी जात असताना घडली दुर्घटना; केळघर येथील पांडुरंग चव्हाण यांचा मृत्यू

ओल्या जिन्यावरून पाय घसरला अन् हॉटेल कर्मचाऱ्याचा दुर्दैवी मृत्यू; मेटगुताड येथील घटना

गादी आणण्यासाठी जात असताना घडली दुर्घटना; केळघर येथील पांडुरंग चव्हाण यांचा मृत्यू

महाबळेश्वर प्रतिनिधी

महाबळेश्वर तालुक्यातील मेटगुताड येथे पावसामुळे ओल्या झालेल्या जिन्यावरून पाय घसरून खाली पडल्याने हॉटेल कर्मचाऱ्याचा दुर्दैवी मृत्यू झाल्याची घटना घडली. पांडुरंग उर्फ  कोंडीबा चव्हाण (वय ४३, रा. केळघर, ता. जावळी) असे मृत कर्मचाऱ्याचे नाव आहे. या घटनेमुळे हॉटेल परिसरात तसेच केळघर येथील त्यांच्या कुटुंबीयांमध्ये शोककळा पसरली आहे.

मिळालेल्या माहितीनुसार, पांडुरंग चव्हाण हे मेटगुताड येथील ‘माऊंटन ब्रिज’ हॉटेलमध्ये गेल्या काही वर्षांपासून कामगार म्हणून कार्यरत होते. वीकेंड तसेच सलग सुट्ट्यांमुळे हॉटेलमध्ये पर्यटकांची मोठी गर्दी होती. या पार्श्वभूमीवर ते हॉटेलमधील कामकाजात व्यस्त होते.

दरम्यान, हॉटेलमध्ये गादी आणण्यासाठी जात असताना पावसामुळे जिना ओला झाला होता. त्याच जिन्यावरून जात असताना अचानक त्यांचा पाय घसरला आणि ते जिन्यावरून खाली पडले. या दुर्घटनेत त्यांच्या डोक्याच्या मागील बाजूस गंभीर दुखापत झाली.

अपघातानंतर त्यांना तातडीने उपचारासाठी नेण्याचा प्रयत्न करण्यात आला. मात्र, डोक्याला झालेली गंभीर दुखापत जीवघेणी ठरली आणि त्यांचा दुर्दैवी मृत्यू झाला.

पावसाळ्यात हॉटेल, लॉजिंग तसेच पर्यटनस्थळांवरील जिने, पायऱ्या आणि फरशी ओलसर होऊन घसरडी होण्याचे प्रकार घडतात. त्यामुळे पर्यटकांसह हॉटेलमधील कर्मचारी व कामगारांनी अशा ठिकाणी विशेष खबरदारी घेण्याची गरज या दुर्घटनेमुळे अधोरेखित झाली आहे.

पांडुरंग उर्फ कोंडीबा चव्हाण हे गेल्या काही वर्षांपासून हॉटेलमध्ये काम करून आपल्या कुटुंबाचा उदरनिर्वाह करत होते. कामाच्या ठिकाणीच झालेल्या या दुर्दैवी दुर्घटनेत त्यांचा मृत्यू झाल्याने कुटुंबीयांवर दुःखाचा डोंगर कोसळला आहे.

या घटनेची संबंधित यंत्रणेकडून नोंद घेण्यात आली असून, पुढील कार्यवाही सुरू आहे.