आजोबांची सामाजिक निष्ठा, वडिलांची मेहनत अन् साहिलची जिद्द; डॉक्टर साहिल जाधव यांच्या यशाने जाधव कुटुंबासह समाजाचा गौरव

आजोबांची सामाजिक निष्ठा, वडिलांची मेहनत अन् साहिलची जिद्द; डॉक्टर साहिल जाधव यांच्या यशाने जाधव कुटुंबासह समाजाचा गौरव

तापोळा  प्रतिनिधी :

वलवन येथील डॉ. साहिल सिताराम नारायण जाधव यांनी वैद्यकीय क्षेत्रात यश संपादन करून डॉक्टर होण्याचा मान मिळवल्याबद्दल पंचायत समिती महाबळेश्वरचे उपसभापती संजयराव मोरे यांनी त्यांचे मनःपूर्वक अभिनंदन करून पुढील वाटचालीसाठी शुभेच्छा दिल्या.

डॉ. साहिल जाधव यांच्या या यशामागे त्यांच्या कुटुंबाची सामाजिक बांधिलकी, संस्कार, मेहनत आणि शिक्षणाविषयीची जिद्द यांचा मोठा वाटा असल्याचे संजयराव मोरे यांनी गौरवोद्गार काढताना सांगितले. साहिल यांचे आजोबा नारायण पाटील यांनी १६ गाव समाजाची जबाबदारी अत्यंत प्रामाणिकपणे आणि निष्ठेने सांभाळत सामाजिक कार्याचा आदर्श निर्माण केला होता. समाजाच्या विविध प्रश्नांमध्ये पुढाकार घेत त्यांनी आपली वेगळी ओळख निर्माण केली होती.

आजोबांकडून मिळालेला सामाजिक सेवेचा वारसा आणि सुसंस्कृत विचार पुढे नेत श्री. सिताराम जाधव यांनीही आपल्या कर्तृत्वाने समाजात वेगळे स्थान निर्माण केले. उद्योग-व्यवसाय सांभाळताना मुंबईसारख्या मोठ्या शहरात त्यांनी मेहनत, प्रामाणिकपणा आणि जिद्दीच्या जोरावर आपली ओळख दृढ केली. त्याचबरोबर आपल्या मुलांना उच्च दर्जाचे शिक्षण मिळावे, यासाठी त्यांनी सातत्याने प्रयत्न केले.

त्यांच्या या प्रयत्नांना आणि कुटुंबाच्या संस्कारांना डॉ. साहिल जाधव यांच्या रूपाने यशाचे सुंदर फळ मिळाले आहे. डॉक्टर होण्याचे स्वप्न पूर्ण करत साहिल यांनी वैद्यकीय क्षेत्रात प्रवेश करून आपल्या कुटुंबाचा तसेच समाजाचा नावलौकिक वाढविला आहे. त्यांच्या या यशामुळे जाधव कुटुंबीयांसह नातेवाईक, मित्रपरिवार आणि संपूर्ण समाजामध्ये आनंदाचे वातावरण निर्माण झाले आहे.

संजयराव मोरे यांनी सांगितले की, आजोबांची सामाजिक निष्ठा, वडिलांची कठोर मेहनत आणि कुटुंबाने दिलेले संस्कार डोळ्यांसमोर ठेवून साहिल यांनी मिळविलेले हे यश निश्चितच प्रेरणादायी आहे. ग्रामीण भागातून पुढे येत वैद्यकीय क्षेत्रात यश मिळविणाऱ्या साहिल यांच्या कामगिरीमुळे परिसरातील विद्यार्थ्यांनाही शिक्षण आणि मेहनतीची प्रेरणा मिळेल.

“साहिलच्या या यशाने केवळ जाधव कुटुंबीयांचाच नव्हे, तर संपूर्ण समाजाचा मान उंचावला आहे. भविष्यात त्यांच्या हातून गोरगरीब, गरजू आणि सर्वसामान्य रुग्णांची उत्तमोत्तम सेवा घडावी, तसेच वैद्यकीय क्षेत्रात त्यांनी आपल्या कार्याचा ठसा उमटवावा,” अशी सदिच्छा संजयराव मोरे यांनी व्यक्त केली.

डॉ. साहिल जाधव यांच्या या उल्लेखनीय यशाबद्दल संपूर्ण जाधव कुटुंबाचे मनःपूर्वक अभिनंदन करण्यात येत असून, त्यांच्या भावी वैद्यकीय आणि सामाजिक वाटचालीसाठी सर्व स्तरांतून शुभेच्छांचा वर्षाव होत आहे. त्यांच्या ज्ञानाचा आणि सेवाभावाचा लाभ समाजातील गरजू घटकांना मिळावा, हीच अपेक्षा व्यक्त होत आहे.