धो-धो पावसात जिगरबाज तरुणांची शर्थ; शंभर फूट खोल विहिरीत पडलेल्या म्हशीची सुखरूप सुटका कळमगावातील थरारक बचावकार्य; दोरखंड आणि जेसीबीच्या मदतीने अनेक तासांच्या प्रयत्नांना यश

धो-धो पावसात जिगरबाज तरुणांची शर्थ; शंभर फूट खोल विहिरीत पडलेल्या म्हशीची सुखरूप सुटका

कळमगावातील थरारक बचावकार्य; दोरखंड आणि जेसीबीच्या मदतीने अनेक तासांच्या प्रयत्नांना यश

तळदेव प्रतिनिधी : कळमगाव येथे कठडा नसलेल्या तब्बल शंभर फूट खोल विहिरीत म्हैस पडल्याची घटना दुपारच्या सुमारास घडली. परिसरात मुसळधार पाऊस सुरू असतानाही गावातील जिगरबाज तरुणांनी जीवाची पर्वा न करता बचावकार्य हाती घेतले. अनेक तासांच्या अथक प्रयत्नांनंतर सायंकाळी म्हशीला सुखरूप विहिरीबाहेर काढण्यात यश आले.

मिळालेल्या माहितीनुसार, कळमगाव परिसरात दुपारच्या सुमारास एक म्हैस चुकून कठडा नसलेल्या खोल विहिरीत पडली. विहीर सुमारे शंभर फूट खोल असल्याने म्हशीला बाहेर काढण्याचे मोठे आव्हान बचाव पथकासमोर होते. त्यातच त्यावेळी परिसरात धो-धो पाऊस सुरू असल्याने बचावकार्य आणखी कठीण बनले होते.

घटनेची माहिती मिळताच सह्याद्री ट्रेकर्सचे संजय पारठे सर यांच्या मार्गदर्शनाखाली गावातील तरुण आणि ग्रामस्थ घटनास्थळी दाखल झाले. विक्रम शेलार, किरण चव्हाण, संजय ढेबे, दीपक जाधव, सरपंच ढेबे, कारंडे यांच्यासह ग्रामस्थांनी तातडीने बचावकार्य सुरू केले.

म्हशीला सुरक्षितपणे बाहेर काढण्यासाठी दोरखंडाचा वापर करण्यात आला. तसेच आवश्यक ठिकाणी जेसीबीची मदत घेण्यात आली. विहिरीची खोली, पावसामुळे निर्माण झालेली प्रतिकूल परिस्थिती आणि बचावकार्यादरम्यान असलेला धोका लक्षात घेता प्रत्येक क्षणी मोठी खबरदारी घ्यावी लागत होती. मात्र, तरुणांनी परिस्थितीची पर्वा न करता सलग अनेक तास प्रयत्न सुरू ठेवले.

अखेर त्यांच्या अथक प्रयत्नांना यश आले आणि सायंकाळच्या सुमारास म्हशीला विहिरीतून सुखरूप बाहेर काढण्यात आले. त्यामुळे पशुपालकासह ग्रामस्थांनी सुटकेचा नि:श्वास सोडला.

या बचावकार्यात सहभागी झालेल्या तरुणांनी दाखविलेल्या धाडसाचे, प्रसंगावधानाचे आणि एकजुटीचे ग्रामस्थांकडून कौतुक करण्यात येत आहे. मुसळधार पावसातही मुक्या जीवाचे प्राण वाचवण्यासाठी तरुणांनी केलेले प्रयत्न माणुसकीचे दर्शन घडविणारे ठरले, अशी भावना ग्रामस्थांनी व्यक्त केली.

दरम्यान, कळमगाव परिसरातील अनेक विहिरींना संरक्षक कठडे नसल्यास अशा घटना भविष्यातही घडण्याची शक्यता आहे. विशेषतः पावसाळ्यात विहिरी परिसरात घसरून अपघात होण्याचा धोका वाढतो. त्यामुळे संबंधित प्रशासनाने या घटनेची गांभीर्याने दखल घेऊन कठडा नसलेल्या विहिरींची पाहणी करावी आणि आवश्यक त्या ठिकाणी तातडीने संरक्षक कठडे उभारावेत, अशी मागणी ग्रामस्थांकडून करण्यात आली आहे.

एका मुक्या जीवाचे प्राण वाचविण्यासाठी गावकऱ्यांनी एकजुटीने केलेले हे बचावकार्य कळमगावात कौतुकाचा विषय ठरले आहे.