गोवंश मांसाच्या अवैध वाहतुकीवर सेलू पोलिसांची कारवाई; २.३४ लाखांचा मुद्देमाल जप्त
चार जण ताब्यात; ऑटो रिक्षासह १ क्विंटल ७२ किलो गोवंश मांस जप्त
✍️उत्तम लोखंडे
परभणी/सेलू प्रतिनिधी
गोवंश जनावरांची कत्तल करून त्यांचे मांस अवैधरित्या विक्रीसाठी घेऊन जात असल्याच्या संशयावरून सेलू पोलिसांनी कारवाई करत चार जणांना ताब्यात घेतले. या कारवाईत हाडांसह सुमारे १ क्विंटल ७२ किलो गोवंश मांस आणि वाहतुकीसाठी वापरण्यात आलेली ऑटो रिक्षा असा एकूण २ लाख ३४ हजार ४०० रुपयांचा मुद्देमाल पोलिसांनी जप्त केला आहे.
ही कारवाई २३ ऑगस्ट २०२६ रोजी सकाळी सव्वानऊच्या सुमारास सेलू–देवगाव फाटा मार्गावरील खुपसापाटीजवळ करण्यात आली. पोलिसांना मिळालेल्या माहितीनुसार, एका ऑटो रिक्षातून गोवंश मांसाची अवैध वाहतूक केली जात असल्याचा संशय होता. या माहितीच्या आधारे पोलिसांनी संशयित वाहनाची तपासणी केली.
तपासणीदरम्यान ऑटो रिक्षामध्ये सहा गोण्यांमध्ये हाडांसह सुमारे १ क्विंटल ७२ किलो गोवंश मांस आढळून आले. जप्त करण्यात आलेल्या मांसाची अंदाजे किंमत ३४ हजार ४०० रुपये असल्याचे पोलिसांनी नमूद केले आहे. तसेच वाहतुकीसाठी वापरण्यात आलेली काळ्या-पिवळ्या रंगाची बजाज मॅक्झिमा ऑटो रिक्षा (एमएच २२ एपी ४९२९) अंदाजे दोन लाख रुपये किमतीची असल्याचे सांगण्यात आले. अशाप्रकारे पोलिसांनी एकूण २ लाख ३४ हजार ४०० रुपयांचा मुद्देमाल जप्त केला.
या प्रकरणी पोलीस कर्मचारी सुरेश रखमाजी फुलाते यांच्या फिर्यादीवरून सेलू पोलीस ठाण्यात गुन्हा क्रमांक ४५७/२०२६ दाखल करण्यात आला आहे. भारतीय न्याय संहितेतील कलम ३२५, ३(५) तसेच महाराष्ट्र प्राणी संरक्षण अधिनियमातील संबंधित कलमांनुसार गुन्हा नोंदविण्यात आला आहे.
या प्रकरणात इमामबक्ष मोहम्मद हुसेन कुरेशी (३८), गौस जलील कुरेशी (२५), मुजाहिद जानु कुरेशी (२०) आणि फेरोज खाज्या कुरेशी (४०) या चार जणांना पोलिसांनी ताब्यात घेतले आहे.
पोलीस निरीक्षक अरुण नागरे यांच्या आदेशानुसार या प्रकरणाचा पुढील तपास पोलीस हवालदार ज्ञानेश्वर जानगर करीत आहेत. जप्त करण्यात आलेले मांस, वाहन तसेच या प्रकरणातील इतर बाबींच्या अनुषंगाने पोलिसांकडून पुढील तपास सुरू आहे.
Comments
Post a Comment