स्वातंत्र्य दिनी गोगवे आश्रमशाळेतील विद्यार्थ्यांना मदतीचा हात; मोफत दप्तर व ब्लँकेटचे वाटप

 

स्वातंत्र्य दिनी गोगवे आश्रमशाळेतील विद्यार्थ्यांना मदतीचा हात; मोफत दप्तर व ब्लँकेटचे वाटप

तापोळा प्रतिनिधी : स्वातंत्र्य दिनाचे औचित्य साधत शासकीय माध्यमिक आश्रमशाळा, गोगवे येथे विद्यार्थ्यांसाठी सामाजिक बांधिलकी जपत मोफत दप्तर व ब्लँकेट वाटपाचा उपक्रम उत्साहात पार पडला. जिल्हा परिषद सदस्य मा. अजित दादा संकपाळ यांच्या पुढाकारातून प्रत्येक विद्यार्थ्याला मोफत दप्तर व ब्लँकेट देण्यात आले.

या उपक्रमामुळे विद्यार्थ्यांना शैक्षणिक साहित्याची मदत मिळण्याबरोबरच त्यांच्या दैनंदिन गरजांचीही पूर्तता होणार आहे. स्वातंत्र्य दिनाच्या निमित्ताने विद्यार्थ्यांच्या चेहऱ्यावर आनंद फुलवणारा हा उपक्रम उपस्थितांसाठी विशेष ठरला.

या कार्यक्रमाला विशाल दादा संकपाळ, आनंददादा धनावडे, लक्ष्मण दादा कदम, सचिन दादा कदम, अंकुश दादा कदम, मुख्याध्यापक बरकडे सर तसेच शाळेतील शिक्षक, कर्मचारी आणि इतर मान्यवर उपस्थित होते. मान्यवरांच्या उपस्थितीत विद्यार्थ्यांना दप्तर व ब्लँकेटचे वाटप करण्यात आले.

विद्यार्थ्यांच्या शैक्षणिक प्रगतीला प्रोत्साहन देण्यासाठी तसेच गरजू विद्यार्थ्यांना आवश्यक सुविधा उपलब्ध करून देण्यासाठी अशा सामाजिक उपक्रमांची गरज असल्याचे यावेळी उपस्थितांनी व्यक्त केले. शिक्षणाच्या प्रवाहात विद्यार्थ्यांना कोणत्याही अडचणी येऊ नयेत, यासाठी समाजातील विविध घटकांनी पुढाकार घेणे महत्त्वाचे असल्याचेही सांगण्यात आले.

विशेष म्हणजे सामाजिक कार्यकर्ते व पत्रकार सचिनजी कदम यांच्या प्रयत्नातून हा उपक्रम शक्य झाला. विद्यार्थ्यांच्या गरजा लक्षात घेऊन स्वातंत्र्य दिनाच्या निमित्ताने त्यांना आवश्यक साहित्य उपलब्ध करून देण्यात आल्याने पालक व विद्यार्थ्यांकडून या उपक्रमाचे कौतुक करण्यात आले.

स्वातंत्र्य दिन हा केवळ ध्वजारोहण आणि देशभक्तीपर कार्यक्रमांपुरता मर्यादित न राहता समाजातील गरजू घटकांना मदतीचा हात देण्याचा दिवस ठरावा, असा संदेश या उपक्रमातून देण्यात आला. विद्यार्थ्यांच्या चेहऱ्यावर उमटलेला आनंद आणि उपस्थित मान्यवरांचा उत्स्फूर्त सहभाग यामुळे गोगवे आश्रमशाळेतील हा उपक्रम संस्मरणीय ठरला.