शिष्यवृत्ती परीक्षेत आरफळच्या चार विद्यार्थ्यांची दमदार कामगिरी; वरद दीक्षित प्रथम, गुणवंतांचा मान्यवरांच्या हस्ते सत्कार

शिष्यवृत्ती परीक्षेत आरफळच्या चार विद्यार्थ्यांची दमदार कामगिरी; वरद दीक्षित प्रथम, गुणवंतांचा मान्यवरांच्या हस्ते सत्कार

आरफळ (ता. जि. सातारा) : येथील जिल्हा परिषद प्राथमिक शाळेच्या इयत्ता चौथीतील चार विद्यार्थ्यांनी शिष्यवृत्ती परीक्षेत उल्लेखनीय यश संपादन करत शाळेसह आरफळ गावाच्या शैक्षणिक लौकिकात भर घातली आहे. शिष्यवृत्ती परीक्षेच्या अंतरिम निकालात शाळेतील चार विद्यार्थी पात्र ठरले असून, त्यांच्या या यशाबद्दल शाळा व्यवस्थापन समिती, शिक्षकवृंद, पालक आणि ग्रामस्थांकडून त्यांचे कौतुक करण्यात येत आहे.

या परीक्षेत वरद दीक्षित याने ३०० पैकी २२० गुण मिळवत शाळेत प्रथम क्रमांक पटकावला. त्यापाठोपाठ ईश्वरी पवार हिने २१४ गुण, सानवी पवार हिने १८८ गुण, तर आरोही पवार हिने १३८ गुण मिळवत शिष्यवृत्ती परीक्षेत पात्रता मिळवली. ग्रामीण भागातील जिल्हा परिषद शाळेत शिक्षण घेत असताना या विद्यार्थ्यांनी मिळवलेले यश विशेष कौतुकास्पद मानले जात आहे.

या यशस्वी विद्यार्थ्यांचा शाळा व्यवस्थापन समिती आणि समस्त ग्रामस्थांच्या वतीने विशेष सत्कार करण्यात आला. विद्यार्थ्यांच्या मेहनतीचे कौतुक करत त्यांना पुढील शैक्षणिक वाटचालीसाठी शुभेच्छा देण्यात आल्या. चारही विद्यार्थ्यांनी मिळवलेल्या यशामुळे शाळेच्या शैक्षणिक गुणवत्तेवर पुन्हा एकदा शिक्कामोर्तब झाले आहे.

विद्यार्थ्यांना शिष्यवृत्ती परीक्षेसाठी मार्गदर्शन करणाऱ्या श्रीमती लीना पोटे मॅडम यांनी विद्यार्थ्यांचे अभिनंदन केले. केवळ परीक्षेतील यशापुरते मर्यादित न राहता विद्यार्थ्यांमध्ये वाचनाची आवड निर्माण व्हावी, त्यांच्या व्यक्तिमत्त्वाचा विकास व्हावा आणि भविष्यातील शिक्षणासाठी त्यांना प्रेरणा मिळावी, या उद्देशाने त्यांनी यशस्वी विद्यार्थ्यांना प्रेरणादायी पुस्तके भेट दिली.

यावेळी शाळेचे मुख्याध्यापक श्री. महादेव यादव सर यांनी चारही विद्यार्थ्यांचे विशेष अभिनंदन केले. विद्यार्थ्यांनी सातत्याने केलेली मेहनत, शिक्षकांचे मार्गदर्शन तसेच पालकांनी दिलेले पाठबळ यामुळे हे यश मिळाल्याचे त्यांनी नमूद केले. विद्यार्थ्यांनी भविष्यातही अशाच प्रकारे सातत्यपूर्ण प्रयत्न करून शाळेचे आणि गावाचे नाव उज्ज्वल करावे, अशी अपेक्षा त्यांनी व्यक्त केली.

या कौतुक सोहळ्यास शाळा व्यवस्थापन समितीचे अध्यक्ष, उपाध्यक्ष, सर्व सदस्य, शिक्षकवृंद, पालक तसेच आरफळ गावातील ग्रामस्थ मोठ्या संख्येने उपस्थित होते. विद्यार्थ्यांच्या यशामुळे शाळेच्या परिसरात आनंदाचे वातावरण निर्माण झाले असून, गुणवंत विद्यार्थ्यांवर ग्रामस्थांकडून अभिनंदनाचा वर्षाव होत आहे.

ग्रामीण भागातील विद्यार्थ्यांनी मिळवलेले हे यश इतर विद्यार्थ्यांसाठीही प्रेरणादायी ठरले असून, जिद्द, मेहनत आणि योग्य मार्गदर्शनाच्या जोरावर कोणतेही शैक्षणिक ध्येय गाठता येते, हे आरफळच्या या चार विद्यार्थ्यांनी दाखवून दिले आहे.