पार परिसरात रानगव्यांचा धुमाकूळ; भातशेतीचे मोठे नुकसान, शेतकरी हवालदिल बबन शंकर सपकाळ, शिवाजी राजापुरे व तुकाराम सपकाळ यांच्या शेतात रानगव्यांचा हैदोस; वनविभागाने तातडीने उपाययोजना करण्याची मागणी

पार परिसरात रानगव्यांचा धुमाकूळ; भातशेतीचे मोठे नुकसान, शेतकरी हवालदिल

बबन शंकर सपकाळ, शिवाजी राजापुरे  व तुकाराम सपकाळ यांच्या शेतात रानगव्यांचा हैदोस; वनविभागाने तातडीने उपाययोजना करण्याची मागणी

प्रतापगड प्रतिनिधी :

महाबळेश्वर तालुक्यातील पार परिसरात रानगव्यांनी पुन्हा एकदा धुमाकूळ घातला असून, शेतकऱ्यांच्या भातशेतीचे मोठ्या प्रमाणात नुकसान झाले आहे. रानगव्यांच्या कळपाने शेतामध्ये घुसून उभ्या भातपिकाची नासधूस केल्याने शेतकरी आर्थिक संकटात सापडले आहेत.

पार परिसरातील शेतकरी बबन शंकर सपकाळ, शिवाजी राजापुरे आणि तुकाराम सपकाळ  यांच्या शेतात रानगव्यांनी घुसून भातशेतीचे मोठे नुकसान केले. पावसाळ्यात मोठ्या मेहनतीने तयार केलेले भातपीक ऐन वाढीच्या अवस्थेत असताना रानगव्यांनी शेतात प्रवेश करून पिकाची तुडवण केली. त्यामुळे शेतकऱ्यांच्या हातातोंडाशी आलेले पीक धोक्यात आले आहे.

भातशेतीवरच अनेक शेतकरी कुटुंबांचा उदरनिर्वाह अवलंबून असतो. शेतीसाठी लागणारे बियाणे, खते, मजुरी आणि इतर खर्च करून शेतकरी मोठ्या कष्टाने पीक उभे करतात. मात्र, वन्यप्राण्यांकडून वारंवार होणाऱ्या नुकसानीमुळे शेतकऱ्यांच्या मेहनतीवर पाणी फिरत आहे. रानगव्यांचा वाढता वावर हा परिसरातील शेतकऱ्यांसाठी चिंतेचा विषय बनला आहे.

रानगव्यांकडून शेतीचे नुकसान होण्याच्या घटना वारंवार घडत असल्याने वनविभागाने केवळ पंचनामे करून थांबू नये, तर वन्यप्राण्यांचा शेतांमध्ये होणारा वावर कमी करण्यासाठी कायमस्वरूपी उपाययोजना कराव्यात, अशी मागणी शेतकऱ्यांकडून होत आहे.

नुकसानग्रस्त शेतांची वनविभागाच्या अधिकाऱ्यांनी तातडीने पाहणी करून वस्तुनिष्ठ पंचनामे करावेत, नुकसानग्रस्त शेतकऱ्यांना शासनाच्या नियमानुसार तातडीने नुकसानभरपाई मिळवून द्यावी, तसेच भविष्यात रानगव्यांपासून शेतीचे संरक्षण करण्यासाठी प्रभावी उपाययोजना कराव्यात, अशी मागणी जोर धरू लागली आहे.

रानगव्यांचा वाढता उपद्रव आणि शेतीचे होणारे नुकसान लक्षात घेता वनविभागाने तातडीने दखल घेऊन शेतकऱ्यांना दिलासा द्यावा, अशी अपेक्षा पार परिसरातील शेतकऱ्यांनी व्यक्त केली आहे.