कुंभरोशी ग्रामसभेत विविध विकासकामांवर सखोल चर्चा; जल जीवन मिशनच्या रखडलेल्या कामावर ग्रामस्थ आक्रमक
कुंभरोशी प्रतिनिधी :
कुंभरोशी येथे ग्रामसभा खेळीमेळीच्या वातावरणात पार पडली. ग्रामविकास, पाणीपुरवठा, घरकुल योजना, शिक्षण, आरोग्य तसेच पश्चिम घाट संवेदनशील क्षेत्रासंदर्भातील विविध विषयांवर ग्रामसभेत सविस्तर चर्चा करण्यात आली. ग्रामस्थांनी विविध प्रश्न मांडत संबंधित कामांना गती देण्याची मागणी केली.
ग्रामसभेच्या सुरुवातीला प्रधानमंत्री आवास योजना सन २०२४ अंतर्गत पात्र लाभार्थ्यांच्या यादीचे वाचन करण्यात आले. गावातील जास्तीत जास्त पात्र लाभार्थ्यांना या योजनेचा लाभ मिळवून देण्यासाठी प्रयत्न करण्यात येतील, अशी भूमिका ग्रामसभेत व्यक्त करण्यात आली.
जल जीवन मिशनच्या रखडलेल्या कामावर ग्रामस्थांची नाराजी
ग्रामसभेत जल जीवन मिशन अंतर्गत सुरू असलेल्या पाणीपुरवठा योजनेच्या कामावर जोरदार चर्चा झाली. मागील तीन वर्षांपासून संबंधित काम अर्धवट अवस्थेत असल्याने ग्रामस्थांनी तीव्र नाराजी व्यक्त केली. पाणीपुरवठ्यासारख्या मूलभूत सुविधेचे काम दीर्घकाळ रखडणे ही गंभीर बाब असून, संबंधित कंत्राटदाराच्या कामाची चौकशी करून आवश्यक ती कारवाई करावी तसेच कंत्राटदाराला ब्लॅकलिस्ट करण्यात यावे, अशी मागणी ग्रामस्थांनी केली.
सोळाव्या वित्त आयोगाबाबत माहिती
सन २०२६-२७ ते २०३०-३१ या कालावधीसाठी सोळाव्या वित्त आयोगासंदर्भात ग्रामसेवक एम. जे. माळवे यांनी ग्रामसभेला सविस्तर माहिती दिली. ग्रामपंचायतीच्या विकासकामांसाठी उपलब्ध होणाऱ्या निधीचा वापर, नियोजन आणि ग्रामविकासाच्या दृष्टीने त्याचे महत्त्व याबाबत त्यांनी मार्गदर्शन केले.
पश्चिम घाट संवेदनशील क्षेत्राच्या विरोधात एकमताने ठराव
पश्चिम घाट संवेदनशील क्षेत्रासंदर्भातही ग्रामसभेत चर्चा करण्यात आली. ग्रामस्थांच्या भावना आणि स्थानिक हित लक्षात घेऊन या निर्णयाच्या विरोधात एकमताने ठराव मंजूर करण्यात आला.
अवयवदानाबाबत जनजागृती
आरोग्य विभागाच्या वतीने तेजस रणपिसे यांनी अवयवदान या विषयावर ग्रामस्थांना मार्गदर्शन केले. अवयवदानाचे सामाजिक महत्त्व, त्यातून अनेक गरजू रुग्णांना मिळणारे जीवनदान आणि समाजाने या विषयाकडे सकारात्मक दृष्टिकोनातून पाहण्याची गरज याबाबत माहिती देण्यात आली. यावेळी उपस्थितांनी अवयवदानासंदर्भातील शपथही घेतली.
शाळेच्या इमारतीसह ‘आदर्श शाळे’साठी सहकार्याचे आवाहन
जिल्हा परिषद प्राथमिक शाळा, कुंभरोशीचे मुख्याध्यापक संजय सोनकर यांनी शाळेच्या नवीन इमारत बांधकामासंदर्भात तसेच ‘आदर्श शाळा’ उपक्रमाबाबत सविस्तर माहिती ग्रामसभेत दिली. शाळेच्या सर्वांगीण विकासासाठी ग्रामस्थ, पालक आणि ग्रामपंचायतीने सहकार्य करावे, अशी अपेक्षा त्यांनी व्यक्त केली.
ग्रामसभेला सुरेश सावंत, माजी सरपंच सखाराम ढेबे, रविकांत मोरे, सचिन सकपाळ, सुभाष सावंत, अजित कारंडे यांच्यासह ग्रामस्थ मोठ्या संख्येने उपस्थित होते. ग्रामसभेच्या यशस्वी आयोजनासाठी अमोल ढेबे यांनी आभार मानले.
कुंभरोशी ग्रामसभेत विविध विकासकामांबाबत झालेली सविस्तर चर्चा आणि ग्रामस्थांनी मांडलेल्या मागण्यांमुळे गावातील प्रलंबित प्रश्न मार्गी लागण्याची अपेक्षा व्यक्त होत आहे.
Comments
Post a Comment