केळघर घाटात भीषण दरड; दरड हटविताना जेसीबी घसरली, सुदैवाने जीवितहानी टळली

केळघर घाटात भीषण दरड; दरड हटविताना जेसीबी घसरली, सुदैवाने जीवितहानी टळली

मेढा–महाबळेश्वर मार्गावरील काळाखडक परिसरातील घटना; वाहतूक पूर्णपणे बंद, प्रशासनाकडून युद्धपातळीवर मदतकार्य

महाबळेश्वर प्रतिनिधी :

सतत सुरू असलेल्या मुसळधार पावसामुळे मेढा–महाबळेश्वर मार्गावरील केळघर घाटातील काळाखडक परिसरात रविवारी मोठी दरड कोसळल्याने वाहतूक पूर्णपणे ठप्प झाली आहे. रस्त्यावर मोठ्या प्रमाणात माती, दगड आणि झाडे आल्यामुळे दोन्ही बाजूंनी वाहनांच्या रांगा लागल्या असून, प्रशासनाने खबरदारीचा उपाय म्हणून घाट मार्ग तात्पुरता बंद केला आहे.

घटनेची माहिती मिळताच सार्वजनिक बांधकाम विभाग, महसूल प्रशासन, आपत्ती व्यवस्थापन यंत्रणा आणि संबंधित कर्मचारी तातडीने घटनास्थळी दाखल झाले. दरड हटविण्यासाठी जेसीबीच्या सहाय्याने काम सुरू करण्यात आले. मात्र, दरड हटविताना एक जेसीबी घसरल्याची घटना घडली. सुदैवाने या घटनेत कोणतीही जीवितहानी झाली नसून चालक व कर्मचारी सुरक्षित असल्याची माहिती प्रशासनाने दिली आहे.

घाट परिसरात अद्यापही पाऊस सुरू असल्याने डोंगरकडील भागातील माती सैल झाली असून, आणखी दरड कोसळण्याचा धोका कायम आहे. त्यामुळे मदतकार्य अत्यंत सावधगिरीने सुरू असून, यंत्रणांकडून परिस्थितीवर सतत लक्ष ठेवले जात आहे.

मेढा–महाबळेश्वर हा पर्यटन आणि स्थानिक नागरिकांच्या दळणवळणासाठी अत्यंत महत्त्वाचा मार्ग असल्याने वाहतूक बंद झाल्याचा फटका पर्यटकांसह स्थानिक नागरिकांनाही बसला आहे. अनेक वाहने घाटाच्या दोन्ही बाजूंना अडकून पडली असून, नागरिकांनी अत्यावश्यक कारणाशिवाय या मार्गाने प्रवास टाळावा, असे आवाहन प्रशासनाने केले आहे.

हवामान अनुकूल राहिल्यास रस्त्यावर पडलेली दरड हटवून वाहतूक पूर्ववत करण्यासाठी युद्धपातळीवर प्रयत्न सुरू आहेत. दरम्यान, घाट परिसरात अनावश्यक गर्दी करू नये, प्रशासनाच्या सूचनांचे पालन करावे आणि अधिकृत माहितीनुसारच प्रवासाचे नियोजन करावे, असे आवाहन संबंधित यंत्रणांनी केले आहे.