मुसळधार पावसाचा फटका! कुंभरोशी–प्रतापगड मार्गावर अनेक ठिकाणी झाडे कोसळली; मातीचा मलबा साचल्याने वाहतुकीला अडथळा, प्रशासनाच्या तातडीच्या हस्तक्षेपाची मागणी

मुसळधार पावसाचा फटका! कुंभरोशी–प्रतापगड मार्गावर अनेक ठिकाणी झाडे कोसळली; मातीचा मलबा साचल्याने वाहतुकीला अडथळा, प्रशासनाच्या तातडीच्या हस्तक्षेपाची मागणी

प्रतापगड प्रतिनिधी :

महाबळेश्वर तालुक्यात सुरू असलेल्या मुसळधार पावसामुळे जनजीवन विस्कळीत होत असून, त्याचा फटका आता रस्ते वाहतुकीलाही बसू लागला आहे. आज पहाटेपासून कुंभरोशी–प्रतापगड मार्गावर अनेक ठिकाणी मोठी झाडे रस्त्यावर कोसळली असून, डोंगर उतारावरील माती आणि दगडांचा मोठ्या प्रमाणात मलबा रस्त्यावर आल्याने वाहतुकीत अडथळा निर्माण झाला आहे. त्यामुळे वाहनचालकांना आणि प्रवाशांना मोठ्या अडचणींचा सामना करावा लागत आहे.

सतत सुरू असलेल्या पावसामुळे डोंगराळ भागातील माती सैल झाल्याने अनेक ठिकाणी झाडे उन्मळून थेट रस्त्यावर पडली आहेत. तसेच काही ठिकाणी मातीचा मोठा मलबा रस्त्यावर साचल्याने मार्ग अरुंद झाला असून वाहतूक धोकादायक बनली आहे. वळणाच्या ठिकाणी पडलेली झाडे आणि मातीचा मलबा अपघाताला निमंत्रण देत असल्याने वाहनचालकांना अत्यंत सावधगिरीने प्रवास करावा लागत आहे.

या मार्गावरून प्रतापगड किल्ल्याकडे जाणारे पर्यटक, स्थानिक ग्रामस्थ तसेच अत्यावश्यक सेवांची वाहने मोठ्या प्रमाणावर ये-जा करत असतात. विशेषतः पावसाळी पर्यटनाचा हंगाम सुरू असल्याने दररोज हजारो पर्यटक महाबळेश्वर आणि प्रतापगड परिसराला भेट देत असतात. अशा परिस्थितीत रस्त्यावर निर्माण झालेले अडथळे पर्यटकांच्या सुरक्षिततेच्या दृष्टीनेही चिंतेचा विषय ठरत आहेत.

विशेष म्हणजे, आज पहाटेपासून ही परिस्थिती निर्माण झाली असली तरी संबंधित यंत्रणेकडून रस्त्यावर पडलेली झाडे आणि मातीचा मलबा हटविण्याचे काम अद्याप सुरू झाले नसल्याची माहिती स्थानिकांनी दिली आहे. त्यामुळे नागरिकांमध्ये नाराजी व्यक्त होत असून, प्रशासनाने तात्काळ यंत्रसामग्रीसह घटनास्थळी दाखल होऊन रस्ता वाहतुकीसाठी सुरक्षित आणि सुरळीत करावा, अशी जोरदार मागणी होत आहे.

पुढील काही दिवस मुसळधार पावसाचा अंदाज लक्षात घेता प्रशासनाने अधिक सतर्क राहून संवेदनशील मार्गांवर तत्पर यंत्रणा तैनात करावी, रस्त्यांवरील झाडे, मातीचा मलबा आणि दरडी तातडीने हटवाव्यात तसेच रस्ते दुरुस्तीच्या कामाला गती द्यावी, अशी अपेक्षा नागरिक आणि पर्यटकांकडून व्यक्त होत आहे. पावसाळी पर्यटनाच्या काळात सुरक्षित आणि सुरळीत वाहतूक व्यवस्था राखणे ही प्रशासनाची महत्त्वाची जबाबदारी असल्याचेही स्थानिकांनी नमूद केले आहे.