कोयना जलाशयातील दळणवळणासाठी लोकप्रतिनिधी प्रयत्नशील; तराफा व लाँच सेवा सुरू करण्यासाठी हालचालींना वेग

कोयना जलाशयातील दळणवळणासाठी लोकप्रतिनिधी प्रयत्नशील; तराफा व लाँच सेवा सुरू करण्यासाठी हालचालींना वेग

महाबळेश्वर प्रतिनिधी :

कोयना जलाशय परिसरातील नागरिकांच्या दळणवळणाचा प्रश्न सोडविण्यासाठी तराफा व लाँच सेवा तातडीने सुरू करण्याच्या दृष्टीने लोकप्रतिनिधी प्रयत्नशील असल्याची माहिती कांदाटी खोऱ्याचे पंचायत समिती सदस्य संजय मोरे यांनी दिली आहे.

अतिवृष्टीमुळे दरडी कोसळणे, झाडे रस्त्यावर पडणे, रस्ते बंद होणे अशा घटना वारंवार घडत असल्याने कोयना जलाशय परिसरातील अनेक गावांचा संपर्क तुटण्याची शक्यता निर्माण होते. अशा परिस्थितीत नागरिकांना सुरक्षित आणि पर्यायी दळणवळणाची सुविधा उपलब्ध व्हावी, यासाठी तराफा व लाँच सेवा सुरू करणे अत्यंत आवश्यक असल्याचे मत नागरिकांकडून व्यक्त होत आहे.

यासंदर्भात नागरिकांनी केलेल्या मागणीला सकारात्मक प्रतिसाद देत पंचायत समिती सदस्य संजय मोरे यांनी सांगितले की, जिल्हा परिषद सदस्य अजित सपकाळ आणि आपण स्वतः या विषयाचा सातत्याने पाठपुरावा करत आहोत. संबंधित शासकीय विभागांकडून हवामानाचा अंदाज, सुरक्षा निकष आणि आवश्यक अहवाल तयार करून तो जिल्हा परिषदेकडे सादर करण्यात येणार आहे. त्यानंतर शासनाच्या नियमांनुसार अंतिम निर्णय घेतला जाईल.

मोरे म्हणाले, "हा विषय सर्वसामान्य नागरिकांच्या दैनंदिन जीवनाशी निगडित आहे. पावसाळ्यात निर्माण होणाऱ्या अडचणी लक्षात घेता सुरक्षित दळणवळणाची व्यवस्था उभी राहणे ही काळाची गरज आहे. नागरिकांच्या हिताचा विचार करून तराफा व लाँच सेवा लवकरात लवकर सुरू व्हावी, यासाठी आम्ही सर्वतोपरी प्रयत्न करत आहोत."

कोयना जलाशय परिसरातील नागरिकांनीही लोकप्रतिनिधींच्या या प्रयत्नांचे स्वागत केले असून, शासकीय प्रक्रिया तातडीने पूर्ण करून सेवा लवकर सुरू करण्याची अपेक्षा व्यक्त केली आहे. तराफा व लाँच सेवा सुरू झाल्यास पावसाळ्यातील दळणवळणाचा प्रश्न मोठ्या प्रमाणात सुटण्यास मदत होणार असल्याचे नागरिकांचे मत आहे.