काळेश्वरी घाटात जखमी बिबट्याचा थरार; दोन तास डंपरखाली आसरा, वनविभागाच्या विलंबामुळे नागरिकांमध्ये संताप

सातारा | प्रतिनिधी

काळेश्वरी घाट येथे शुक्रवारी सकाळी जखमी अवस्थेतील बिबट्या आढळून आल्याने परिसरात एकच खळबळ उडाली. सातारा–नित्रळ–केळवली मार्गावरील रस्त्यालगत हा बिबट्या जखमी अवस्थेत पडून असल्याचे निदर्शनास आल्यानंतर वाहनधारक व नागरिकांनी घटनास्थळी मोठी गर्दी केली. या घटनेमुळे काही काळ वाहतुकीवरही परिणाम झाला.

मिळालेल्या माहितीनुसार, सकाळी साडेदहा ते अकरा वाजण्याच्या सुमारास जखमी बिबट्या रस्त्याच्या कडेला दिसून आला. त्यानंतर काही वेळातच तो रस्त्यावर उभ्या असलेल्या एका डंपरखाली जाऊन बसला. बिबट्या जखमी असल्याने अस्वस्थ अवस्थेत होता आणि जवळ जाणाऱ्या नागरिकांकडे धाव घेण्याचा प्रयत्न करत असल्याची माहिती प्रत्यक्षदर्शींनी दिली. त्यामुळे परिसरात भीतीचे वातावरण निर्माण झाले.

बिबट्या डंपरखाली बसल्यामुळे संबंधित चालकाला वाहन हलविणे अशक्य झाले होते. दोन तासांहून अधिक काळ डंपर जागेवरच उभा राहिल्याने वाहतुकीची कोंडी निर्माण झाली. दरम्यान, घटनेची माहिती तातडीने वनविभागाला देण्यात आली असली तरी बराच वेळ उलटल्यानंतरही वनविभागाचे पथक घटनास्थळी पोहोचले नसल्याने नागरिक आणि वाहनधारकांमध्ये नाराजी व संताप व्यक्त करण्यात आला.

घटनास्थळी उपस्थित अनेकांनी मोबाईलवर व्हिडिओ आणि छायाचित्रे घेण्यासाठी मोठी गर्दी केली. मात्र अशा प्रकारची गर्दी जखमी वन्यप्राण्यांसाठी धोकादायक ठरू शकते, असे वन्यजीव अभ्यासकांचे मत आहे. जखमी आणि घाबरलेल्या अवस्थेतील वन्य प्राणी अधिक आक्रमक होण्याची शक्यता असल्याने नागरिकांनी सुरक्षित अंतर राखणे आणि बचाव पथकाला सहकार्य करणे आवश्यक असल्याचे तज्ज्ञांकडून सांगितले जाते.

बिबट्या नेमका कशामुळे जखमी झाला, याबाबत अद्याप स्पष्ट माहिती समोर आलेली नाही. वाहनाची धडक, दुसऱ्या वन्यप्राण्यासोबत झालेली झुंज किंवा अन्य कारणांमुळे तो जखमी झाला असावा, असा प्राथमिक अंदाज व्यक्त केला जात आहे. वनविभागाकडून त्याची वैद्यकीय तपासणी आणि पुढील उपचारानंतरच याबाबतचे नेमके कारण स्पष्ट होणार आहे.

परळी खोरे तसेच परिसरातील घाटरस्त्यांवर वन्यप्राण्यांचा वाढता वावर आणि वारंवार घडणाऱ्या अपघातांच्या घटना लक्षात घेता वन्यजीवांच्या संरक्षणासाठी तसेच वाहनचालकांच्या सुरक्षिततेसाठी प्रभावी उपाययोजना करण्याची मागणी नागरिकांकडून जोर धरू लागली आहे. वन्यजीवांच्या नैसर्गिक अधिवासावर वाढणारा मानवी हस्तक्षेप आणि वाहतुकीची वाढती वर्दळ ही देखील या घटनांमागील महत्त्वाची कारणे असल्याचे पर्यावरणप्रेमींनी नमूद केले आहे.