प्रती पंढरपूर निपाणीत आषाढी एकादशी भक्तिमय वातावरणात साजरी; भाविकांची मोठी गर्दी, दिंडी सोहळ्याने परिसर दुमदुमला

प्रती पंढरपूर निपाणीत आषाढी एकादशी भक्तिमय वातावरणात साजरी; भाविकांची मोठी गर्दी, दिंडी सोहळ्याने परिसर दुमदुमला

तापोळा  प्रतिनिधी

जावळी तालुक्यातील प्रती पंढरपूर म्हणून ओळख असलेल्या निपाणी येथील श्री विठ्ठल-रुक्मिणी मंदिरात आषाढी एकादशीचा उत्सव शनिवारी अत्यंत भक्तिभाव आणि उत्साहात साजरा करण्यात आला. दरवर्षीप्रमाणे यंदाही विविध धार्मिक व सांस्कृतिक कार्यक्रमांचे आयोजन करण्यात आले होते. सकाळपासूनच मंदिर परिसरात भाविकांच्या लांबच लांब रांगा लागल्या होत्या. "विठ्ठल... विठ्ठल..." या नामघोषाने संपूर्ण परिसर भक्तिमय वातावरणात न्हाऊन निघाला.

उत्सवाची सुरुवात पहाटे श्री विठ्ठल-रुक्मिणी यांच्या महाअभिषेकाने झाली. त्यानंतर विधिवत पूजा-अर्चा करण्यात आली. दिवसभर भजन, नामस्मरण आणि हरिपाठाचे कार्यक्रम रंगले. यानंतर निपाणीसह परिसरातील गावांमध्ये पारंपरिक दिंडी सोहळा काढण्यात आला. टाळ-मृदुंगाच्या गजरात आणि विठ्ठल नामाच्या अखंड जयघोषात वारकरी मोठ्या उत्साहाने सहभागी झाले.

उत्सवानिमित्त मंदिरात आलेल्या भाविकांसाठी फराळाचे आयोजन करण्यात आले होते. तसेच कोयना, सोळशी, कांदाटी आदी भागांतून आलेल्या मान्यवरांचा यावेळी सत्कार करण्यात आला. विविध गावांतील भाविकांच्या उपस्थितीमुळे मंदिर परिसर दिवसभर गजबजलेला होता.

दरम्यान, उत्सवात सहभागी झालेल्या काही भाविकांनी राज्याच्या विकासासाठी "एकनाथ शिंदे पुन्हा मुख्यमंत्री व्हावेत," अशी मागणी व्यक्त केली. ही भूमिका त्यांनी वैयक्तिक मत म्हणून मांडली.

आषाढी एकादशीच्या निमित्ताने निपाणी येथील प्रती पंढरपूरात निर्माण झालेल्या भक्तिमय वातावरणाने भाविकांना आध्यात्मिक समाधानाचा अनुभव दिला. वारकरी संप्रदायाची परंपरा जपत मोठ्या शिस्तबद्ध आणि उत्साहपूर्ण वातावरणात हा सोहळा पार पडला.