घरामागील जमिनीला चिरा; दरड कोसळण्याच्या भीतीने चव्हाण कुटुंबीय दहशतीत, तातडीने पंचनामा करण्याची मागणी

घरामागील जमिनीला चिरा; दरड कोसळण्याच्या भीतीने चव्हाण कुटुंबीय दहशतीत, तातडीने पंचनामा करण्याची मागणी

महाबळेश्वर, प्रतिनिधी :

महाबळेश्वर तालुक्यातील दाभे (मोहन) येथील रहिवासी कृष्णा गजरू चव्हाण यांच्या घराच्या पाठीमागील जमिनीला मोठ्या प्रमाणात चिरा पडल्या असून, परिसरात दरड कोसळण्यास सुरुवात झाल्याने कुटुंबीयांमध्ये भीतीचे वातावरण निर्माण झाले आहे. संभाव्य मोठा अनर्थ टाळण्यासाठी प्रशासनाने तात्काळ घटनास्थळी भेट देऊन पंचनामा करावा, अशी मागणी ग्रामस्थांकडून होत आहे.

सध्या सुरू असलेल्या मुसळधार पावसामुळे डोंगराळ भागातील माती सैल झाली असून, चव्हाण यांच्या घराच्या पाठीमागील उतारावरील जमिनीत मोठमोठ्या भेगा पडल्या आहेत. काही ठिकाणी माती घसरून दरड कोसळण्याचे प्रकारही घडल्याने घराला धोका निर्माण झाला आहे. आणखी पाऊस झाल्यास मोठी दरड कोसळून घराचे नुकसान होण्याची तसेच जीवितहानी होण्याची शक्यता व्यक्त केली जात आहे.

या धोकादायक परिस्थितीमुळे घरातील सर्व सदस्य सतत भीतीच्या छायेखाली राहत असून, रात्रीच्या वेळीही त्यांना सुरक्षिततेची चिंता सतावत आहे. परिसरातील नागरिकांनीही या ठिकाणी तातडीने पाहणी करून योग्य उपाययोजना करण्याची मागणी केली आहे.

ग्रामस्थांचे म्हणणे आहे की, महसूल प्रशासन, आपत्ती व्यवस्थापन विभाग तसेच संबंधित अधिकाऱ्यांनी घटनास्थळी भेट देऊन त्वरित पंचनामा करावा. परिस्थितीचा अहवाल तयार करून आवश्यक असल्यास कुटुंबाला सुरक्षित ठिकाणी स्थलांतरित करण्यासह संरक्षणात्मक उपाययोजना कराव्यात.

दरड कोसळण्याचा धोका लक्षात घेता कोणतीही दुर्घटना घडण्यापूर्वी प्रशासनाने तातडीने हस्तक्षेप करून योग्य कार्यवाही करावी, अशी जोरदार मागणी कृष्णा गजरू चव्हाण यांच्यासह स्थानिक ग्रामस्थांनी केली आहे.