कोयना धरण ८० टक्के भरले; पावसाचा जोर कायम, आवक-निर्गमनात मोठी तफावत

कोयना धरण ८० टक्के भरले; पावसाचा जोर कायम, आवक-निर्गमनात मोठी तफावत

महाबळेश्वर प्रतिनिधी :

सातारा जिल्ह्यासह कोयना धरणाच्या पाणलोट क्षेत्रात सुरू असलेल्या पावसामुळे कोयना धरणातील पाणीसाठ्यात सातत्याने वाढ होत आहे. ३० जुलै २०२६ रोजी सकाळी ८ वाजेपर्यंत धरणात एकूण ८३.९५ टीएमसी (७९.७६ टक्के) तर उपयुक्त पाणीसाठा ७८.८३ टीएमसी (७८.७३ टक्के) इतका झाला आहे. त्यामुळे धरण आता ८० टक्के क्षमतेच्या उंबरठ्यावर पोहोचले असून आगामी काही दिवसांतील पावसावर पुढील जलव्यवस्थापन अवलंबून राहणार आहे.

धरणाची पाणीपातळी २१४५ फूट ०७ इंच (६५३.९७४ मीटर) इतकी नोंदविण्यात आली आहे. गेल्या २४ तासांत कोयना येथे ४३ मिमी, नवजा येथे ५१ मिमी पावसाची नोंद झाली असून हंगामातील एकूण पाऊस अनुक्रमे २७७४ मिमी आणि ३३३५ मिमी झाला आहे. महाबळेश्वर येथे दैनंदिन पावसाची नोंद उपलब्ध नसली तरी हंगामातील एकूण पर्जन्यमान ३४८५ मिमी इतके झाले आहे.

सध्या धरणात १८,१०७ क्युसेक वेगाने पाण्याची आवक सुरू असून, त्याचे प्रमाण सुमारे १.५६ टीएमसी प्रतिदिन इतके आहे. दुसरीकडे धरणातून केवळ १,०५० क्युसेक पाण्याचा विसर्ग सुरू आहे. त्यामुळे आवक आणि विसर्ग यामध्ये मोठी तफावत असून धरणातील पाणीसाठा वेगाने वाढण्यास अनुकूल परिस्थिती निर्माण झाली आहे.

यंदाच्या मान्सूनमध्ये पाणलोट क्षेत्रात सातत्याने चांगला पाऊस होत असल्याने आगामी काळात धरण ८० टक्क्यांहून अधिक भरून जाण्याची शक्यता व्यक्त केली जात आहे. पावसाचा जोर असाच कायम राहिल्यास जलसंपदा विभागाला धरणाच्या विसर्गाबाबत परिस्थितीनुसार निर्णय घ्यावा लागू शकतो.

विशेष :
सध्या धरणात पाण्याची आवक ही विसर्गापेक्षा तब्बल अनेक पटीने अधिक असल्याने कोयना धरणातील पाणीसाठा दिवसागणिक वाढत आहे. त्यामुळे पुढील काही दिवसांतील पावसावर जलाशयातील पातळी आणि संभाव्य विसर्गाचे नियोजन अवलंबून राहणार आहे.