मुसळधार पावसाचा कहर! सोळशी नदी धोक्याच्या पातळीवर; येरणे बुद्रुक, येरणे खुर्द व आचलीचा संपर्क तुटला, घावरी–येरणे रस्ता खचला

मुसळधार पावसाचा कहर! सोळशी नदी धोक्याच्या पातळीवर; येरणे बुद्रुक, येरणे खुर्द व आचलीचा संपर्क तुटला, घावरी–येरणे रस्ता खचला

महाबळेश्वर प्रतिनिधी :

महाबळेश्वर तालुक्यात सुरू असलेल्या मुसळधार पावसामुळे जनजीवन विस्कळीत झाले असून सोळशी नदीने धोक्याची पातळी ओलांडल्याने येरणे बुद्रुक, येरणे खुर्द आणि आचली या गावांचा बाहेरील भागाशी संपर्क पूर्णपणे तुटला आहे. नदीच्या वाढत्या पाणीपातळीमुळे ग्रामस्थांमध्ये भीतीचे वातावरण निर्माण झाले असून येरणे खुर्द येथील अनेक नागरिकांनी संभाव्य धोका लक्षात घेऊन रात्रभर जागून काढली.

सततच्या पावसामुळे सोळशी नदीला मोठा पूर आला असून नदीकाठच्या परिसरात पाणी वेगाने वाढत आहे. त्यामुळे गावांमध्ये ये-जा करणारे रस्ते पाण्याखाली गेले असून दळणवळण पूर्णपणे विस्कळीत झाले आहे. अत्यावश्यक कामांसाठीही नागरिकांना गावाबाहेर पडणे अशक्य झाले आहे.

याचदरम्यान घावरी–येरणे मार्गावरील रस्ता मोठ्या प्रमाणावर खचला असून तो अत्यंत धोकादायक स्थितीत पोहोचला आहे. रस्त्याच्या कडेला मोठ्या भेगा पडल्या असून आणखी पाऊस झाल्यास रस्त्याचा मोठा भाग वाहून जाण्याची भीती व्यक्त केली जात आहे. प्रशासनाने सुरक्षेच्या कारणास्तव या मार्गावरून प्रवास करताना नागरिकांनी अत्यंत सावधगिरी बाळगावी, असे आवाहन केले आहे.

गावांचा संपर्क तुटल्यामुळे  शालेय विद्यार्थ्यांची वाहतूक, अत्यावश्यक वस्तूंचा पुरवठा तसेच आरोग्य सेवांवर परिणाम झाला आहे. आपत्कालीन परिस्थिती निर्माण झाल्यास मदत पोहोचविणेही कठीण होण्याची शक्यता व्यक्त केली जात आहे.

स्थानिक नागरिकांनी प्रशासनाने तातडीने घटनास्थळी पाहणी करून घावरी–येरणे रस्त्याची दुरुस्ती, पर्यायी वाहतूक व्यवस्था तसेच संपर्क तुटलेल्या गावांसाठी आवश्यक मदत उपलब्ध करून द्यावी, अशी मागणी केली आहे. हवामान खात्याने आणखी मुसळधार पावसाचा इशारा दिल्याने प्रशासनाने सतर्क राहून परिस्थितीवर सातत्याने लक्ष ठेवण्याची गरज व्यक्त होत आहे.