संततधार पावसाने महाबळेश्वर तालुका चिंब; भातशेतीसाठी पोषक वातावरणामुळे शेतकऱ्यांच्या चेहऱ्यावर समाधान
महाबळेश्वर प्रतिनिधी :
गेल्या काही दिवसांपासून सुरू असलेल्या संततधार पावसामुळे महाबळेश्वर तालुका परिसरातील शेतकरी वर्गामध्ये समाधानाचे वातावरण निर्माण झाले आहे. तालुक्यातील डोंगरदऱ्या, शिवार आणि ओढे-नाले पाण्याने भरून वाहत असून खरीप हंगामातील भात लागवडीसाठी अत्यंत अनुकूल परिस्थिती निर्माण झाली आहे.
विशेषतः प्रतापगड, कुंभरोशी, जावली, हरोशी, दरे तसेच पारकुमठे या गावांमध्ये पावसाने जोरदार हजेरी लावली आहे. अनेक ठिकाणी दिवसभर रिमझिम तर काही ठिकाणी मुसळधार स्वरूपाचा पाऊस पडत असल्याने शेतशिवारात पाण्याचा पुरेसा साठा निर्माण झाला आहे.
महाबळेश्वर तालुक्यातील बहुतांश शेतकरी भातशेतीवर अवलंबून असल्याने जून महिन्याच्या अखेरीस आणि जुलैच्या सुरुवातीला पडणारा पाऊस अत्यंत महत्त्वाचा मानला जातो. यावर्षी मान्सूनने वेळेवर हजेरी लावल्याने भाताच्या रोपांची वाढ चांगली होत असून लागवडीच्या कामांनाही वेग आला आहे. अनेक शेतकऱ्यांनी रोपवाटिका तयार करण्याबरोबरच भात लागवडीच्या पूर्वतयारीलाही सुरुवात केली आहे.
संततधार पावसामुळे परिसरातील विहिरी, तलाव आणि नैसर्गिक जलस्रोतांच्या पाणीपातळीतही वाढ होत असून याचा फायदा आगामी काळात शेतीसह पिण्याच्या पाण्याच्या उपलब्धतेसाठी होणार आहे. डोंगररांगांवर पसरलेले धुके, हिरवाईने नटलेले शिवार आणि वाहणारे धबधबे यामुळे संपूर्ण तालुक्यात निसर्गाने नवचैतन्य प्राप्त केले आहे.
पावसाचा हा जोर आगामी काही दिवस कायम राहिल्यास यंदाचा खरीप हंगाम समाधानकारक होईल, असा आशावाद शेतकरी व्यक्त करीत असून भात उत्पादनातही वाढ होण्याची अपेक्षा व्यक्त केली जात आहे.
Comments
Post a Comment