महाबळेश्वरच्या विकासकामांतील त्रुटींवर नगराध्यक्षांचा एल्गार; PWD च्या अर्धवट आणि निकृष्ट कामांची होणार प्रत्यक्ष चौकशी
महाबळेश्वर | प्रतिनिधी
महाबळेश्वर शहरात सार्वजनिक बांधकाम विभागामार्फत (PWD) सुरू असलेल्या विविध विकासकामांतील त्रुटी, अपूर्णता आणि निकृष्ट दर्जाबाबत वाढत्या नागरिकांच्या तक्रारींची गंभीर दखल घेत नगराध्यक्ष सुनिल शिंदे यांनी तीव्र नाराजी व्यक्त केली आहे. शहरातील मुख्य बाजारपेठेचे सुशोभीकरण, मरी पेठ रस्त्याचे डांबरीकरण, गटार व्यवस्था, विद्युत सुविधा तसेच पाणीपुरवठ्याशी संबंधित कामांबाबत अनेक प्रश्न उपस्थित होत असून, या सर्व कामांची प्रत्यक्ष पाहणी करून गुणवत्तेची सखोल तपासणी करण्याचा निर्णय नगराध्यक्षांनी घेतला आहे.
महाबळेश्वर हे राज्यासह देशातील महत्त्वाचे पर्यटनस्थळ मानले जाते. दरवर्षी लाखो पर्यटक येथे भेट देत असल्याने शहरातील पायाभूत सुविधा दर्जेदार, सुरक्षित आणि दीर्घकाळ टिकणाऱ्या असणे अपेक्षित आहे. मात्र, सध्या सुरू असलेल्या काही विकासकामांचा दर्जा समाधानकारक नसल्याचे चित्र समोर येत असल्याने नागरिकांमध्ये नाराजीचे वातावरण निर्माण झाले आहे. कोट्यवधी रुपयांचा शासकीय निधी खर्च होऊनही अपेक्षित दर्जा दिसून येत नसल्याने निधीचा अपव्यय होत असल्याची भावना नागरिक व्यक्त करत आहेत.
मुख्य बाजारपेठेच्या सुशोभीकरणासाठी मोठ्या प्रमाणावर निधी खर्च करण्यात आला आहे. मात्र अनेक ठिकाणी कामे अद्याप अपूर्ण अवस्थेत असून बसविण्यात आलेले काही दगड हलल्याने संपूर्ण डिझाइन विस्कळीत झाल्याचे दिसून येत आहे. त्यामुळे बाजारपेठेच्या सौंदर्यावर परिणाम होत असल्याची तक्रार व्यापारी आणि स्थानिक नागरिकांनी केली आहे. याशिवाय काही ठिकाणी बसविण्यात आलेली काँक्रीट चेंबरची झाकणे अल्पावधीतच खराब झाल्याने कामाच्या गुणवत्तेबाबत प्रश्नचिन्ह निर्माण झाले आहे. विद्युत व्यवस्थेची काही कामे अद्याप पूर्ण झालेली नसल्याने पर्यटक आणि पादचाऱ्यांना गैरसोयीचा सामना करावा लागत असल्याचेही नागरिकांनी निदर्शनास आणून दिले आहे.
मरी पेठ परिसरातील रस्त्याच्या डांबरीकरणाबाबतही नागरिकांनी गंभीर आक्षेप नोंदवले आहेत. रस्त्याचे काम घाईगडबडीत करण्यात आल्याचा आरोप होत असून, आवश्यक तांत्रिक निकषांचे पालन करण्यात आले नसल्याचे नागरिकांचे म्हणणे आहे. नव्याने तयार करण्यात आलेला रस्ता अल्पावधीतच खराब होण्याची शक्यता व्यक्त केली जात असून, भविष्यात पुन्हा त्याच कामासाठी निधी खर्च करण्याची वेळ येऊ शकते, अशी भीती स्थानिकांकडून व्यक्त केली जात आहे.
पावसाळ्याच्या तोंडावर बांधण्यात आलेल्या गटारांबाबतही अनेक त्रुटी समोर आल्या आहेत. काही ठिकाणी योग्य उतार न दिल्याने पाणी तुंबण्याची आणि साचण्याची शक्यता निर्माण झाली आहे. तसेच अनेक ठिकाणी मिळकतींमध्ये जाणाऱ्या पाणीपुरवठा पाईपलाईन्स आणि विद्युत केबल्स थेट गटारांमधून किंवा उघड्यावर सोडण्यात आल्याचे दिसून येत आहे. नागरिकांच्या मते, या सुविधा स्वतंत्र संरक्षित मार्गाने किंवा ब्रिजद्वारे संबंधित मिळकतींपर्यंत पोहोचविणे आवश्यक होते. सद्यस्थितीत भविष्यात देखभाल, दुरुस्ती आणि सुरक्षिततेच्या दृष्टीने गंभीर अडचणी निर्माण होण्याची शक्यता वर्तविली जात आहे.
सुमारे १०० कोटी रुपयांच्या सुशोभीकरण प्रकल्पातून शहराचा चेहरामोहरा बदलण्याचे उद्दिष्ट ठेवण्यात आले आहे. मात्र या प्रकल्पांतर्गत बसविण्यात आलेल्या डीपी, विद्युत केबल्स आणि अन्य सुविधा अधिक नियोजनबद्ध आणि सुरक्षित पद्धतीने उभारल्या जाव्यात, त्या नागरिकांसाठी किंवा पर्यटकांसाठी अडथळा ठरू नयेत, अशी अपेक्षा नागरिकांनी व्यक्त केली आहे. पाणीपुरवठ्यासाठी टाकण्यात आलेल्या काही पाईपलाईन्स अद्याप कार्यान्वित झालेल्या नसल्याने त्यांचा अपेक्षित लाभ नागरिकांना मिळालेला नाही, अशीही तक्रार समोर आली आहे.
या पार्श्वभूमीवर नगराध्यक्ष सुनिल शिंदे यांनी स्पष्ट शब्दांत इशारा देताना सांगितले की, "महाबळेश्वर हे राज्यातील एक प्रतिष्ठित पर्यटनस्थळ आहे. येथे होणाऱ्या विकासकामांमध्ये कोणत्याही प्रकारची तडजोड खपवून घेतली जाणार नाही. नागरिकांच्या पैशातून उभारल्या जाणाऱ्या सुविधा दर्जेदार असणे आवश्यक आहे. अर्धवट, निकृष्ट किंवा निष्काळजीपणे झालेल्या कामांची जबाबदारी निश्चित केली जाईल आणि दोषींवर आवश्यक कारवाईसाठी पाठपुरावा केला जाईल."
नगराध्यक्षांनी संबंधित कामांची प्रत्यक्ष पाहणी करण्याचे निर्देश दिले असून, पालिका प्रशासन, सार्वजनिक बांधकाम विभागाचे अधिकारी आणि तांत्रिक तज्ज्ञ यांच्या उपस्थितीत संयुक्त तपासणी केली जाणार आहे. तपासणीत त्रुटी आढळल्यास संबंधित ठेकेदारांकडून कामे दुरुस्त करून घेण्याबरोबरच वरिष्ठ स्तरावर तक्रार करून जबाबदारी निश्चित करण्यात येणार असल्याचे त्यांनी स्पष्ट केले.
महाबळेश्वरच्या सौंदर्याला आणि पर्यटन प्रतिमेला बाधा आणणाऱ्या विकासकामांबाबत नागरिकांमध्ये वाढती नाराजी पाहता, नगराध्यक्षांनी घेतलेल्या या भूमिकेमुळे प्रशासन आणि संबंधित यंत्रणांवर दबाव वाढला असून, आता प्रत्यक्ष पाहणीनंतर कोणती कारवाई होते याकडे संपूर्ण शहराचे लक्ष लागले आहे.
Comments
Post a Comment