महाबळेश्वर येथे कॅनॉट पीक मार्गावरील वनक्षेत्रात दारूच्या बाटल्यांच्या काचांचा खच; वन्यजीवांना धोका, वन विभागाचे दुर्लक्ष उघड
महाबळेश्वर | प्रतिनिधी
नैसर्गिक सौंदर्य, घनदाट वनसंपदा आणि जैवविविधतेसाठी देशभर प्रसिद्ध असलेल्या महाबळेश्वरमध्ये पर्यावरणाच्या दृष्टीने अत्यंत गंभीर बाब समोर आली आहे. महाबळेश्वर येथील प्रसिद्ध पर्यटनस्थळ असलेल्या कॅनॉट पीक पॉईंटकडे जाणाऱ्या रस्त्यालगतच्या वनक्षेत्रात मोठ्या प्रमाणात दारूच्या बाटल्यांच्या फुटलेल्या काचा विखुरलेल्या आढळून आल्या आहेत. या प्रकारामुळे वन्यजीव, पर्यटक तसेच स्थानिक नागरिकांच्या सुरक्षेचा प्रश्न निर्माण झाला असून वन विभागाच्या दुर्लक्षाबाबत तीव्र नाराजी व्यक्त केली जात आहे.
कॅनॉट पीक परिसर हा दाट जंगल, विविध वनस्पती आणि वन्यप्राण्यांचे अधिवास म्हणून ओळखला जातो. मात्र, याच परिसरात अनेक ठिकाणी मद्यपान करून बाटल्या फोडल्याचे चित्र दिसून येत आहे. रस्त्याच्या कडेला तसेच जंगलाच्या आतील भागात काचेचे असंख्य तुकडे विखुरलेले असल्याने वन्यप्राण्यांच्या पायांना जखमा होण्याचा धोका निर्माण झाला आहे. याशिवाय माकडे, रानससे, साळिंदर यांसारखे प्राणी या परिसरात मुक्तपणे वावरत असल्याने त्यांना गंभीर इजा होण्याची शक्यता व्यक्त केली जात आहे.
स्थानिक पर्यावरणप्रेमी आणि नागरिकांच्या मते, पर्यटकांकडून होणारी ही बेफिकीर कृत्ये थांबविण्यासाठी वन विभागाने कोणतीही प्रभावी उपाययोजना केलेली दिसत नाही. संवेदनशील वनक्षेत्रात मद्यपानास प्रतिबंध असताना देखील अशा प्रकारे बाटल्यांचा खच निर्माण होणे ही गंभीर बाब असल्याचे नागरिकांचे म्हणणे आहे. विशेष म्हणजे उन्हाळ्याच्या काळात फुटलेल्या काचा आणि कोरडे गवत यामुळे जंगलात आग लागण्याचाही धोका वाढू शकतो.
महाबळेश्वर हे पर्यावरणदृष्ट्या संवेदनशील क्षेत्र (Eco-Sensitive Zone) म्हणून घोषित करण्यात आलेले असताना वनक्षेत्रातील अशा प्रकारच्या अस्वच्छता आणि पर्यावरण हानीकडे संबंधित यंत्रणांनी गांभीर्याने लक्ष देण्याची गरज व्यक्त होत आहे. वन विभागाने तातडीने परिसराची स्वच्छता करून दोषींवर कारवाई करावी, तसेच पर्यटकांना जनजागृतीसह कठोर दंडात्मक कारवाईची अंमलबजावणी करावी, अशी मागणी पर्यावरणप्रेमींकडून होत आहे.
महाबळेश्वरच्या नैसर्गिक वारशाचे संरक्षण करण्यासाठी प्रशासन, वन विभाग आणि नागरिक यांनी संयुक्तपणे पुढाकार घेण्याची आवश्यकता निर्माण झाली आहे. अन्यथा निसर्गसंपन्न महाबळेश्वरच्या पर्यावरणाला अशा निष्काळजीपणाची मोठी किंमत मोजावी लागू शकते.
Comments
Post a Comment