कोयना धरणात पावसामुळे जलसाठ्यात वाढ; भाग्यलक्ष्मीच्या पोटात १३.९७ टीएमसी पाणीसाठा

कोयना धरणात पावसामुळे जलसाठ्यात वाढ; भाग्यलक्ष्मीच्या पोटात १३.९७ टीएमसी पाणीसाठा

कोयनानगर | प्रतिनिधी

सह्याद्रीच्या पर्वतरांगांमध्ये सुरू असलेल्या दमदार पावसामुळे राज्याची भाग्यलक्ष्मी म्हणून ओळखल्या जाणाऱ्या कोयना धरणाच्या जलसाठ्यात हळूहळू वाढ होत आहे. बुधवार, दि. २४ जून २०२६ रोजी सकाळी ८ वाजेपर्यंतच्या आकडेवारीनुसार कोयना धरणातील एकूण पाणीसाठा १३.९७ टीएमसीपर्यंत पोहोचला असून तो धरणाच्या एकूण क्षमतेच्या १३.२७ टक्के इतका आहे.

धरणातील उपयुक्त अर्थात जिवंत पाणीसाठा ८.८५ टीएमसी असून तो एकूण क्षमतेच्या ८.८३ टक्के इतका नोंदविण्यात आला आहे. धरणाची पाण्याची पातळी २०३९ फूट ०५ इंच म्हणजेच ६२१.६१४ मीटर इतकी झाली आहे.

कोयना खोऱ्यात मागील चोवीस तासांत चांगला पाऊस झाला असून कोयना येथे ९५ मिमी, नवजा येथे ११२ मिमी तर महाबळेश्वर येथे सर्वाधिक १४२ मिमी पावसाची नोंद झाली आहे. यावर्षीचा एकूण संचयी पाऊस अनुक्रमे कोयना येथे १३० मिमी, नवजा येथे १९९ मिमी आणि महाबळेश्वर येथे १७९ मिमी इतका झाला आहे.

सध्या धरणात २ हजार ३९४ क्युसेक पाण्याची आवक सुरू असून या आवकेमुळे जलसाठ्यात सातत्याने वाढ होत आहे. दुसरीकडे कोयना जलविद्युत प्रकल्पासाठी ५२५ क्युसेक पाण्याचा विसर्ग सुरू असून नदीपात्रामध्ये सध्या कोणताही विसर्ग करण्यात आलेला नाही. त्यामुळे धरणातून होणारा एकूण विसर्ग ५२५ क्युसेक इतकाच आहे.

मान्सूनने वेग घेतल्यामुळे आगामी काही दिवसांत कोयना खोऱ्यात आणखी पावसाची शक्यता हवामान विभागाने व्यक्त केली आहे. त्यामुळे धरणातील जलसाठ्यात आणखी वाढ होण्याची अपेक्षा व्यक्त केली जात आहे. राज्याच्या ऊर्जा निर्मिती आणि सिंचन व्यवस्थेसाठी अत्यंत महत्त्वाच्या असलेल्या कोयना धरणाकडे संपूर्ण महाराष्ट्राचे लक्ष लागून राहिले आहे.

दरम्यान, मान्सूनच्या सुरुवातीच्या टप्प्यातच जलसाठ्यात होत असलेली वाढ ही दिलासादायक मानली जात असून शेतकरी आणि नागरिकांमध्ये समाधानाचे वातावरण आहे.