महाबळेश्वरच्या विकासाला नवी चालना; नगराध्यक्ष सुनील शिंदे यांच्या नेतृत्वाखाली खासदार सुनील तटकरे यांच्याशी विकास आराखड्यावर महत्त्वपूर्ण चर्चा
महाबळेश्वर | प्रतिनिधी
महाबळेश्वर शहराच्या प्रलंबित विकास आराखड्यासह विविध विकासकामांना गती देण्यासाठी महाबळेश्वरचे नगराध्यक्ष सुनील शिंदे यांच्या नेतृत्वाखाली नगरसेवकांच्या शिष्टमंडळाने राष्ट्रवादी काँग्रेस पक्षाचे प्रदेशाध्यक्ष तथा खासदार सुनील तटकरे यांची भेट घेऊन महत्त्वपूर्ण चर्चा केली. या बैठकीत महाबळेश्वरच्या सर्वांगीण विकासासाठी आवश्यक असलेल्या विविध विषयांवर सविस्तर विचारविनिमय करण्यात आला.
आंतरराष्ट्रीय दर्जाचे पर्यटन स्थळ म्हणून ओळख असलेल्या महाबळेश्वरमध्ये दरवर्षी मोठ्या प्रमाणावर पर्यटक दाखल होत असतात. वाढत्या पर्यटनाच्या पार्श्वभूमीवर शहरातील पायाभूत सुविधा अधिक सक्षम करण्याची गरज निर्माण झाली आहे. याच अनुषंगाने नगराध्यक्ष सुनील शिंदे आणि नगरसेवकांनी शहराचा नवीन विकास आराखडा (डीपी प्लॅन), रस्त्यांचे आधुनिकीकरण, वाहतूक व्यवस्थेतील सुधारणा, पर्यटनवृद्धीसाठी आवश्यक उपाययोजना तसेच स्थानिक नागरिकांच्या मूलभूत सुविधांशी संबंधित विविध प्रश्न खासदार तटकरे यांच्यासमोर मांडले.
शहराच्या सुनियोजित आणि शाश्वत विकासासाठी शासनाकडून विशेष निधी उपलब्ध करून देण्याची मागणीही यावेळी करण्यात आली. महाबळेश्वरच्या भविष्यातील विकासाचा रोडमॅप निश्चित करण्यासाठी आणि अनेक वर्षांपासून प्रलंबित असलेल्या प्रकल्पांना मंजुरी मिळवून देण्यासाठी आवश्यक पाठपुरावा करण्याची विनंती शिष्टमंडळाने केली.
यावेळी खासदार सुनील तटकरे यांनी नगराध्यक्ष सुनील शिंदे आणि नगरसेवकांनी मांडलेले सर्व मुद्दे गांभीर्याने ऐकून घेत महाबळेश्वरच्या विकासासाठी राज्य व केंद्र शासनाच्या स्तरावर आवश्यक ते सर्वतोपरी सहकार्य करण्याचे आश्वासन दिले. पर्यटन क्षेत्र अधिक सक्षम करण्यासाठी तसेच शहराच्या विकासाला गती देण्यासाठी आवश्यक निधी आणि प्रशासकीय मंजुरी मिळवून देण्यासाठी सकारात्मक प्रयत्न करण्यात येतील, असे त्यांनी स्पष्ट केले.
या बैठकीमुळे महाबळेश्वरच्या प्रलंबित विकासकामांना चालना मिळण्याची अपेक्षा व्यक्त केली जात असून शहराच्या विकासासाठी महत्त्वपूर्ण पाऊल म्हणून या भेटीकडे पाहिले जात आहे. बैठकीस महाबळेश्वर नगरपालिकेचे विविध नगरसेवक तसेच पक्षाचे पदाधिकारी उपस्थित होते.
Comments
Post a Comment