कुंभरोशीत पल्स पोलिओ मोहिमेला उत्स्फूर्त प्रतिसाद; सरपंच कांचन सावंत यांच्या उपस्थितीत बालकांना पोलिओ डोस
प्रतापगड प्रतिनिधी
कुंभरोशी येथे राष्ट्रीय पल्स पोलिओ मोहिमेअंतर्गत बालकांना पोलिओ प्रतिबंधक लसीचे डोस देण्याचा उपक्रम उत्साहात पार पडला. गावातील पाच वर्षांखालील सर्व बालकांना पोलिओपासून संरक्षण मिळावे आणि "पोलिओमुक्त भारत" हे उद्दिष्ट अधिक बळकट व्हावे, यासाठी आरोग्य विभागाच्या वतीने ही मोहीम राबविण्यात आली.
या मोहिमेदरम्यान गावातील पालकांनी आपल्या बालकांना पोलिओचे दोन थेंब पाजण्यासाठी मोठ्या प्रमाणावर सहभाग नोंदविला. आरोग्य कर्मचाऱ्यांनी तसेच आशा सेविका आणि अंगणवाडी सेविकांनी घरभेटी देऊन जनजागृती केली व एकही बालक या मोहिमेपासून वंचित राहणार नाही याची दक्षता घेतली.
यावेळी कुंभरोशी ग्रामपंचायतीच्या सरपंच कांचन सावंत यांनी उपस्थित राहून मोहिमेचे महत्त्व अधोरेखित केले. त्यांनी पालकांना आपल्या मुलांच्या आरोग्याबाबत जागरूक राहण्याचे आवाहन केले तसेच प्रत्येक बालकाला पोलिओचे डोस मिळणे ही समाजाची सामूहिक जबाबदारी असल्याचे सांगितले.
गावातील नागरिकांच्या सहकार्यामुळे ही मोहीम यशस्वीरीत्या पार पडली असून बालकांच्या निरोगी आणि सुरक्षित भविष्यासाठी अशा आरोग्यविषयक उपक्रमांना नागरिकांनी यापुढेही सक्रिय पाठिंबा द्यावा, असे आवाहन आरोग्य विभागाच्या वतीने करण्यात आले.
Comments
Post a Comment