पत्रकाराला धमकी, अवमानकारक भाषा; महाबळेश्वर बसस्थानकातील वाहतूक निरीक्षकाच्या मुजोरीचा डिजिप्रेस मिडिया संघटनेकडून तीव्र निषेध

पत्रकाराला धमकी, अवमानकारक भाषा; महाबळेश्वर बसस्थानकातील वाहतूक निरीक्षकाच्या मुजोरीचा डिजिप्रेस मिडिया संघटनेकडून तीव्र निषेध

महाबळेश्वर | प्रतिनिधी

महाबळेश्वर बसस्थानक परिसरात एका वाहतूक निरीक्षकाने प्रवाशांसमोर पत्रकाराला धमकी देत अरेरावीची भाषा वापरल्याचा तसेच पत्रकारांबाबत अवमानकारक वक्तव्य केल्याचा गंभीर प्रकार समोर आला असून या घटनेचा डिजिप्रेस मिडिया संघटना महाराष्ट्र राज्यने तीव्र शब्दांत निषेध व्यक्त केला आहे. पत्रकारांशी अशा प्रकारे उद्धट वर्तन करणे हे केवळ एका व्यक्तीचे नव्हे तर संपूर्ण पत्रकारितेच्या सन्मानावर आघात असल्याची भूमिका संघटनेने मांडली आहे.

मिळालेल्या माहितीनुसार, महाबळेश्वर बसस्थानकात घडलेल्या या घटनेदरम्यान संबंधित वाहतूक निरीक्षकाने पत्रकाराशी गैरवर्तन करत धमकीवजा भाषा वापरली. याशिवाय पत्रकारांविषयी अवमानकारक टिप्पणी करण्यात आल्याचेही सांगितले जात आहे. ही घटना अनेक प्रवाशांसमोर घडल्याने प्रशासनातील काही अधिकाऱ्यांच्या वर्तणुकीबाबत प्रश्नचिन्ह निर्माण झाले आहे.

या पार्श्वभूमीवर डिजिप्रेस मिडिया संघटना महाराष्ट्र राज्यने प्रसिद्ध केलेल्या निवेदनात म्हटले आहे की, पत्रकार हा लोकशाहीचा चौथा स्तंभ असून समाजातील विविध प्रश्न, नागरिकांच्या अडचणी आणि प्रशासनाच्या कामकाजावर लक्ष ठेवण्याची महत्त्वाची जबाबदारी पत्रकार पार पाडत असतात. अशा परिस्थितीत पत्रकारांबाबत अपमानास्पद भाषा वापरणे, धमकावणे किंवा त्यांच्या कार्यात अडथळे निर्माण करणे हे लोकशाही मूल्यांच्या विरोधात असून अत्यंत निषेधार्ह आहे.

संघटनेने प्रशासनाला या प्रकरणाची गंभीर दखल घेण्याचे आवाहन केले असून संबंधित वाहतूक निरीक्षकाच्या वर्तनाची सखोल चौकशी करून त्यांच्यावर शासकीय नियमांनुसार कठोर कारवाई करण्यात यावी, अशी मागणी केली आहे. तसेच अशा घटना पुन्हा घडू नयेत यासाठी परिवहन विभागाने आपल्या अधिकाऱ्यांना आणि कर्मचाऱ्यांना पत्रकारांशी तसेच सर्वसामान्य नागरिकांशी सन्मानपूर्वक वागणूक देण्याबाबत स्पष्ट सूचना द्याव्यात, असेही संघटनेने म्हटले आहे.

पत्रकारांच्या सन्मान आणि सुरक्षिततेचा प्रश्न हा केवळ पत्रकारितेपुरता मर्यादित नसून तो अभिव्यक्ती स्वातंत्र्याशी निगडित असल्याचे संघटनेने स्पष्ट केले आहे. त्यामुळे राज्यातील सर्व पत्रकार संघटना, सामाजिक संस्था आणि लोकशाहीवादी संघटनांनी या घटनेचा निषेध करून पत्रकारांच्या पाठीशी ठामपणे उभे राहावे, असे आवाहनही डिजिप्रेस मिडिया संघटना महाराष्ट्र राज्यच्या वतीने करण्यात आले आहे.

दरम्यान, या प्रकरणामुळे महाबळेश्वर बसस्थानकातील संबंधित अधिकाऱ्यांच्या वर्तनाबाबत चर्चा सुरू झाली असून प्रशासन याबाबत कोणती भूमिका घेते आणि संबंधितांवर कोणती कारवाई होते, याकडे पत्रकारांसह नागरिकांचे लक्ष लागले आहे.