पत्रकारांशी उर्मट वर्तन महागात; महाबळेश्वर आगारातील अधिकाऱ्यावर निलंबनाची कारवाई सातारा विभागीय नियंत्रकांचा तातडीचा निर्णय; पत्रकार संघटनांकडून कारवाईचे स्वागत

पत्रकारांशी उर्मट वर्तन महागात; महाबळेश्वर आगारातील अधिकाऱ्यावर निलंबनाची कारवाई

सातारा विभागीय नियंत्रकांचा तातडीचा निर्णय; पत्रकार संघटनांकडून कारवाईचे स्वागत

 सातारा प्रतिनिधी :

महाबळेश्वर एसटी आगारातील एका अधिकाऱ्याने प्रवासी व पत्रकारांशी उर्मट व अयोग्य भाषेत वर्तन केल्याच्या घटनेचे तीव्र पडसाद उमटल्यानंतर संबंधित अधिकाऱ्यावर निलंबनाची कारवाई करण्यात आली आहे. सातारा विभागीय नियंत्रक ज्योती गायकवाड यांनी या प्रकरणाची गांभीर्याने दखल घेत तात्काळ ही कारवाई केल्याची माहिती समोर आली आहे.

रविवारी सुट्टीचा दिवस असल्याने महाबळेश्वर येथे पर्यटकांची मोठ्या प्रमाणावर गर्दी झाली होती. शहरात वाहतूक कोंडी निर्माण झाल्याने एसटी प्रवाशांनाही विविध अडचणींचा सामना करावा लागत होता. प्रवाशांची गैरसोय टाळण्यासाठी महाबळेश्वर आगार प्रशासनाने काही बस नियोजित वेळेपेक्षा अर्धा तास अगोदर सोडण्याचा निर्णय घेतला होता. मात्र एका बसमध्ये प्रवासी पूर्ण भरल्यानंतरही ती वेळेत रवाना न झाल्याने काही प्रवाशांनी नाराजी व्यक्त केली. पुढील बस व रेल्वे गाठण्याची घाई असलेल्या प्रवाशांनी याबाबत अधिकाऱ्यांना जाब विचारला. यावेळी प्रवासी आणि एसटी कर्मचाऱ्यांमध्ये शाब्दिक वाद निर्माण झाला.

घटनास्थळी उपस्थित असलेल्या अधिकाऱ्याने सुरुवातीला प्रवाशांशी समजुतीने संवाद साधण्याचा प्रयत्न केला. मात्र काही वेळानंतर त्यांचा बोलण्याचा सूर बदलल्याचे प्रत्यक्षदर्शींनी सांगितले. वाढत्या गोंधळाच्या पार्श्वभूमीवर तेथे उपस्थित पत्रकारांनी संपूर्ण प्रकाराचे व्हिडिओ चित्रीकरण सुरू केले. त्यानंतर संबंधित अधिकाऱ्याने पत्रकारांशीही उर्मटपणे व अयोग्य भाषेत संवाद साधल्याचा आरोप करण्यात आला. या घटनेचा व्हिडिओ आणि माहिती समाजमाध्यमांवर तसेच पत्रकार संघटनांकडे पोहोचल्यानंतर संतापाची लाट उसळली.

या घटनेविरोधात सातारा जिल्हा पत्रकार संघ, सातारा पत्रकार संघ तसेच डिजिटल मीडिया परिषद यांच्यासह विविध पत्रकार संघटनांनी तीव्र निषेध नोंदवत संबंधित अधिकाऱ्यावर कठोर कारवाईची मागणी केली होती. पत्रकारांशी गैरवर्तन करणाऱ्या शासकीय अधिकाऱ्यांविरोधात प्रशासनाने शून्य सहनशीलतेचे धोरण अवलंबावे, अशी भूमिका संघटनांनी मांडली होती.

प्रकरणाची सखोल माहिती घेतल्यानंतर सातारा विभागीय नियंत्रक ज्योती गायकवाड यांनी पत्रकारांची दिलगिरी व्यक्त केली. पत्रकार हे लोकशाहीचा चौथा स्तंभ असून त्यांच्याशी सन्मानाने वागणे ही प्रत्येक शासकीय कर्मचाऱ्याची जबाबदारी असल्याचे त्यांनी स्पष्ट केले. तसेच संबंधित अधिकाऱ्याच्या वर्तनाची गंभीर दखल घेत त्याच्यावर तात्काळ निलंबनाची कारवाई करण्यात आल्याचे त्यांनी सांगितले.

या कारवाईमुळे एसटी प्रशासनाने शिस्तभंगाच्या घटनांबाबत कठोर भूमिका घेतल्याचा संदेश गेला असून पत्रकार संघटनांनी या निर्णयाचे स्वागत केले आहे. दरम्यान, भविष्यात अशा घटना पुन्हा घडू नयेत यासाठी संबंधित कर्मचाऱ्यांना योग्य सूचना देण्यात येणार असल्याचेही प्रशासनाकडून सांगण्यात आले.