ग्रामपंचायत निवडणुकांची रणधुमाळी सुरू; सातारा जिल्ह्यातील ८६६ ग्रामपंचायतींमध्ये राजकीय हालचालींना वेग

ग्रामपंचायत निवडणुकांची रणधुमाळी सुरू; सातारा जिल्ह्यातील ८६६ ग्रामपंचायतींमध्ये राजकीय हालचालींना वेग

सातारा प्रतिनिधी :
राज्यातील तब्बल १४ हजारांहून अधिक ग्रामपंचायतींचा कार्यकाळ संपुष्टात आल्याने स्थानिक स्वराज्य संस्थांच्या निवडणुकांची प्रक्रिया आता वेगाने पुढे सरकत आहे. सातारा जिल्ह्यातील ८६६ ग्रामपंचायतींचा कार्यकाळ संपल्याने सध्या सरपंचांना प्रशासक म्हणून नियुक्त करण्यात आले असून आगामी निवडणुकांच्या पार्श्वभूमीवर गावागावांत राजकीय वातावरण तापू लागले आहे.

राज्य निवडणूक आयोगाने अनुसूचित ग्रामपंचायतीतील सदस्यांच्या आरक्षण सोडतीचा अधिकृत कार्यक्रम जाहीर केला असून त्यानुसार आरक्षण निश्चितीची प्रक्रिया जून ते जुलै महिन्यात टप्प्याटप्प्याने पूर्ण होणार आहे. त्यामुळे इच्छुक उमेदवार, स्थानिक नेते आणि विविध राजकीय गटांकडून मोर्चेबांधणीला सुरुवात झाली आहे.

निवडणूक आयोगाच्या कार्यक्रमानुसार ८ जून रोजी विशेष ग्रामसभेची सूचना देण्यात येणार आहे. त्यानंतर १२ जून रोजी तहसीलदार यांच्या अध्यक्षतेखाली आरक्षण सोडत काढली जाणार आहे. या सोडतीनंतर १७ जून रोजी प्रारूप आरक्षणास जिल्हाधिकाऱ्यांची मान्यता मिळणार असून १९ जून रोजी ते अधिकृतपणे प्रसिद्ध केले जाणार आहे.

प्रारूप आरक्षण जाहीर झाल्यानंतर १९ ते २५ जून या कालावधीत नागरिकांना हरकती आणि सूचना सादर करण्याची संधी उपलब्ध करून देण्यात आली आहे. प्राप्त हरकतींवर उपविभागीय अधिकारी ३ जुलै रोजी निर्णय घेणार आहेत. त्यानंतर ८ जुलै रोजी अंतिम आरक्षणास जिल्हाधिकाऱ्यांची मान्यता दिली जाणार असून १० जुलै रोजी अंतिम प्रभागरचना आणि आरक्षण अधिकृतपणे जाहीर करण्यात येणार आहे.

आरक्षण आणि प्रभागरचनेचा अंतिम आराखडा जाहीर होण्यापूर्वीच अनेक गावांमध्ये संभाव्य उमेदवारांनी मतदारांशी संपर्क वाढविण्यास सुरुवात केली आहे. विविध राजकीय पक्ष तसेच स्थानिक आघाड्यांकडून निवडणुकीची रणनीती आखली जात असून गावपातळीवर बैठका, चर्चा आणि गटबाजीचे राजकारणही सुरू झाल्याचे चित्र दिसत आहे.

विशेषतः आरक्षण सोडतीनंतर अनेक प्रस्थापित पदाधिकाऱ्यांचे राजकीय समीकरण बदलण्याची शक्यता असल्याने इच्छुक उमेदवारांचे लक्ष १२ जूनच्या सोडतीकडे लागले आहे. महिला, अनुसूचित जाती, अनुसूचित जमाती आणि इतर मागासवर्गीय आरक्षणाच्या अनुषंगाने अनेक ठिकाणी नवीन चेहरे पुढे येण्याची शक्यता वर्तविली जात आहे.

दरम्यान, अंतिम आरक्षण आणि प्रभागरचना १० जुलै रोजी जाहीर झाल्यानंतर निवडणूक कार्यक्रम कधी घोषित होणार याकडे सर्वांचे लक्ष लागले असून सातारा जिल्ह्यातील ८६६ ग्रामपंचायतींसह राज्यभरातील हजारो ग्रामपंचायतींमध्ये निवडणुकीची रणधुमाळी आणखी तीव्र होण्याची चिन्हे दिसू लागली आहेत.