बिरवाडी जिल्हा परिषद शाळेचा शताब्दी सोहळा १० मे रोजी; शतकभराच्या परंपरेचा भव्य उत्सव

बिरवाडी जिल्हा परिषद शाळेचा शताब्दी सोहळा १० मे रोजी; शतकभराच्या परंपरेचा भव्य उत्सव

प्रतापगड प्रतिनिधी :

 महाबळेश्वर तालुक्यातील जिल्हा परिषद शाळा, बिरवाडी या ऐतिहासिक शैक्षणिक संस्थेच्या शताब्दी वर्षानिमित्त १० मे २०२६ रोजी भव्य सोहळ्याचे आयोजन करण्यात आले असून, शतकभराच्या शैक्षणिक परंपरेचा उत्सव मोठ्या उत्साहात साजरा होणार आहे. या निमित्ताने विविध सांस्कृतिक, शैक्षणिक आणि सामाजिक उपक्रमांची मेजवानी नागरिकांना अनुभवायला मिळणार आहे.

शाळेच्या शंभर वर्षांच्या गौरवशाली वाटचालीचा आढावा घेण्यासाठी विशेष कार्यक्रमाचे आयोजन करण्यात आले आहे. या सोहळ्यास माजी विद्यार्थी, विद्यमान शिक्षक, पालक आणि परिसरातील नागरिक मोठ्या संख्येने उपस्थित राहणार असून, जुन्या आठवणींना उजाळा देत नव्या पिढीसाठी प्रेरणादायी वातावरण निर्माण होणार आहे.

कार्यक्रमामध्ये विद्यार्थ्यांची आकर्षक सांस्कृतिक सादरीकरणे, मान्यवरांचे मार्गदर्शन, गुणवंत विद्यार्थ्यांचा सत्कार तसेच विविध उपक्रमांचा समावेश असणार आहे. शाळेच्या उभारणीत आणि विकासात मोलाचे योगदान देणाऱ्या व्यक्तींचा विशेष सन्मानही यावेळी करण्यात येणार आहे.

या सोहळ्यास प्रमुख पाहुणे म्हणून मकरंद आबा पाटील (मंत्री, मदत व पुनर्वसन, महाराष्ट्र राज्य) यांची उपस्थिती लाभणार असून, त्यांच्या हस्ते विविध कार्यक्रम पार पडणार आहेत. तसेच इतर मान्यवरांचीही उपस्थिती कार्यक्रमाची शोभा वाढवणार आहे.

कार्यक्रमादरम्यान श्री. सत्यवान रेडकर, वरिष्ठ अनुवाद अधिकारी, केंद्रीय वस्तू व सेवा कर, मुंबई (भारत सरकार) यांचे मार्गदर्शनपर व्याख्यान आयोजित करण्यात आले असून, विद्यार्थ्यांसह नागरिकांना त्याचा लाभ घेण्याचे आवाहन आयोजकांनी केले आहे.

शताब्दी सोहळा यशस्वी करण्यासाठी आयोजन समिती जोरदार तयारी करत असून, हा सोहळा बिरवाडीच्या शैक्षणिक इतिहासातील एक अविस्मरणीय पर्व ठरणार आहे. सर्व नागरिकांनी मोठ्या संख्येने उपस्थित राहून या ऐतिहासिक क्षणाचे साक्षीदार व्हावे, असे आवाहन आयोजकांनी केले आहे.