आंबेनळी घाटात भीषण दुर्घटना; ८०० फूट दरीत कोसळलेल्या स्कॉर्पिओतील आठही प्रवाशांचा मृत्यू झाल्याची भीती

रात्रभर सुरू राहिले शोध व बचावकार्य; डीवायएसपी शंकर काळे, तहसीलदार कपिल घोरपडे, एपीआय आनंद रावडे यांच्यासह विविध यंत्रणा घटनास्थळी

प्रतापगड प्रतिनिधी :

महाबळेश्वर–पोलादपूर मार्गावरील आंबेनळी घाटात अत्यंत भीषण अपघात झाल्याची घटना समोर आली असून, कुंभरोशी परिसरापासून सुमारे तीन किलोमीटर अंतरावर पोलादपूर हद्दीत एक स्कॉर्पिओ वाहन तब्बल ८०० फूट खोल दरीत कोसळल्याची माहिती मिळाली आहे. या वाहनामध्ये एकूण आठ प्रवासी प्रवास करत होते. प्राथमिक माहितीनुसार सर्व प्रवाशांचा मृत्यू झाला असण्याची भीती व्यक्त केली जात असून, अधिकृत पुष्टी बचावकार्य पूर्ण झाल्यानंतरच होणार आहे.

मिळालेल्या माहितीनुसार हा अपघात शनिवारी उशिरा रात्री किंवा रविवारी पहाटेच्या सुमारास झाला असावा, असा अंदाज व्यक्त केला जात आहे. वाहनातील प्रवाशांशी संपर्क होत नसल्याने आणि अपघाताची शक्यता वाटल्याने संबंधित नातेवाईकांनी पोलादपूर पोलीस ठाण्याशी संपर्क साधून माहिती दिली होती. त्यानंतर पोलिसांनी मोबाईल लोकेशन व इतर तांत्रिक माध्यमांच्या सहाय्याने वाहनाचा माग काढण्यास सुरुवात केली.

लोकेशनच्या आधारे शोधमोहीम राबविल्यानंतर आंबेनळी घाटातील एका अतिशय खोल दरीमध्ये वाहन पडल्याचे निदर्शनास आले. घटनेची माहिती मिळताच पोलादपूर पोलीस प्रशासन, महसूल विभाग तसेच विविध बचाव संस्थांची पथके तातडीने घटनास्थळी दाखल झाली. दरीची खोली, अंधार, अवघड भौगोलिक परिस्थिती आणि धोकादायक उतार यामुळे बचावकार्य अत्यंत आव्हानात्मक ठरत आहे.

या मोहिमेत प्रतापगड सर्च अँड रेस्क्यू टीम, महाबळेश्वर ट्रेकर्स, सह्याद्री ट्रेकर्स तसेच महाड येथील सिस्केप रेस्क्यू टीम यांचा सक्रिय सहभाग असून, शनिवारी रात्री सुमारे आठ वाजल्यापासून बचावकार्य अखंड सुरू आहे. रात्रभर दोरांच्या सहाय्याने दरीत उतरून वाहनापर्यंत पोहोचण्याचा आणि अडकलेल्या प्रवाशांचा शोध घेण्याचा प्रयत्न करण्यात आला. मात्र अंधार, खोल दरी आणि कठीण भौगोलिक परिस्थितीमुळे कार्यात मोठ्या अडचणी निर्माण होत आहेत.

दरम्यान, घटनेची गंभीरता लक्षात घेऊन उपविभागीय पोलीस अधिकारी (डीवायएसपी) शंकर काळे, पोलादपूरचे तहसीलदार कपिल घोरपडे तसेच सहाय्यक पोलीस निरीक्षक आनंद रावडे यांनी घटनास्थळी भेट देऊन बचावकार्याचा आढावा घेतला. विविध विभागांमध्ये समन्वय साधून शोधमोहीम अधिक वेगाने राबविण्याच्या सूचना यावेळी देण्यात आल्या.

रविवारी सकाळीही शोध व बचावकार्य युद्धपातळीवर सुरू ठेवण्यात आले असून, घटनास्थळी मोठ्या प्रमाणावर नागरिक, नातेवाईक आणि स्थानिक प्रशासन उपस्थित आहे. वाहनापर्यंत पोहोचण्यासाठी बचाव पथकांकडून विशेष तांत्रिक उपकरणांचा वापर करण्यात येत आहे. अपघातग्रस्त वाहन दरीच्या अत्यंत खोल भागात असल्याने बचावकार्यात मोठी कसरत करावी लागत आहे.

या दुर्घटनेमुळे संपूर्ण महाबळेश्वर, पोलादपूर आणि परिसरात हळहळ व्यक्त केली जात असून, मृतांची ओळख पटविण्याचे आणि अपघाताचा नेमका घटनाक्रम समजून घेण्याचे काम सुरू आहे. अपघाताचे कारण अद्याप स्पष्ट झाले नसले तरी घाटातील तीव्र वळणे, रात्रीचा प्रवास, वेग किंवा वाहनावरील नियंत्रण सुटणे यांसारख्या विविध शक्यतांचा तपास पोलीस प्रशासनाकडून केला जात आहे.

बचावकार्य पूर्ण झाल्यानंतर आणि अधिकृत पंचनामा झाल्यानंतरच या भीषण दुर्घटनेबाबत अधिकृत माहिती जाहीर केली जाणार असल्याचे प्रशासनाकडून सांगण्यात आले आहे.