‘मधुमित्र मधुसखी मधपाळ’ व्हॉट्सअॅप चॅनलद्वारे राज्यातील मधपाळांना एकत्र आणण्याचा उपक्रम; अधिकाधिक मधपाळांनी सहभागी होण्याचे आवाहन

महाबळेश्वर, प्रतिनिधी : 

महाराष्ट्रातील मधमाशी पालन व्यवसायाला अधिक चालना मिळावी, राज्यभरातील मधपाळांना शासकीय योजना, तांत्रिक मार्गदर्शन आणि उद्योगविषयक अद्ययावत माहिती एका व्यासपीठावर उपलब्ध व्हावी या उद्देशाने महाराष्ट्र राज्य खादी व ग्रामोद्योग मंडळ, मुंबई आणि मध संचालनालय, महाबळेश्वर यांच्या वतीने अधिकृत ‘मधुमित्र मधुसखी मधपाळ महाराष्ट्र राज्य’ हे व्हॉट्सअॅप चॅनल सुरू करण्यात आले आहे. राज्यातील सर्व जिल्ह्यांतील मधपाळांपर्यंत या चॅनलची माहिती पोहोचवून जास्तीत जास्त मधपाळांना चॅनलशी जोडण्याचे आवाहन करण्यात आले आहे.

मध उद्योग क्षेत्रात कार्यरत असलेल्या शेतकरी, उद्योजक आणि मधपाळ यांच्यासाठी हे चॅनल माहितीचे प्रभावी माध्यम ठरणार असून याच्या माध्यमातून शासनाच्या विविध योजना, अनुदाने, प्रशिक्षण कार्यक्रम, बाजारपेठेतील संधी, मध उत्पादनातील आधुनिक तंत्रज्ञान आणि उद्योगवृद्धीसाठी आवश्यक मार्गदर्शन वेळोवेळी उपलब्ध करून दिले जाणार आहे.

या अधिकृत चॅनलवरून मध संचालनालय, महाबळेश्वर, मध संचालक, विशेष कार्य अधिकारी (राज्य स्तर), जिल्हा ग्रामोद्योग अधिकारी, मध निरीक्षक, मधुक्षेत्रिक, केंद्र चालक तसेच राज्यातील यशस्वी मधपाळ यांच्या माध्यमातून महत्त्वपूर्ण माहिती प्रसारित केली जाणार आहे. त्यामुळे राज्यातील मधपाळांना थेट तज्ज्ञांशी आणि संबंधित शासकीय यंत्रणांशी संपर्क ठेवणे अधिक सुलभ होणार आहे.

चॅनलद्वारे मधमाशी पालन विषयक नव्या तांत्रिक घडामोडी, उत्पादन वाढीसाठी आवश्यक उपाययोजना, रोग व्यवस्थापन, मध संकलन आणि प्रक्रिया तंत्रज्ञान, बाजारपेठ विकास, मूल्यवर्धन तसेच निर्यातविषयक माहिती नियमितपणे दिली जाणार आहे. याशिवाय शासनाच्या नव्या योजना, अनुदान योजना, प्रशिक्षण शिबिरे आणि विविध शासकीय उपक्रमांची माहितीही तत्काळ उपलब्ध होणार आहे.

विशेष म्हणजे राज्यातील यशस्वी मधपाळांच्या प्रेरणादायी यशोगाथा देखील या चॅनलवरून प्रसारित केल्या जाणार असून त्यातून नवोदित मधपाळांना व्यवसाय विस्तारासाठी प्रेरणा मिळणार आहे. मध उद्योग क्षेत्रातील अनुभवी तज्ज्ञांचे मार्गदर्शन, व्यावसायिक सल्ले आणि उत्पादनवाढीसाठी उपयुक्त सूचना देखील या माध्यमातून उपलब्ध होणार असल्याने मधपाळांना त्यांच्या व्यवसायाच्या प्रगतीसाठी मोठी मदत होणार आहे.

राज्यातील प्रत्येक जिल्ह्यातील मधपाळांपर्यंत या चॅनलची माहिती पोहोचवून त्यांना जोडण्यासाठी संबंधित अधिकारी, केंद्र चालक, स्वयंसेवी संस्था आणि मध उद्योगाशी संबंधित घटकांनी पुढाकार घ्यावा, असे आवाहन करण्यात आले आहे. महाराष्ट्रातील मध उद्योग अधिक सक्षम, आधुनिक आणि उत्पादनक्षम बनविण्यासाठी हे चॅनल प्रभावी दुवा ठरणार असल्याचा विश्वास व्यक्त केला जात आहे.

अधिकृत माहिती, तांत्रिक मार्गदर्शन, शासनाच्या योजना आणि मध उद्योगातील नव्या संधींबाबत अद्ययावत माहिती मिळवण्यासाठी राज्यातील सर्व मधपाळांनी ‘मधुमित्र मधुसखी मधपाळ महाराष्ट्र राज्य’ या व्हॉट्सअॅप चॅनलमध्ये सहभागी व्हावे, असे आवाहन करण्यात आले आहे.

व्हॉट्सअॅप चॅनल लिंक :

🐝 “अधिक उत्पादनक्षम, आधुनिक आणि यशस्वी मध उद्योगासाठी चला, एकत्र येऊया!” 🐝