“गॅस टंचाईचा फटका फक्त छोट्या व्यावसायिकांनाच? मोठी हॉटेल्स मात्र निर्धास्त सुरू; प्रशासनाच्या भूमिकेवर प्रश्नचिन्ह”

“गॅस टंचाईचा फटका फक्त छोट्या व्यावसायिकांनाच? मोठी हॉटेल्स मात्र निर्धास्त सुरू; प्रशासनाच्या भूमिकेवर प्रश्नचिन्ह”

महाबळेश्वर प्रतिनिधी :

महाबळेश्वरसह परिसरात निर्माण झालेल्या व्यावसायिक गॅस टंचाईमुळे छोट्या व्यावसायिकांचे अक्षरशः कंबरडे मोडले असून अनेक छोटे हॉटेल, चहाचे स्टॉल, नाश्त्याची केंद्रे आणि हातावर पोट असलेले व्यावसायिक मोठ्या अडचणीत सापडले आहेत. मात्र दुसरीकडे शहरातील काही मोठी हॉटेल्स आणि आलिशान व्यावसायिक प्रतिष्ठाने कोणतीही अडचण नसल्याप्रमाणे सुरळीत सुरू असल्याचे चित्र दिसत असल्याने सर्वसामान्यांमध्ये तीव्र नाराजी व्यक्त होत आहे.

गेल्या काही दिवसांपासून व्यावसायिक वापराच्या गॅस सिलेंडरचा तुटवडा निर्माण झाला आहे. अनेक लहान व्यावसायिकांना वेळेवर सिलेंडर मिळत नसल्याने त्यांचा व्यवसाय बंद ठेवण्याची वेळ आली आहे. काहींनी तर ग्राहकांची गैरसोय होऊ नये म्हणून उधारीवर सिलेंडर मिळवण्याचा प्रयत्न केला, तर काहींना पर्यायी व्यवस्था करण्यासाठी अधिक खर्च सहन करावा लागत आहे. पर्यटन हंगाम सुरू असताना अशा प्रकारची टंचाई निर्माण झाल्याने आर्थिक संकट अधिकच गडद झाले आहे.

छोटे व्यावसायिक सांगतात की, “सकाळपासून एजन्सीच्या फेऱ्या मारूनही सिलेंडर मिळत नाही. दोन-दोन दिवस व्यवसाय बंद ठेवावा लागतो. रोजंदारीवर काम करणाऱ्या कर्मचाऱ्यांचे पगार, दुकानभाडे, वीजबिल यांचा ताण वाढत चालला आहे.” अनेकांनी प्रशासन आणि गॅस पुरवठा यंत्रणेवर संताप व्यक्त करताना “नियम फक्त गरीबांसाठीच आहेत का?” असा सवाल उपस्थित केला आहे.

विशेष म्हणजे, शहरातील काही मोठी हॉटेल्स, रिसॉर्ट्स आणि मोठ्या व्यावसायिक आस्थापनांमध्ये मात्र कोणतीही टंचाई नसल्याचे दिसून येत आहे. मोठ्या प्रमाणावर स्वयंपाक सुरू असून पर्यटकांची सेवा सुरळीत चालू आहे. त्यामुळे गॅस पुरवठ्यात दुजाभाव होत असल्याची चर्चा नागरिकांमध्ये रंगू लागली आहे. “लहान व्यावसायिकांना सिलेंडर नाही, पण मोठ्या हॉटेलमध्ये पुरवठा कसा काय सुरू?” असा प्रश्न आता उघडपणे विचारला जात आहे.

परिस्थितीमुळे अनेक छोट्या व्यावसायिकांचे आर्थिक गणित कोलमडले असून काहींवर उपासमारीची वेळ येण्याची भीती व्यक्त होत आहे. विशेषतः चहाचे टपरी चालक, वडा-पाव विक्रेते, लहान खानावळी चालक आणि कुटुंबाच्या उदरनिर्वाहासाठी छोटा व्यवसाय करणारे लोक सर्वाधिक अडचणीत सापडले आहेत.

स्थानिक नागरिकांनी प्रशासनाने तातडीने या प्रकरणाची दखल घेऊन गॅस वितरणात पारदर्शकता आणावी, सर्वांना समान न्याय द्यावा आणि छोट्या व्यावसायिकांना प्राधान्याने गॅस उपलब्ध करून द्यावा, अशी मागणी केली आहे. अन्यथा आगामी काळात आंदोलन छेडण्याचा इशाराही काही व्यावसायिकांनी दिला आहे.