दुर्गम महाबळेश्वरला मिळणार अत्याधुनिक आरोग्यसेवेची नवी दिशा; कार्डियाक ॲम्ब्युलन्स, एमआरआय आणि हृदयरोग उपचार केंद्रासाठी शासनाकडे जोरदार पाठपुरावा

दुर्गम महाबळेश्वरला मिळणार अत्याधुनिक आरोग्यसेवेची नवी दिशा; कार्डियाक ॲम्ब्युलन्स, एमआरआय आणि हृदयरोग उपचार केंद्रासाठी शासनाकडे जोरदार पाठपुरावा

शिवसेना वैद्यकीय मदत कक्षाच्या मंत्रालयातील बैठकीत महत्त्वपूर्ण निर्णय; ग्रामीण भागातील नागरिकांना स्थानिक पातळीवरच उपचार मिळवून देण्याचा निर्धार

प्रतापगड प्रतिनिधी :

 पर्यटननगरी आणि दुर्गम डोंगराळ भाग म्हणून ओळख असलेल्या महाबळेश्वर तालुक्यात आरोग्य सुविधांचा मोठ्या प्रमाणात अभाव जाणवत असताना आता स्थानिक नागरिकांसाठी दिलासादायक पाऊल उचलण्यात आले आहे. शिवसेना वैद्यकीय मदत कक्षाच्या माध्यमातून महाबळेश्वर तालुक्यात कार्डियाक ॲम्ब्युलन्स, अँजिओग्राफी, अँजिओप्लास्टी आणि एमआरआय सेंटर सुरू करण्यासाठी राज्य शासनाकडे जोरदार पाठपुरावा सुरू करण्यात आला आहे. या मागण्यांसंदर्भात राज्याचे आरोग्यमंत्री प्रकाश आबिटकर यांना निवेदन सादर करण्यात आले असून, तालुक्याच्या आरोग्य व्यवस्थेला अधिक सक्षम करण्यासाठी महत्त्वपूर्ण चर्चा मंत्रालयात पार पडली.

मुंबई येथील मंत्रालयात नुकत्याच झालेल्या शिवसेना वैद्यकीय मदत कक्षाच्या आढावा बैठकीत महाबळेश्वर तालुक्यातील आरोग्यविषयक अडचणी, ग्रामीण भागातील नागरिकांची गैरसोय आणि आपत्कालीन उपचारांची आवश्यकता यावर सविस्तर चर्चा करण्यात आली. महाबळेश्वरसारख्या डोंगराळ आणि पर्यटनप्रधान भागात अपघात, हृदयविकार, मेंदूविकार किंवा अन्य गंभीर आजारांच्या रुग्णांना तातडीने उपचार मिळणे अनेकदा कठीण ठरते. रुग्णांना सातारा, पुणे किंवा मुंबई येथे हलवावे लागते आणि यामध्ये अमूल्य वेळ वाया जात असल्याने रुग्णांच्या जीवितालाही धोका निर्माण होतो.

याच पार्श्वभूमीवर महाबळेश्वर तालुका समन्वयक राजेंद्र पंडित यांनी आरोग्यमंत्र्यांकडे सादर केलेल्या निवेदनात महाबळेश्वरमध्ये अत्याधुनिक वैद्यकीय सुविधा उभारण्याची मागणी केली. त्यांनी सांगितले की, तालुक्यात सुसज्ज कार्डियाक ॲम्ब्युलन्स उपलब्ध झाल्यास हृदयविकाराच्या रुग्णांना तातडीने प्राथमिक उपचार देता येतील. तसेच अँजिओग्राफी, अँजिओप्लास्टी आणि एमआरआय सेंटर सुरू झाल्यास नागरिकांना मोठ्या शहरांमध्ये जाण्याची गरज कमी होईल आणि वेळेत उपचार मिळण्यास मदत होईल.

बैठकीत पश्चिम महाराष्ट्र संपर्क प्रमुख अनिल मोरे, पश्चिम महाराष्ट्र समन्वयक संदीपकुमार जाधव, संतोष बामणे, जिल्हा प्रमुख हेमंत सुतार, सातारा संपर्क प्रमुख सौ. जयश्री मोरे आणि सौ. हेमलता शिंदे यांच्यासह विविध पदाधिकाऱ्यांची प्रमुख उपस्थिती होती. तसेच उपजिल्हाप्रमुख सतीश ओंबळे, सौ. सुलोचना पवार, सौ. प्रियांका नलावडे, आबासाहेब महामुनी, सचिन धायगुडे, सौ. मोनिका पवार आणि सौ. सुवर्णा कत्रे यांनीही बैठकीत सहभाग घेतला.

यावेळी तालुका समन्वयक राजेंद्र पंडित, सौ. मेघा चोरगे, सौ. वर्षा आरडे, सुनील ढेबे, शहर समन्वयक सौ. सुनीता फळणे, उपशहर समन्वयक सौ. शीतल ओतारी, शाखाप्रमुख सचिन वाईकर आणि संजय कांबळे यांनी आपल्या विभागातील कामकाजाचा सविस्तर आढावा सादर केला. सातारा जिल्हा प्रसिद्धी प्रमुख गौरव राक्षे, प्रशांत हजारे, विजय नायडू, सौ. प्रभा नायडू, प्रवीण जिमन आणि इतर कार्यकर्त्यांनीही बैठकीत सक्रिय सहभाग घेतला.

बैठकीत भविष्यातील आरोग्यविषयक उपक्रमांचे नियोजन, ग्रामीण भागात वैद्यकीय शिबिरे आयोजित करणे, तातडीची रुग्णसेवा अधिक सक्षम करणे आणि गरजू रुग्णांना वैद्यकीय मदत उपलब्ध करून देण्यासाठी समन्वय वाढवण्यावर विशेष भर देण्यात आला. शिवसेना वैद्यकीय मदत कक्षाच्या माध्यमातून अधिक लोकाभिमुख आणि तत्पर आरोग्यसेवा उभारण्याचा निर्धार यावेळी व्यक्त करण्यात आला.

महाबळेश्वरसारख्या पर्यटनस्थळी अत्याधुनिक आरोग्य सुविधा उपलब्ध झाल्यास स्थानिक नागरिकांसोबतच दरवर्षी लाखो संख्येने येणाऱ्या पर्यटकांनाही मोठा दिलासा मिळणार आहे. त्यामुळे कार्डियाक ॲम्ब्युलन्स, एमआरआय सेंटर आणि हृदयरोग उपचार सुविधांसाठी करण्यात आलेल्या या मागण्यांकडे शासन कितपत गांभीर्याने पाहते, याकडे आता संपूर्ण तालुक्याचे लक्ष लागले आहे.