“एक वृक्ष... एक संकल्प... हरित भविष्याचा!” — गर्ल्स युथ क्लब व नगरपरिषदेच्या संयुक्त विद्यमाने महाबळेश्वरात भव्य वृक्षारोपण अभियान

महाबळेश्वर, प्रतिनिधी :
पर्यावरण संवर्धन आणि निसर्ग संरक्षणाचा संदेश समाजापर्यंत प्रभावीपणे पोहोचविण्याच्या उद्देशाने गर्ल्स युथ क्लब, महाबळेश्वर आणि उद्यान विभाग, महाबळेश्वर नगरपरिषद यांच्या संयुक्त विद्यमाने रविवारी, दि. 24 मे 2026 रोजी भव्य वृक्षारोपण अभियानाचे आयोजन करण्यात आले आहे. महाबळेश्वरातील वैकुंठधाम हिंदू स्मशानभूमी परिसरात होणाऱ्या या उपक्रमातून पर्यावरण संवर्धनाची जनजागृती करत हरित भविष्य घडविण्याचा संकल्प करण्यात येणार आहे.

सध्या वाढते प्रदूषण, हवामानातील बदल आणि झपाट्याने कमी होत चाललेले हरित क्षेत्र या पार्श्वभूमीवर वृक्षारोपणासारख्या उपक्रमांचे महत्त्व अधिक वाढले आहे. याच बाबीचा विचार करून गर्ल्स युथ क्लबने सामाजिक बांधिलकी जपत हा उपक्रम हाती घेतला असून नागरिकांमध्ये पर्यावरणाविषयी जागरूकता निर्माण करण्याचा प्रयत्न केला आहे. वृक्ष म्हणजे केवळ पर्यावरणाचे संरक्षण नव्हे, तर भावी पिढ्यांसाठी सुरक्षित, निरोगी आणि समृद्ध जीवनाची हमी असल्याचा संदेश या अभियानातून दिला जाणार आहे.

या कार्यक्रमाच्या अध्यक्षस्थानी गिरिस्थान नगर परिषद, महाबळेश्वरचे श्री. सुनील लक्ष्मण शिंदे हे उपस्थित राहणार असून शहरातील सर्व सन्माननीय नगरसेवक व नगरसेविका यांची प्रमुख उपस्थिती लाभणार आहे. तसेच महाबळेश्वरचे वनपाल श्री. सुनील लांडगे हे देखील विशेष उपस्थित राहून वृक्षसंवर्धनाचे महत्त्व अधोरेखित करणार आहेत.

वृक्षारोपण अभियान रविवार, दि. 24 मे रोजी सकाळी 11.30 वाजता वैकुंठधाम हिंदू स्मशानभूमी, फॉरेस्ट कॉलनीजवळ, महाबळेश्वर येथे संपन्न होणार आहे. या सामाजिक व पर्यावरणपूरक उपक्रमात नागरिकांनी मोठ्या संख्येने सहभागी होऊन वृक्षारोपण मोहिमेला बळ द्यावे, असे आवाहन गर्ल्स युथ क्लबच्या अध्यक्षा तृप्ती निलाखे, उपाध्यक्षा सुप्रिया शोडगे, सचिव दिपाली खुरासणे आणि खजिनदार वैशाली चौरसिया यांनी केले आहे.

“एक वृक्ष... एक संकल्प... हरित भविष्याचा!” या घोषवाक्याखाली राबविण्यात येणारा हा उपक्रम महाबळेश्वरच्या पर्यावरण संरक्षण चळवळीला नवी दिशा देणारा ठरेल, असा विश्वास आयोजकांनी व्यक्त केला आहे. वृक्षारोपणासोबतच वृक्षसंवर्धनाची जबाबदारी स्वीकारून निसर्गाचे रक्षण करण्यासाठी प्रत्येक नागरिकाने पुढाकार घेण्याची गरज असल्याचेही यावेळी नमूद करण्यात आले आहे.