साताऱ्यात उद्या मुख्यमंत्री देवेंद्र फडणवीस यांचा दौरा; प्रधानमंत्री आवास योजनेंतर्गत ५ लाख घरांचे लोकार्पण

साताऱ्यात उद्या मुख्यमंत्री देवेंद्र फडणवीस यांचा दौरा; प्रधानमंत्री आवास योजनेंतर्गत ५ लाख घरांचे लोकार्पण

सातारा | प्रतिनिधी :

महाराष्ट्राचे मुख्यमंत्री देवेंद्र फडणवीस हे उद्या दि. १५ मे रोजी सातारा जिल्ह्याच्या दौऱ्यावर येणार असून प्रधानमंत्री आवास योजनेंतर्गत पूर्ण झालेल्या सुमारे पाच लाख घरांच्या लोकार्पण सोहळ्यास ते उपस्थित राहणार आहेत. राज्य शासनाच्या महत्त्वपूर्ण उपक्रमांपैकी एक मानल्या जाणाऱ्या या कार्यक्रमाकडे संपूर्ण राज्याचे लक्ष लागले आहे.

या कार्यक्रमाला केंद्रीय मंत्री शिवराजसिंह चौहान तसेच केंद्रीय मंत्री नितीन गडकरी यांचीही उपस्थिती अपेक्षित असल्याची माहिती समोर आली आहे. त्यामुळे सातारा जिल्ह्यात राजकीय वातावरण चांगलेच तापले असून महायुतीकडून या कार्यक्रमाच्या माध्यमातून शक्तिप्रदर्शन होण्याची शक्यता व्यक्त केली जात आहे.

मुख्यमंत्री देवेंद्र फडणवीस यांनी माध्यमांशी संवाद साधताना साताऱ्यातील हा शासकीय कार्यक्रम पूर्वनियोजित असल्याने तो रद्द करण्यात आलेला नसल्याचे स्पष्ट केले. प्रधानमंत्री आवास योजनेंतर्गत राज्यातील जवळपास २५ लाख कुटुंबांना सुमारे १० हजार कोटी रुपयांचा लाभ वितरित केला जाणार असल्याची माहिती त्यांनी दिली. सर्वसामान्य नागरिकांना हक्काचे घर उपलब्ध करून देण्यासाठी शासन कटिबद्ध असल्याचेही त्यांनी नमूद केले.

दरम्यान, मुख्यमंत्री आणि केंद्रीय मंत्र्यांच्या दौऱ्याच्या पार्श्वभूमीवर सातारा जिल्हा प्रशासन व पोलीस यंत्रणा सतर्क झाली आहे. कार्यक्रमस्थळी कडेकोट पोलीस बंदोबस्त ठेवण्यात येणार असून सुरक्षा व्यवस्थेचा आढावा वरिष्ठ अधिकाऱ्यांकडून घेण्यात आला आहे. वाहतूक व्यवस्थेतही काही बदल होण्याची शक्यता असून नागरिकांनी प्रशासनाला सहकार्य करण्याचे आवाहन करण्यात आले आहे.

राजकीय, प्रशासकीय आणि सामाजिक दृष्ट्या महत्त्वपूर्ण मानल्या जाणाऱ्या या दौऱ्यामुळे सातारा जिल्ह्यात उद्या दिवसभर मोठी हालचाल पाहायला मिळणार आहे।