प्रतापगडाच्या प्रवेशमार्गाची बिकट अवस्था; कुंभरोशी–प्रतापगड रस्ता तातडीने दुरुस्त करण्याची नागरिकांची मागणी

प्रतापगडाच्या प्रवेशमार्गाची बिकट अवस्था; कुंभरोशी–प्रतापगड रस्ता तातडीने दुरुस्त करण्याची नागरिकांची मागणी

प्रतापगड प्रतिनिधी :

ऐतिहासिक वारसा, शिवकालीन पराक्रम आणि पर्यटनासाठी संपूर्ण महाराष्ट्रात प्रसिद्ध असलेल्या किल्ले प्रतापगडकडे जाणारा कुंभरोशी ते प्रतापगड हा सुमारे चार किलोमीटरचा रस्ता सध्या अत्यंत दयनीय अवस्थेत पोहोचला आहे. ठिकठिकाणी मोठमोठे खड्डे, उखडलेले डांबर, बाजूला खचलेला रस्ता आणि धोकादायक वळणांमुळे वाहनचालक, पर्यटक तसेच शिवभक्तांना मोठ्या त्रासाचा सामना करावा लागत आहे. दिवसेंदिवस रस्त्याची अवस्था अधिकच खराब होत असून नागरिकांमधून तीव्र नाराजी व्यक्त केली जात आहे.

प्रतापगड हा राज्यातील महत्त्वाचा ऐतिहासिक व पर्यटनस्थळांपैकी एक मानला जातो. दरवर्षी हजारो पर्यटक, शिवप्रेमी आणि भाविक प्रतापगडावर दर्शनासाठी व इतिहास अनुभवण्यासाठी येत असतात. मात्र प्रतापगडकडे जाणाऱ्या मुख्य मार्गाची झालेली दुरावस्था पर्यटकांच्या सुरक्षेच्या दृष्टीने गंभीर चिंता निर्माण करणारी ठरत आहे. अनेक ठिकाणी रस्त्यावर मोठे खड्डे पडले असून काही भागांमध्ये डांबर पूर्णपणे निघून गेल्याने वाहन चालवताना मोठी कसरत करावी लागत आहे. दुचाकीस्वारांना विशेषतः जीव धोक्यात घालून प्रवास करावा लागत असल्याचे चित्र आहे.

सध्या पावसाळा तोंडावर आला असून मुसळधार पावसामुळे हा रस्ता आणखी खराब होण्याची भीती व्यक्त केली जात आहे. नागरिकांच्या मते, वेळेत दुरुस्ती न झाल्यास रस्त्याचा काही भाग पूर्णपणे वाहून जाण्याची शक्यता नाकारता येत नाही. त्यामुळे भविष्यात वाहतूक विस्कळीत होऊन पर्यटकांनाही मोठा फटका बसू शकतो.

स्थानिक ग्रामस्थ, वाहनचालक आणि व्यापाऱ्यांकडून प्रशासनाने या समस्येकडे तातडीने लक्ष देण्याची मागणी होत आहे. प्रतापगडासारख्या ऐतिहासिक पर्यटनस्थळाकडे जाणारा रस्ता सुरक्षित आणि सुस्थितीत असणे आवश्यक असताना संबंधित विभागाकडून दुर्लक्ष होत असल्याची भावना नागरिकांमध्ये आहे. प्रशासनाने पावसाळ्यापूर्वी तातडीने रस्ता दुरुस्तीचे काम हाती घेऊन पर्यटक आणि शिवभक्तांच्या सुरक्षिततेला प्राधान्य द्यावे, अशी जोरदार मागणी आता नागरिकांमधून होत आहे.