“कुंभरोशी पंचक्रोशीत शिवभक्तीचा जल्लोष; १९ एप्रिलला भव्य शिवजयंती उत्सवाचे आयोजन”
प्रतापगड प्रतिनिधी :
कुंभरोशी पंचक्रोशी परिसरात छत्रपतींच्या विचारांचा जागर साजरा करण्यासाठी शिवजयंती उत्सव समितीच्या वतीने यंदाही १९ एप्रिल २०२६ रोजी शिवजयंती उत्सव मोठ्या उत्साहात आयोजित करण्यात आला आहे. “श्री जननी कुंभळजाई माता प्रसन्न” या मंगलमय घोषवाक्याने सुरू होणाऱ्या या उत्सवासाठी पंचक्रोशीतील नागरिकांमध्ये मोठी उत्सुकता निर्माण झाली असून, सर्वांनी सहकुटुंब उपस्थित राहण्याचे आवाहन समितीच्या वतीने करण्यात आले आहे.
दरवर्षीप्रमाणे यंदाही कार्यक्रमाची रूपरेषा आकर्षक व भक्तिमय ठेवण्यात आली आहे. शनिवार, १८ एप्रिल रोजी सायंकाळी ७ वाजता किल्ले रायगड येथून शिवज्योत आणण्यासाठी प्रस्थान करण्यात येणार आहे. रायगडाशी असलेले ऐतिहासिक नाते जपण्यासाठी आणि शिवरायांच्या स्मृतींना अभिवादन करण्यासाठी हा सोहळा विशेष महत्त्वाचा मानला जातो.
रविवार, १९ एप्रिल रोजी सकाळी १० ते ११ वाजण्याच्या दरम्यान भव्य मिरवणूक काढण्यात येणार असून, पारंपरिक वेशभूषा, ढोल-ताशांचा गजर आणि जयघोषांनी संपूर्ण परिसर दुमदुमून जाणार आहे. सायंकाळी ६ ते ७ वाजता वाडा-कुंभरोशी ग्रामस्थ मंडळाच्या वतीने सुस्वर भजनाचा कार्यक्रम होणार आहे. त्यानंतर सायंकाळी ७ ते ८ वाजता महाप्रसादाचे आयोजन करण्यात आले आहे.
उत्सवाचा मुख्य आकर्षण ठरणारा कीर्तन व व्याख्यानाचा कार्यक्रम सायंकाळी ९ ते ११ वाजता पार पडणार आहे. यामध्ये युवा कीर्तनकार ह.भ.प महादेव महाराज घोडके हे कीर्तन सादर करणार असून, श्री विश्वासानंद महाराज (गुरुकुल वारकरी शिक्षण संस्था, आळंदी देवाची) यांचे प्रेरणादायी व्याख्यान होणार आहे. या माध्यमातून छत्रपती शिवाजी महाराजांच्या विचारांचा जागर आणि समाजप्रबोधन करण्याचा प्रयत्न करण्यात येणार आहे.
वाडा-कुंभरोशी (ता. महाबळेश्वर, जि. सातारा) येथे होणाऱ्या या उत्सवासाठी पंचक्रोशीतील ग्रामस्थ, युवक आणि महिला वर्ग मोठ्या प्रमाणावर सहभागी होणार असून, शिवभक्तीचा हा सोहळा सामाजिक ऐक्य व सांस्कृतिक परंपरेचे दर्शन घडवणार आहे.
Comments
Post a Comment