दुर्गमतेवर मात करत घोणसपूर शाळेची झेप; मुख्य कार्यकारी अधिकारी याशनी नागराजन यांच्या अचानक भेटीत विद्यार्थ्यांच्या गुणवत्तेचा ठसा
प्रतापगड प्रतिनिधी :
सह्याद्रीच्या डोंगररांगांमध्ये वसलेल्या अतिदुर्गम घोणसपूर येथील जिल्हा परिषद शाळेने आपल्या गुणवत्तापूर्ण शिक्षणामुळे पुन्हा एकदा लक्ष वेधून घेतले आहे. या शाळेच्या कामकाजाचा प्रत्यक्ष आढावा घेण्यासाठी मुख्य कार्यकारी अधिकारी याशनी नागराजन यांनी शनिवारी सकाळी आठ वाजताच अचानक भेट दिली. त्यांच्या या अनपेक्षित भेटीमुळे शाळा परिसरात उत्सुकता आणि आनंदाचे वातावरण निर्माण झाले.
या भेटीदरम्यान त्यांच्या सोबत गटविकास अधिकारी विजय विभुते, विस्तार अधिकारी चिकने तसेच इतर संबंधित अधिकारी उपस्थित होते. दुर्गम, डोंगराळ आणि मर्यादित साधनसंपत्ती असलेल्या या भागातही शाळेने विद्यार्थ्यांना गुणवत्तापूर्ण शिक्षण देण्याचा घेतलेला ध्यास पाहून नागराजन यांनी समाधान व्यक्त केले.
विद्यार्थ्यांनी विविध शैक्षणिक उपक्रमांचे आत्मविश्वासपूर्ण सादरीकरण करत उपस्थित अधिकाऱ्यांना प्रभावित केले. विशेषतः इंग्रजी विषयातील विद्यार्थ्यांचे सुस्पष्ट उच्चार, संवाद कौशल्य आणि सादरीकरणातील आत्मविश्वास पाहून नागराजन यांनी विद्यार्थ्यांचे मनापासून कौतुक केले. तसेच विज्ञान, गणित आणि सहशालेय उपक्रमांमध्येही विद्यार्थ्यांची सक्रियता पाहून त्यांनी समाधान व्यक्त केले.
अत्यंत प्रतिकूल भौगोलिक परिस्थितीतही शाळेने शैक्षणिक गुणवत्ता टिकवून ठेवत विद्यार्थ्यांमध्ये आत्मविश्वास निर्माण केला आहे, ही बाब विशेष उल्लेखनीय असल्याचे त्यांनी नमूद केले. मुख्याध्यापक गांजवे सर यांच्या नेतृत्वाखाली शिक्षकांनी केलेल्या सातत्यपूर्ण प्रयत्नांचे त्यांनी विशेष कौतुक केले. याशिवाय गटशिक्षणाधिकारी रमेश गंबरे, केंद्रप्रमुख विनायक पवार आणि महाबळेश्वर शिक्षण विभागाच्या एकत्रित कामगिरीचीही त्यांनी प्रशंसा केली.
या अचानक भेटीमुळे घोणसपूरसारख्या दुर्गम भागातील शाळांमध्येही दर्जेदार आणि परिणामकारक शिक्षण दिले जात असल्याचे अधोरेखित झाले आहे. शिक्षकांच्या जिद्दीमुळे आणि विद्यार्थ्यांच्या मेहनतीमुळे अशा शाळा ग्रामीण शिक्षणाचा आदर्श ठरत असल्याचे चित्र यावेळी स्पष्ट झाले.
━━━━━━━━━━━━━━━━━━━
मुख्य कार्यकारी अधिकारी याशनी नागराजन म्हणाल्या :
“अतिदुर्गम भागात असूनही घोणसपूर शाळेने ज्या प्रकारे शिक्षणाची गुणवत्ता टिकवून ठेवली आहे, ते खरोखरच कौतुकास्पद आहे. विद्यार्थ्यांचा आत्मविश्वास, विशेषतः इंग्रजी विषयातील सादरीकरण, खूप प्रभावी आहे. शिक्षकांनी मर्यादित साधनसंपत्तीतून केलेले कार्य इतर शाळांसाठी प्रेरणादायी आहे.”
━━━━━━━━━━━━━━━━━━━
Comments
Post a Comment