“ डॉ. बाबासाहेब आंबेडकर जयंतीनिमित्त महाबळेश्वर शहरात उत्साहाची लाट”

“ डॉ. बाबासाहेब आंबेडकर जयंतीनिमित्त महाबळेश्वर शहरात उत्साहाची लाट”

महाबळेश्वर प्रतिनिधी  — 

भारतीय राज्यघटनेचे शिल्पकार डॉ. बाबासाहेब आंबेडकर यांच्या १३५ व्या जयंतीनिमित्त आज राज्यभरात उत्साहाचे वातावरण पाहायला मिळाले. पर्यटननगरी महाबळेश्वरमध्येही या जयंतीचा जल्लोष मध्यरात्रीपासूनच सुरू झाला असून भीम अनुयायांच्या उत्साहाने संपूर्ण शहर दुमदुमून गेले.

शहरातील डॉ. बाबासाहेब आंबेडकर चौक परिसरात पहाटेपासूनच मोठी गर्दी उसळली होती. हातात निळे झेंडे, बाबासाहेबांचे फोटो आणि घोषणाबाजी करत अनुयायी मोठ्या संख्येने एकत्र जमले होते. "जय भीम"च्या घोषणांनी आणि महापुरुषांच्या नावांच्या गजराने वातावरण भारावून गेले होते. या ठिकाणी उभारलेल्या बाबासाहेबांच्या पुतळ्याला अभिवादन करण्यासाठी नागरिक, सामाजिक कार्यकर्ते, युवक-युवती तसेच विविध संघटनांचे पदाधिकारी मोठ्या संख्येने उपस्थित होते.

सकाळी महाबळेश्वर नगर परिषदेच्या वतीने अधिकृत कार्यक्रमाचे आयोजन करण्यात आले. यावेळी नगराध्यक्ष श्री. सुनील शिंदे, मुख्याधिकारी श्री. योगेश पाटील, उपनगराध्यक्ष नासिर भाई मुलानी, विरोधी पक्षनेते श्री. कुमार भाऊ शिंदे यांच्यासह सर्व नगरसेवक, अधिकारी आणि मान्यवरांच्या हस्ते बाबासाहेबांच्या पुतळ्यास पुष्पहार अर्पण करून विनम्र अभिवादन करण्यात आले. उपस्थित मान्यवरांनी आपल्या मनोगतातून बाबासाहेबांच्या विचारांचे महत्त्व अधोरेखित करत सामाजिक समतेचा संदेश समाजात रुजवण्याचे आवाहन केले.

दरम्यान, दिवसभर विविध सामाजिक आणि सांस्कृतिक कार्यक्रमांचे आयोजन करण्यात आले होते. काही ठिकाणी रक्तदान शिबिरे, व्याख्याने, तसेच विद्यार्थ्यांसाठी निबंध स्पर्धांचे आयोजन करून बाबासाहेबांच्या विचारांची जनजागृती करण्यात आली. या कार्यक्रमांमुळे शहरात एक प्रेरणादायी आणि जागरूकतेचे वातावरण निर्माण झाले होते.

विशेष म्हणजे, महाबळेश्वरमध्ये पर्यटनासाठी आलेल्या पर्यटकांनीही या उत्सवात उत्स्फूर्त सहभाग नोंदवत बाबासाहेबांच्या स्मृतीस अभिवादन केले. त्यामुळे स्थानिकांसोबतच बाहेरील नागरिकांचाही या जयंती सोहळ्यात मोठा सहभाग दिसून आला.

एकूणच, डॉ. बाबासाहेब आंबेडकर यांच्या १३५ व्या जयंतीनिमित्त महाबळेश्वर शहर जयभीममय झाले असून, उत्साह, एकजूट आणि सामाजिक संदेशाने भरलेला हा सोहळा नागरिकांच्या मनात प्रेरणा जागवणारा ठरला.