विज्ञानाच्या प्रयोगांनी उजळली विद्यार्थ्यांची जिज्ञासा; महाबळेश्वरच्या ग्लोबल इंग्लिश मीडियम स्कूलमध्ये विज्ञान महोत्सव उत्साहात

विज्ञानाच्या प्रयोगांनी उजळली विद्यार्थ्यांची जिज्ञासा; महाबळेश्वरच्या ग्लोबल इंग्लिश मीडियम स्कूलमध्ये विज्ञान महोत्सव उत्साहात

महाबळेश्वर प्रतिनिधी : 

विद्यार्थ्यांमध्ये वैज्ञानिक दृष्टिकोन, जिज्ञासा आणि सर्जनशीलता विकसित व्हावी या उद्देशाने महाबळेश्वर येथील अरहम विद्यालयाच्या ग्लोबल इंग्लिश मीडियम स्कूलमध्ये राष्ट्रीय विज्ञान दिनानिमित्त भव्य विज्ञान महोत्सव उत्साहपूर्ण वातावरणात संपन्न झाला. विविध वैज्ञानिक उपक्रम, स्पर्धा आणि विज्ञान प्रदर्शनामुळे संपूर्ण शाळा परिसर विज्ञानमय वातावरणाने भारावून गेला होता.

या विज्ञान महोत्सवाचे उद्घाटन महाबळेश्वर येथील ढग संशोधन केंद्रातील वैज्ञानिक श्री. सचिन सुरेश पाटील यांच्या हस्ते करण्यात आले. यावेळी त्यांनी विद्यार्थ्यांना विज्ञानाच्या क्षेत्रातील संधींबद्दल मार्गदर्शन करत जिज्ञासा, प्रयोगशीलता आणि संशोधनवृत्ती जोपासण्याचे महत्त्व अधोरेखित केले. विद्यार्थ्यांनी सातत्याने प्रश्न विचारत राहिले पाहिजे आणि प्रयोगांच्या माध्यमातून ज्ञान मिळवण्याचा प्रयत्न केला पाहिजे, असेही त्यांनी आपल्या मनोगतात सांगितले.

या कार्यक्रमांतर्गत ‘Launchpad 2026’ या प्रश्नमंजुषा स्पर्धेचे तसेच ‘Catalyst 2026’ या विज्ञान प्रदर्शनाचे आयोजन करण्यात आले होते. विद्यार्थ्यांनी विविध वैज्ञानिक संकल्पनांवर आधारित प्रत्यक्ष कार्य करणारे मॉडेल्स सादर करून उपस्थितांचे विशेष लक्ष वेधून घेतले. ऊर्जा बचत, पर्यावरण संवर्धन, पाणी व्यवस्थापन, रोबोटिक्स, तसेच दैनंदिन जीवनातील विज्ञान या विषयांवर आधारित अनेक अभिनव मॉडेल्स विद्यार्थ्यांनी सादर केली.

याशिवाय विज्ञानविषयक रांगोळी स्पर्धेत विद्यार्थ्यांनी आकर्षक आणि संदेशप्रधान रांगोळ्यांच्या माध्यमातून विज्ञानाचे महत्त्व प्रभावीपणे मांडले. रंग आणि कल्पकतेच्या संगमातून विद्यार्थ्यांनी वैज्ञानिक विचारांचे सुंदर चित्रण केले.

या विज्ञान प्रदर्शनाला पालकांनी मोठ्या संख्येने उपस्थित राहून विद्यार्थ्यांच्या कल्पकतेचे कौतुक केले. प्रदर्शन पाहताना अनेक पालकांनी विद्यार्थ्यांशी संवाद साधून त्यांच्या प्रयोगांविषयी माहिती घेतली. प्रमुख पाहुण्यांनी विद्यार्थ्यांच्या सादरीकरणाचे कौतुक करत अशा उपक्रमांमुळे विद्यार्थ्यांमध्ये आत्मविश्वास वाढतो तसेच संशोधनाची आवड निर्माण होते, असे मत व्यक्त केले.

या यशस्वी विज्ञान महोत्सवाबद्दल संस्थेचे अध्यक्ष डॉ. शैलेश पवार आणि सचिव श्री. निलेश पवार यांनी विद्यार्थ्यांचे, मुख्याध्यापकांचे तसेच शिक्षकवृंदाचे विशेष अभिनंदन केले. अशा उपक्रमांमुळे विद्यार्थ्यांच्या बौद्धिक विकासाला चालना मिळते आणि भविष्यातील वैज्ञानिक घडविण्यासाठी हे कार्यक्रम महत्त्वपूर्ण ठरतात, असे त्यांनी सांगितले.

कार्यक्रमाच्या यशस्वी आयोजनासाठी शिक्षक व शिक्षकेतर कर्मचाऱ्यांनी विशेष परिश्रम घेतले. विज्ञान महोत्सवामुळे विद्यार्थ्यांना विज्ञानाचा प्रत्यक्ष अनुभव घेण्याची संधी मिळाली आणि संपूर्ण शाळा परिसर ज्ञान, प्रयोग आणि नवकल्पनांच्या उत्साहाने भारून गेला.