“कामही दिसू द्या, केवळ घोषणा नकोत”; अपेक्षांच्या उंबरठ्यावर महाबळेश्वर पंचायत समिती

“कामही दिसू द्या, केवळ घोषणा नकोत”; अपेक्षांच्या उंबरठ्यावर महाबळेश्वर पंचायत समिती

✍️जितेंद्र कारंडे ,

प्रतापगड प्रतिनिधी : 

महाबळेश्वर तालुक्यात सत्तांतरानंतर नवे नेतृत्व सत्तेवर आले आणि त्याच वेळी जनतेच्या अपेक्षांचाही स्तर उंचावला. काही ठिकाणी सुरुवातीचे हालचाली, बैठका आणि नियोजनाची गती दिसत असली, तरी आता खऱ्या अर्थाने जमिनीवर काम दिसण्याची वेळ आली आहे. “घोषणा चांगल्या आहेत, पण त्याची फळे गावात दिसली पाहिजेत,” अशी थेट आणि स्पष्ट प्रतिक्रिया नागरिक देताना दिसत आहेत.

तालुक्याची रचना पाहता आव्हाने नक्कीच मोठी आहेत. ७९ ग्रामपंचायती, डोंगर-दऱ्यांमध्ये पसरलेल्या वाड्या-वस्त्या, दुर्गम भागातील संपर्काचा अभाव — या सर्व गोष्टी लक्षात घेतल्या तर काम सोपे नाही, हे मान्य करावेच लागेल. विशेषतः कोयना खोरे आणि कांदटी खोरे भागातील परिस्थिती आजही आव्हानात्मक आहे. मात्र, या कठीण परिस्थितीतच नेतृत्वाची खरी ओळख घडते, अशी अपेक्षा व्यक्त होत आहे.

राज्याचे उपमुख्यमंत्री एकनाथ शिंदे यांनी २२ गावे दत्तक घेण्याची घोषणा केल्याने तालुक्याला एक मोठी संधी मिळाली आहे. ही घोषणा केवळ राजकीय न राहता प्रत्यक्ष विकासाच्या रूपात उतरली, तर महाबळेश्वरच्या दुर्गम भागांचा चेहरामोहरा बदलू शकतो. ही बाब सकारात्मक मानली जात असली, तरी “घोषणांपासून अंमलबजावणीकडे” जाण्याची वाट अजून बाकी असल्याचे वास्तवही नाकारता येत नाही.

पश्चिम भागात उपसभापती संजय मोरे आणि सदस्य संजय शेलार यांनी काही ठिकाणी जनसंपर्क वाढवण्याचे प्रयत्न सुरू केल्याचे दिसून येते, तर पूर्व भागात सभापती शकुंतला चोरमले आणि सदस्य वंदना भिलारे यांच्याकडूनही स्थानिक पातळीवर संवाद वाढवण्याची हालचाल सुरू आहे. ही सुरुवात नक्कीच स्वागतार्ह असली, तरी आता या प्रयत्नांना ठोस कामांची जोड मिळणे गरजेचे आहे. “सुरुवात चांगली, पण परिणामही तितकाच ठोस हवा,” अशी अपेक्षा नागरिक व्यक्त करत आहेत.

महाबळेश्वरचा पर्यटन विकास हा एक मोठा प्लस पॉइंट आहे. मात्र, त्याचा फायदा प्रत्येक गावापर्यंत पोहोचवणे अजूनही अपूर्णच आहे. भात शेती, स्ट्रॉबेरी शेती आणि बांबू लागवड करणारा शेतकरी अजूनही बाजारपेठ आणि सुविधांच्या प्रतीक्षेत आहे. पर्यटनातून येणाऱ्या निधीचा योग्य वापर करून दुर्गम भागातील पायाभूत सुविधा उभारल्या, तर हा समतोल साधता येऊ शकतो.

नागरिकांचा सूर स्पष्ट आहे — “नेते भेटायला हवेत, ऐकायला हवेत आणि निर्णय घेताना दिसायला हवेत.” केवळ बैठका आणि कागदोपत्री योजना यावर समाधान मानणारा काळ आता गेला आहे. गावागावात जाऊन समस्या समजून घेणे, त्यावर तातडीने उपाय करणे आणि त्याचा परिणाम दाखवणे हेच खरे नेतृत्व ठरणार आहे.

याच वेळी, स्वर्गीय बाळासाहेब भिलारे यांच्या कार्यपद्धतीचा उल्लेख आजही प्रेरणादायी ठरतो. त्यांनी ज्या पद्धतीने प्रत्येक गावाशी नाळ जोडली आणि कामातून विश्वास मिळवला, तो आदर्श आजच्या नेतृत्वासाठी दिशादर्शक ठरू शकतो.

एकूणच, महाबळेश्वर पंचायत समितीसमोर आज “टीका आणि अपेक्षा” या दोन्ही गोष्टी एकत्र उभ्या आहेत. सुरुवातीचे सकारात्मक प्रयत्न कौतुकास्पद असले, तरी आता त्याला गती आणि परिणामाची जोड मिळणे अत्यावश्यक आहे. “काम सुरू आहे” यापेक्षा “काम पूर्ण झाले” हे दाखवण्याची वेळ आली आहे — आणि याच आधारावर पुढील काळात या नेतृत्वाचे मूल्यमापन होणार आहे.