जागतिक महिला दिनानिमित्त महाबळेश्वरमध्ये ‘देणे समाजाचे’ संवाद कार्यशाळा; ११ मार्च रोजी विविध विषयांवर तज्ज्ञ मार्गदर्शन

जागतिक महिला दिनानिमित्त महाबळेश्वरमध्ये ‘देणे समाजाचे’ संवाद कार्यशाळा; ११ मार्च रोजी विविध विषयांवर तज्ज्ञ मार्गदर्शन 

✍️मिलिंद काळे,

महाबळेश्वरप्रतिनिधी :

 जागतिक महिला दिनाच्या निमित्ताने समाजातील महिलांचे सर्वांगीण सक्षमीकरण, पिढ्यांमधील संवाद वाढविणे आणि कुटुंब व समाजव्यवस्थेतील महिलांची भूमिका अधिक प्रभावी करण्याच्या उद्देशाने महाबळेश्वरमध्ये ‘देणे समाजाचे’ या विशेष संवाद कार्यशाळेचे आयोजन करण्यात आले आहे. सामाजिक बांधिलकी जपत महिलांना मार्गदर्शन आणि विचारांची देवाणघेवाण करण्यासाठी हा उपक्रम राबविण्यात येत असून महाबळेश्वर शहरात प्रथमच अशा प्रकारचा कार्यक्रम आयोजित केला जात आहे.

माई वैद्यकीय सामाजिक व शैक्षणिक सोसायटी, महाबळेश्वर यांच्या पुढाकारातून या कार्यक्रमाचे आयोजन करण्यात आले असून महाबळेश्वर गिरीस्थान नगरपरिषद, इनरव्हील क्लब महाबळेश्वर, रोटरी क्लब महाबळेश्वर तसेच हॉटेल असोसिएशन महाबळेश्वर यांच्या संयुक्त सहकार्याने हा उपक्रम पार पडणार आहे. समाजातील महिलांना आरोग्य, कुटुंबव्यवस्था, करिअर आणि आधुनिक विचार याबाबत योग्य दिशा देणे तसेच दोन पिढ्यांमधील संवाद अधिक सुदृढ करणे हा या कार्यक्रमाचा प्रमुख उद्देश असल्याचे आयोजकांनी सांगितले.

या संवाद कार्यशाळेमध्ये दोन पिढ्यांमधील विचारांची दरी कमी करण्यासाठी संवादाचे महत्त्व, महिलांचे शारीरिक आणि मानसिक स्वास्थ्य, व्यवसाय व करिअरमध्ये संतुलन कसे राखावे, स्त्री स्वातंत्र्य आणि आधुनिक विचारांची जाणीव तसेच कुटुंब व्यवस्था आणि समाजाबद्दलची बांधिलकी या महत्त्वपूर्ण विषयांवर सखोल चर्चा करण्यात येणार आहे. आजच्या वेगाने बदलणाऱ्या सामाजिक परिस्थितीत महिलांनी स्वतःचे आरोग्य, कुटुंब आणि करिअर यामध्ये समतोल साधत पुढे जाणे अत्यंत आवश्यक असल्याने या विषयांवर मार्गदर्शन देण्यात येणार आहे.

या कार्यक्रमात आयुर्वेद तज्ज्ञ डॉ. श्री. श्याम बडवे (एम.डी. आयुर्वेद) प्रमुख मार्गदर्शक म्हणून उपस्थित राहणार असून ते महिलांच्या आरोग्याशी संबंधित विविध पैलूंवर मार्गदर्शन करणार आहेत. आयुर्वेदाच्या दृष्टीकोनातून शारीरिक व मानसिक स्वास्थ्य कसे जपावे, दैनंदिन जीवनशैलीत कोणते बदल करावेत आणि निरोगी जीवनासाठी कोणत्या गोष्टींकडे लक्ष देणे आवश्यक आहे याबाबत ते सविस्तर माहिती देणार आहेत.

ही संवाद कार्यशाळा बुधवार, दिनांक ११ मार्च २०२६ रोजी दुपारी ४ ते ६ या वेळेत महाबळेश्वर येथील हॉटेल पूनम हॉल येथे आयोजित करण्यात आली आहे. कार्यक्रमासाठी प्रवेश विनामूल्य ठेवण्यात आला असून महाबळेश्वर शहर व परिसरातील महिलांनी तसेच नागरिकांनी वेळेवर उपस्थित राहून या उपक्रमाचा लाभ घ्यावा, असे आवाहन आयोजकांनी केले आहे.

“देणाऱ्याने देत जावे, घेणाऱ्याने घेत जावे, घेता घेता एक दिवस देणाऱ्याचे हातच घ्यावे” या प्रेरणादायी विचारांवर आधारित हा उपक्रम समाजात सकारात्मक विचारांची देवाणघेवाण घडवून आणण्याचा प्रयत्न करणार आहे. महिलांच्या प्रगतीसाठी समाजातील विविध घटकांनी एकत्र येऊन संवाद साधण्याची गरज अधोरेखित करण्यासाठी ही कार्यशाळा महत्त्वाची ठरणार असल्याचे आयोजकांनी नमूद केले आहे.