ग्रामपंचायत पोटनिवडणुकीचा बिगुल; साताऱ्यात ३४ सरपंच, १७२ सदस्यांसाठी रणधुमाळी

ग्रामपंचायत पोटनिवडणुकीचा बिगुल; साताऱ्यात ३४ सरपंच, १७२ सदस्यांसाठी रणधुमाळी

सातारा प्रतिनिधी : 

राज्यातील ग्रामपंचायतींमधील रिक्त पदांसाठी पोटनिवडणुकीचा कार्यक्रम जाहीर झाल्याने ग्रामीण भागात राजकीय हालचालींना वेग आला आहे. राज्य निवडणूक आयोगाने जाहीर केलेल्या या कार्यक्रमानुसार राज्यभरातील एकूण २४४४ ग्रामपंचायतींमध्ये ४७१ थेट सरपंच आणि ३१२० सदस्य पदांसाठी मतदान प्रक्रिया पार पडणार असून सातारा जिल्ह्यात ३४ थेट सरपंच आणि १७२ सदस्य पदांसाठी निवडणूक होणार आहे.

सदस्य व सरपंच पदे विविध कारणांमुळे रिक्त झाल्याने ही पोटनिवडणूक घेण्यात येत आहे. निधन, राजीनामा, अनर्हता तसेच इतर प्रशासकीय कारणांमुळे रिक्त झालेल्या जागा भरण्यासाठी ही प्रक्रिया राबवण्यात येणार आहे. निवडणूक कार्यक्रम जाहीर होताच संबंधित ग्रामपंचायत क्षेत्रांमध्ये आदर्श आचारसंहिता लागू झाली असून स्थानिक राजकारणात चुरस निर्माण झाली आहे.

सातारा जिल्ह्यात एकूण १३८ ग्रामपंचायतींमध्ये या पोटनिवडणुका होणार आहेत. यात एकूण २०६ जागांचा समावेश असून त्यापैकी ३४ थेट सरपंच आणि १७२ सदस्य पदे रिक्त आहेत. या पार्श्वभूमीवर इच्छुक उमेदवारांनी हालचाली सुरू केल्या असून गावागावात राजकीय समीकरणे जुळवाजुळव सुरू झाली आहे.

निवडणूक कार्यक्रमानुसार नामनिर्देशनपत्रे ७ ते १३ एप्रिल दरम्यान दाखल करता येणार आहेत. त्यानंतर १५ ते १७ एप्रिल या कालावधीत छाननी व माघार प्रक्रिया पार पडणार आहे. प्रत्यक्ष मतदान २८ एप्रिल रोजी होणार असून निकाल २९ एप्रिल रोजी जाहीर केला जाणार आहे. ही संपूर्ण प्रक्रिया पारंपारिक पद्धतीने पार पाडण्यात येणार असल्याचे आयोगाने स्पष्ट केले आहे.

दरम्यान, ज्या ग्रामपंचायतींच्या पदांचा कार्यकाळ संपण्यास सहा महिने किंवा त्यापेक्षा कमी कालावधी शिल्लक आहे, त्या ठिकाणी पोटनिवडणुका घेण्यात येणार नसल्याचेही स्पष्ट करण्यात आले आहे. त्यामुळे काही ठिकाणी निवडणुकीऐवजी प्रशासकीय व्यवस्थापन सुरू राहणार आहे.

एकूणच, पोटनिवडणुकीच्या निमित्ताने सातारा जिल्ह्यासह राज्यभरात राजकीय वातावरण तापण्याची चिन्हे दिसत असून गावपातळीवर पुन्हा एकदा सत्ता समीकरणांची रंगत वाढणार आहे.