चिखलीच्या स्वराची झेप; नवोदय विद्यालयात निवड, ९७.५० गुणांसह जिल्हा गुणवत्तायादीत मानाचे स्थान

चिखलीच्या स्वराची झेप; नवोदय विद्यालयात निवड, ९७.५० गुणांसह जिल्हा गुणवत्तायादीत मानाचे स्थान

महाबळेश्वर प्रतिनिधी :

महाबळेश्वर तालुक्यातील जिल्हा परिषद प्राथमिक शाळा चिखली येथील विद्यार्थीनी स्वरा मंगेश सुर्वे हिने यावर्षी घेण्यात आलेल्या नवोदय विद्यालय प्रवेश परीक्षेत दैदिप्यमान यश संपादन करत आपल्या गावासह संपूर्ण तालुक्याचा अभिमान वाढवला आहे. स्वराने ९७.५० गुण मिळवत महाबळेश्वर तालुक्यातून जिल्हा गुणवत्तायादीत मानाचे स्थान पटकावले असून तिची नवोदय विद्यालय खावली, सातारा येथे निवड निश्चित झाली आहे. ग्रामीण भागातील मर्यादित साधनसामग्रीमध्ये शिक्षण घेत असतानाही स्वराने मिळवलेले हे यश विशेष उल्लेखनीय ठरत आहे.

नवोदय विद्यालय प्रवेश परीक्षा ही देशातील एक अत्यंत स्पर्धात्मक परीक्षा मानली जाते. अशा कठीण स्पर्धेत स्वराने उच्च गुण मिळवत आपली गुणवत्ता सिद्ध केली आहे. तिच्या या यशामुळे इतर विद्यार्थ्यांसाठीही प्रेरणादायी उदाहरण निर्माण झाले आहे. शालेय जीवनातच तिने विविध शैक्षणिक व स्पर्धा परीक्षांमध्ये सातत्याने यश संपादन करत आपली अभ्यासू वृत्ती आणि चिकाटी सिद्ध केली आहे.

स्वराच्या या यशामागे शाळेचे मुख्याध्यापक विष्णू ढेबे यांचे योग्य मार्गदर्शन, उपशिक्षक महेश पवार व सचिन जगताप यांचे परिश्रम तसेच पालक मंगेश सुर्वे यांचे प्रोत्साहन आणि पाठबळ महत्त्वाचे ठरले आहे. शिक्षकांनी दिलेले नियोजनबद्ध मार्गदर्शन, नियमित सराव आणि कुटुंबीयांचे सहकार्य यामुळे स्वराला हे यश मिळवणे शक्य झाले.

या उल्लेखनीय यशाबद्दल महाबळेश्वर तालुक्याचे गटविकास अधिकारी विजय विभुते, गटशिक्षणाधिकारी रमेश गंबरे, केंद्रप्रमुख चंद्रकांत जंगम, शाळा व्यवस्थापन समिती अध्यक्षा लता जाधव, उपाध्यक्ष संतोष मोरे तसेच सदस्य संपत जाधव, संतोष जाधव, विशाल पवार, ग्रामस्थ मंडळ चिखली आणि महाबळेश्वर तालुक्यातील शिक्षकवृंद यांनी स्वराचे अभिनंदन करून तिच्या पुढील शैक्षणिक वाटचालीस शुभेच्छा दिल्या आहेत.

स्वराच्या या यशामुळे चिखली गावात आनंदाचे वातावरण निर्माण झाले असून गावकऱ्यांनी तिचा सत्कार करण्याची तयारी सुरू केली आहे. तिच्या या यशामुळे शाळेची शैक्षणिक गुणवत्ता अधोरेखित झाली असून ग्रामीण भागातील विद्यार्थीदेखील योग्य मार्गदर्शन आणि मेहनतीच्या जोरावर मोठी कामगिरी करू शकतात, हे पुन्हा एकदा सिद्ध झाले आहे.

दरम्यान, जिल्हा परिषद प्राथमिक शाळा चिखली ही शाळा शैक्षणिक गुणवत्ता, विविध उपक्रम आणि विद्यार्थ्यांच्या सर्वांगीण विकासासाठी ओळखली जाते. शिक्षकांच्या सातत्यपूर्ण प्रयत्नांमुळे आणि विद्यार्थ्यांच्या जिज्ञासू वृत्तीमुळे या शाळेतील अनेक विद्यार्थ्यांनी विविध स्पर्धांमध्ये यश मिळवले आहे. स्वराच्या यशामुळे शाळेच्या या परंपरेत आणखी एक मानाचा तुरा रोवला गेला आहे.

स्वराने आपल्या यशाचे श्रेय शिक्षक, पालक आणि नियमित अभ्यासाला दिले असून पुढील काळातही उच्च शिक्षण घेऊन मोठे यश संपादन करण्याचा तिचा मानस आहे. तिच्या या जिद्दीमुळे आणि आत्मविश्वासामुळे भविष्यात ती निश्चितच अधिक मोठी कामगिरी करेल, असा विश्वास शिक्षक व ग्रामस्थांनी व्यक्त केला आहे.